كتير بيواجه رواد الأعمال فترات بيكونوا فيها مضغوطين ومتوترين جداً ؛ بس الكلام ده بيختفي لوحده بشكل تلقائي، لكن للأسف لما الحالة دي بتطول بتأثر بشكل سلبي على أداء الشغل ودا طبعاً بيأدي إنهم يفقدوا تركيزهم وبالتالي ظهور أخطاء في الشغل.

نصائح للحفاظ علي تركيزك

أهم حاجة إنك لازم تبقى عارف إنك مش أله او ماكينة ومهما كانت مهارتك أو خبرتك مستحيل إنك تعمل كل حاجة في وقت واحد، وبالتالي أفضل تقدر تتعامل بيها مع ضغط الشغل وهى إنك تعيد ترتيب أمورك حسب أهميتها وبالتالي لازم تعمل قائمة بأولوياتك.

خلينا معاك إن أغلب الأمور عند أصحاب البيزنس بيعتبروها أولوية أولى، لكن ممكن يتم تقسيمها بصورة بسيطة لـ 3 أولويات الأولى هى أسرتك واحتياجاتها، الثانية الشغل، أما الثالثة فهى إنت واحتياجاتك.

خلينا دلوقتي نقول إزاي تحافظ على تركيزك تحت الضغط:

- النصيحة الأشهر هى انك تعمل خطة لليوم بتاعك هيمشي ازاي وتقسمة على 3 أقسام زي ما قولنا، خد بالك إنك لو اشتغلت 8 أو 10 أو حتى 12 ساعة فانت ممكن تكون كسبت في جزئية الشغل لكن خسرت في الجزئين الباقيين اللي هما أسرتك ونفسك اللي ليها إحتياجات إنت ما بتلبيهاش وبالتالي هيحطوا عليك ضغط اللي هيأثر في النهاية على شغلك

- إحساس الضغط بيجي إزاي؟ بيجيلك لما يجيلك شعور بالذعر لما تحس إنك في حاجات كتير عايز تخلصها لكن مفيش وقت ؛ فيبدأ تركيزك يختفي وتبدأ تغلط وترجع تصلح غلطك .. وهكذا فتلاقي نفسك مخنوق ومضغوط، وهنا بنرجع لنقطة تقسيم المهام لأنها بتساعدك إنك تقدر تحدد وقت معين لكل مهمة وهياخد منك شغل قد إيه.

- دايما حاول تبعد عن المقاطعات لأنها بتخلي يومك طويل ومع كتر إن حد يقاطعك بتلاقي حبل أفكارك وتركيزك بيتقطع وبيبقى في صعوبة إنك ترجع توصلة من جديد، بقدر الإمكان لازم تبقى مظبط مواعيد تليفوناتك والرد على الرسائل والاجتماعات على مدار اليوم.

- من أسس نجاح المديرين والقادة إنهم عندهم قدرة على السيطرة على مشاعرهم وقت الغضب أو الإحباط وبالتالي بيكون عندهم قدرة على إستعادة تفكيرهم بسرعة، لو دخلت في موود الخنقة أو الغضب إعمل التمرين (غمض عينيك وتخيل شيئ أو مكان إنت بتحبة زي بحر مثلاً، وبعد كده خد نفس طويل وخرجه بشكل بطيء)، وكرر التمرين ده لمدة 5 دقائق متواصلة.

- حاول تغير شكل المكتب بتاعك كل فترة علشان تتفادى الشعور بالملل زي مثلا إنك تحط صورة على المكتب أو فازة فيها ورد أو أي لمسة تضيف شكل جمالي ونوع من التغيير.