FB Instagram Twitter Youtube Linkedin إزاي استفيد من "فيسبوك ماركت بليس" marketplace؟ | أكاديمية اعمل بيزنس
 
الرجوع الى المدونة

إزاي استفيد من "فيسبوك ماركت بليس" marketplace؟

إزاي استفيد من

"فيس بوك ماركت بليس" "Facebook Marketplace".. فكرة عملت ضجة كبيرة لما طبقها فيس بوك، على الرغم من إن فكرة الماركت بليس نفسها مش جديدة، ومطبقة في مواقع كتير زي جوميا، وسوق دوت كوم، وOLX.

الماركت بليس عبارة عن موقع متخصص في تسهيل عملية بيع وشراء المنتجات بين مختلف الشركات والعملاء، يعني كأنه سوق حقيقي بس أون لاين، لكن الميزة اللي عند فيسبوك واللي مش موجودة عند أي ماركت بليس تاني، إن موقع التواصل الاجتماعي ده يمتلك البيانات الشخصية والديموجرافية وتفضيلات البيع والشراء والهوايات وكل حاجة تقريبا عن رواده من خلال الحسابات الشخصية بتاعتهم، وده اللي بيديله احتمالية تحقيق نجاح ساحق مقارنة بغيره من مواقع الماركت بليس التانية.

إحنا بقى كشركات أو رواد أعمال أو أصحاب مشاريع صغيرة، أو حتى كمستهلكين عايزين ندور على حاجة نشتريها أو نبيع حاجات عندنا، نقدر نستفيد من فيسبوك ماركت بليس إزاي؟

1- مساعدة أصحاب الشركات والمنتجات في زيادة الوعي بعلامتهم التجارية:

إزاي أي شركة جديدة تزود مبيعاتها؟ الموضوع متعلق بصناعة علامة تجارية مميزة للشركة، والحرص على إن أكبر عدد من الجمهور المستهدف يسمع عنها ويثق فيها وفي جودتها، لأن العملاء مش هيشتروا منك لو مش عارفينك وواثقين فيك.

وده معناه إنك تسعى لزيادة عدد الناس التي تعرف عن البراند بتاعتك، وتسهل ليهم الوصول ليك ومعرفة معلومات عنك لو هما لسه بيسمعوا عنك لأول مرة.

وفيسبوك ماركت بليس هو المكان المثالي اللي هيحققلك ده، لأن تجارب الشراء والبيع اللي حركها ماركت بليس أدت لنمو بنسبة 77% في عدد المستخدمين اللي ماكانوش نشطين على فيس بوك قبل ماركت بليس.

ده معناه إيه؟

معناه إن الماركت بليس بيتيح لك طريقة سهلة إنك تقريبا تقدر تضاعف عدد التفاعلات مع العملاء المحتملين في الوقت الحالي.

 

إزاي؟

زي أي منصة تانية أو قناة أو وسيط: تقديم عرض محدش يقدر يرفضه، وخلينا ندي مثال لطريقة عرض بيتبعها ماركت بليس تخلي أي حد يحب يشتري وهو متطمن كمان:

 

قائمة المنتجات في فيسبوك ماركت بليس بتتصف بالتالي:

1- التركيز على المنتجات، وليس الشركة.

2- توفير معلومة مكان ومعاد توافر المنتج أو الخدمة.

3- عنوان محلي.

فلو مثلا بتدور في قائمة "ملابس أطفال" على الماركت بليس، يبقى طبيعي إنك مهتم بالسلعة ديه، وده بيتيح للشركات أو الناس اللي عايزه توصل للمهتمين بملابس الأطفال لو لسه جديدة إنها تدخل وتعرض علامتها التجارية وتعرف نفسها للمستهلكين.

مثال تاني لطريقة عرض مميزة تساعد على بناء ثقة بين المستهلك والشركة بمنتجاتها، وهي إنك تعرض صور توضح مراحل تطور بناء المنتج عشان العميل يشوف التطور ده ويلمس الجودة بنفسه، وديه هي ميزة بتحول خدمة غير ملموسة إلى منتج نهائي ملموس، زي مثلا في قطاع العقارات، بعدها تحط رقم تليفون للتواصل، وكل ده يساعد على بناء الثقة، واللي بيزود من مزايا الخدمة ديه إنها مجانية.

 

2- المساعدة في بناء الثقة قبل الشراء:

من أهم دوافع الشراء عند أي مستهلك هو الثقة في اسم الشركة يعني الثقة في العلامة التجارية والمنتج بتاعك، ودع اللي بيخلي الناس تدور دايما على إنها تشتري من براندات معروفة، ويبقوا مستعدين يدفعوا في سبيل ده فلوس أكتر كمان.

وبما إن معظم مبيعات فيسبوك ماركت بليس بتيجي عن طريق الملف الشخصي للفرد- وديه ميزة كويسة- فهي بتساعد العميل إنه يعرف كويس هوية اللي هيشتري منه من غير ما يحتاج يروح المحل أو الشركة بنفسه.

 

3- المساعدة في إجراء أبحاث السوق عشان تعرف هتبيع إيه:

أي صاحب شركة أو أي منتج عايز الناس تعرفه وتسمع اسم منتجه، وتروح تزور محله أو شركته عشان تشتري.

لو إنت هتعمل ده عن طريق الإعلانات على الفيس بوك، هتشوف إيه أكتر منتج بيثير اهتمام العملاء وتبدأ تعلن عنه، الخدعة هنا في حتة إزاي أعرف أكتر منتج بيثير اهتمام الناس، فيسبوك ماركت بليس بيسهل عليك النقطة، لما تدخل وتتصفح فئات المنتجات المختلفة هتقدر تعرف إيه أكتر حاجة عليها طلب، وتبدأ تبيعها وإنت متطمن.

ويبقى فاضلك بعد كده الخطوات المعروفة أو اللي نقدر نقول عليها عناصر الإبداع الكلاسيكية زي صورة مميزة وعنوان أو شعار للإعلان وعبارة وصف تحت الصورة اللي هتحطها على الماركت بليس عشان تخلي الناس تقرر تشتري.

 

4- المساعدة في السيطرة على المساحة الزمنية: 

بالنسبة لشركات المنتجات، ممكن ناس كتير تزور موقعك، وتبدي اهتمام بالبضاعة بتاعتك، ورغم كده برضه ما تشتريش منك، الشركة محتاجة "استراتيجية متابعة" للعملاء بداية من لحظة اعجاب العميل بالمنتج لحد لحظة إتمام صفقة الشراء.

فيس بوك ماركت بليس بيوفر الوقت على أصحاب الشركات عشان يوصلوا بسرعة للي بيدور على منتجاتهم، لأنه بيديك "تنبيه" أول ما حد يدور عن منتج بتاعك، فإنت كشركة قبل ما تبيع بتقى عارف كمية الناس إلي عملت سيرش.

وإحصائيات المبيعات الأون لاين أثبتت إن 35-50٪ من جميع المبيعات اللي بتحققها أي شركة بتكون من الشركات اللي بتتفاعل بسرعة مع العملاء.

الماركت بليس بشكل عام مهم ومفيد، ولكن على فيس بوك ليه مزايا أكتر بكتير، وميفعش أي صاحب بيزنس ما يتستفيدش منها.

 

شارك المقال :