"خالد" شاب عنده 32 سنة، متجوز من 3 سنين ومخلف "هاجر وكريم"، خالد بيشتغل مهندس كمبيوتر في أحد الشركات وبياخد مرتب معقول بس حاسس إن المصاريف بدأت تزيد عليه، فقرر يدور على وظيفة تانية جنب الوظيفة الأساسية؛ عشان يعلي دخله بس حاسس إنه مطحون ومش عارف يوفق بين الوظفتين مع بعض، وفي نفس الوقت مفيش قدامة غير الخيار ده عشان يقدر يغطي تكاليف المعيشة عشان الظروف الاقتصادية دلوقتي!

لو بصيت حواليك هتلاقي نموذج "خالد" ده موجد في كل حتة ممكن يكون النموذج ده انت أو صاحبك أو قريبك أو حد تعرفه من بعيد، وده لأن ناس كتير دلوقتي بتجمع بين وظيفتين في وقت واحد لدوافع كتيرة إما إنه مضطر لده عشان يعلي دخله المادي أو الوظيفة التانية بالنسباله زي " plan B " لو الشركة اللي هو فيها حصل فيها مشاكل أو عايز يعمل كارير شيفت فبيجمع بين وظيفته الحالية ووظيفته الجديدة لحد ما يكتسب خبرة اكتر ويعتمد عليها بشكل كلي وهكذا.

وبصرف النظر عن الدوافع اللي بتخلي الناس تجمع بن أكتر من وظيفة إلا إن فيه ناس كتير بتفشل إنها توفق ما بين وظيفتين مع بعض لأن الموضوع بيكون صعب ومرهق ومش سهل علي أي حد إنه يتأقلم عليه؛ عشان كده في البوست هنقولك بعض النصايح اللي هتساعد إنك توفق بين وظيفتين في وقت واحد:

• أول حاجة قبل ما تفكر تشوف وظيفة تانيه لازم تبص على "دليل موظفين" الشركة الحالية اللي أنت فيها، وتشوف إذا كانت اللوائح بتسمح بده ولا لأ أو ممكن عن طريق مدير الــ HR؛ وده عشان تطمن إنك مش مخالف ومتعرضش نفسك لمساءلة قانونية في حالة إن قانون الشركة مش بيسمح بده.

• مهم قبل ما تختار الوظيفة الجديدة تتأكد إنها في نطاق معرفتك أو موهبتك أو تخصصك عشان متصعبش الأمور على نفسك ولو كانت الوظيفة في مجال انت بتحبه أو مبدع فيه ده هيقلل من تعب وأعباء الوظيفة الإضافية، كمان يفضل إنهم متكنونش بدوام كامل ويا حبذا لو كانت من البيت.

• قبل ما تفكر تشتغل في وظيفة تانية هيأ أمورك في البيت للوظيفة الجديدة، لو عندك التزامات في الفترة المسائية اللي هتشتغل فيها حاول تهندلها، ومهم تقعد مع زوجتك – لو متجوز -وتفهمها متطلبات المرحلة الجديدة؛ عشان الوضع ده ميسببلكش مشاكل أسرية!

• خصص وقت مناسب وكافي للانتقال ما بين الوظيفتين وحط في اعتبارك ظروف المواصلات في مصر يعني تدي لنفسك براح كده، ولو كانوا الوظيفتين بدوام كلي راعي إنهم يكونوا في مكانين قريبين من بعض، ويستحسن لو كان بيتك في النص وتعدي تاخد شاور وتغيّر هدومك، ده هيجدد نشاطتك.

• يفضل إن الوظيفتين ميكونوش وظايف مكتبية يعني واحدة تكون بتتحرك فيها وواحدة تكون مكتبية عشان تحافظ على صحتك البدنية قدر الإمكان ولو معرفتش تعمل كده ولقيت نفسك مضطر تشتغل في وظيفتين بتقعد فيهم على المكتب فلازم تتحرك من مكانك كل 45 دقيقة.

• معني إنك بتشتغل في وظيفتين فانت ليك اتنين من المديرين ومواعيد ثابته لكل واحدة، فلازم تبقي صريح مع مدرينك ومعرفهم ظروفك عشان ممكن ميتنج متعرفش تحضره أو تتأخر شوية في المواصلات وبالتالي يراعوا ظروفك.

• حاول كل فترة تاخد إجازة -غير الاجازات الثابته -واخرج مع عيلتك أو صحابك عشان تحافظ على الـــــ Work life balance ومتحسش بملل وخليك حريص إنك تبلغ مديرينك بمواعيد إجازاتك قبلها بفترة وتخلص التزاماتك في الشغل.

• أكتر حاجة ممكن تنساها لو بتشتغل في وظيفتين هي موضوع الأكل، انت هتبذل مجهود كبير فلازم يقابل ده تغذية كويسة عشان متحسش بهبوط، ممكن تاخد معاك وجبتين من البيت مثلًا واحدة لكل وظيفة.

• لازم يوميًا تنام من 6 لـــ 8 ساعات متواصلين عشان تقدر تكون بكامل تركيزك لحد نهاية اليوم.

بشكل عام الشغل في وظيفتين مع بعض له مزايا كتيرة -زي ما اتكلمنا في البوست اللي فات -وعلى الرغم من إن الجمع بينهم ممكن يكون صعب بس مش مستحيل، بدليل إن فيه ناس بتقدر تجمع بين وظيفتين وتلاته كمان وبتتأقلم على الوضع ده بشكل جيد، الموضوع كله محتاج دقة وصبر وتنظيم وقت.