إزاي تتعامل مع زميلك الفضولي!؟

محموووووود انت نمت يا حبيبي؟؟؟ مين مننا ميعرفش الجملة الشهيرة دي اللي خيرية أحمد كانت بتقولها لفؤاد المهندس في فيلم "عريس مراتي"، لو فاكرين الجملة فأكيد هتعرفوا إن كان بعدها لازم تقوله أخبار جارهم اللي قاعدة تتصنت عليه طول النهار والليل، فؤاد المهندس في الفيلم كان بيحاول يسكتها بأي طريقة بس لا كان خنق نافع ولا كهربا نافعة، طب لو زميلك في الشغل كان شبه خيرية أحمد كده يا ترى تتعامل معاه ازاي؟؟

• قّفل الحوار أول ما تحس إنك مش مرتاح: الشغل يعتبر بيئة سهلة تقدر من خلالها تتجنب أي حوار انت مش حابه، وده لأن عندك دايما خيار إنك مشغول وفي مهام لازم تعملها، فلو اتسألت سؤال مش حابب ترد عليه قوله معلش لازم أمشي عشان في تاسك لازم يخلص دلوقتي، ولو هو عارف تاسكاتك قوله في مكالمة مهمة لازم اعملها.

• رد عليه السؤال بسؤال زيه: الطريقة دي بتبقى حلوة جدا خاصة لو مش حابب تبين إنك مش عايز تتكلم في الموضوع، فلو زميلك ده سألك سؤال فضولي قوله مش متأكد أو معرفش، وبعدين عيد عليه نفس السؤال اللي سألهولك.

• اقلبها هزار: في أي مرة زميلك ده يحاول يسألك سؤال غريب أو محرج، ممكن ترد عليه بتعليق ساخر وتقلبها هزار ودي طريقة هتمنعه يتمادى أكتر في السؤال، مثلا لو جه قالك أنت بتقبض كام؟ قوله والله مهما ادوني مش هيكون قد قدراتي الخارقة

• غّير الموضوع: لو اتسألت ومش حابب تجاوب، غير الموضوع واسأل زميلك عن حاجة تانية خالص،، فمثلا لو لقيته بيقولك هو انت متعرفش زميلنا فلان الفلاني ده متجوزش ليه لغاية دلوقتي، قوله والله معرفش واسأله يا ترى إيه الأفلام الحلوة اللي موجودة في السينما دلوقتي.

• قوله بصراحة إنك مش حابب تتكلم: غالبا الطريقة المباشرة بتكون أكتر طريقة فّعالة خاصة لو كنت بتتعامل مع حد زنان، فلو اتسألت سؤال غير مريح بالنسبالك، أحسن حاجة تقولها هي إنك مش حابب تتكلم في الموضوع ده وخلي لهجتك عادية عشان اللي قدامك ميحسش بالإهانة.

كل دي طرق تقدر تتعامل بيها مع الأسئلة الفضولية، وتعالى دلوقتي أقولك إزاي تحط حدود تمنع بيها الحوار مع شخص فضولي من الأساس:

• بين إنك مش فاضي: وبالتالي هو مش هيحاول يجي يكلمك أصلا، على سبيل المثال حط السماعة على ودنك وخليه يفكر إنك مش عارف تسمع هو بيقول ايه ولو أصر على الكلام قوله إنك مشغول حاليا.

• بلوك بلوك بلوك: السوشيال ميديا تعتبر مادة خصبة لمعلومات شخصية كتير عنك، فحاول إنك تبعد الزميل الفضولي عنها بإنك تخليها برايفت، ولو مش حابب تعمله بلوك ففي وسائل كتير تقدر تمنع عنه البوستات أو المعلومات اللي انت بتحطها.

• فرق بين الفضولي وبين اللي بيحاول يعمق علاقته بيك: أحيانا في بعض الناس بتسأل أسئلة شخصية في محاولة إنه يكون صديقك مثلا، فلو كان سياق أسئلته بيدل على إنه عايز يتعرف عليك ممكن تجاوب بتفاصيل بسيطة، بس لو الشخص ده معروف عنه إنه رغاي وبيحب النميمة فحط مسافة بينك وبينه فورا.