دايما بنسمع إننا عشان ننجح لازم نحدد أهدافنا، ونبقى عارفين كويس عايزين نعمل إيه، بس كتير مننا رغم إنه ممكن يقعد بالورقة والقلم، ويحدد أهدافه وكمان آلية تحقيقها، إلا إنه بعد فترة بيبدأ يفقد الاهتمام ويلاقي حماسه قل، أو يلاقي نفسه بيحبط ويستسلم مع أول تحدي يواجهه...

طيب إزاي أقدر لوحدي ومن غير الاعتماد على حد إني أحفز نفسي عشان أحقق أهدافي؟ هنقترح عليكوا مجموعة آليات تقدر إنك تطبقها عشان تحفز نفسك، وتحافظ على حماسك، وماتتراجعش في نص الرحلة، وتفضل مكمل لحد ما تحقق أهدافك.

- استفد من تجاربك الفاشلة:

طبيعي إن بعض محاولاتك يكون مصيرها الفشل، حتى أكبر العلماء والمخترعين وأنجح رجال الأعمال حصل معاهم كده، والصح هنا إنك بدل ما تقعد تحسس نفسك بالإحباط واليأس، فكر في سبب الفشل، وهو ده الدرس المستفاد إلي هيكون سبب نجاحك في المحاولة الجاية، ده غير إن التجارب الكتير سواء الناجحة أو الفاشلة بتخليك تتعلم وتكسب مهارات جديدة وتطور من نفسك.

- اوعى تبطل تتعلم:

التعليم ده عملية مستمرة، عمرها ما بتوقف أول ما تخلص مدرسة أو جامعة، أيا كان المجال اللي بتشتغل فيه لازم تكمل قراءة وتتعلم كل جديد وتطور نفسك باستمرار، كل ده هيعلمك ويحفزك إنك تكمل عشان توصل للي بتحلم بيه.

- حفّز نفسك بكلام إيجابي:

صدق أو لا تصدق.. واحد من أهم آليات التحفيز هو إنك تكلم نفسك كلام إيجابي: أنا ناجح..أنا أقدر..أنا هوصل، تكرار الكلام ده على نفسك طول الوقت هيخليه يثبت في عقلك، وهتتصرف كانسان ناجح، وبالتالي هتفضل متحفز وكلك حماس إنك تنجح بجد.

- افتكر دايما رسالتك في الحياة:

رسالة أي انسان في الحياة هي الهدف الرئيسي اللي بيسعى لتحقيقه، وعشان الهدف ده يبقى هو الحافز اللي مخليك تكمل، اكتبه في ورقة وعلقها في مكان بتشوفه كل يوم، الورقة ديه هتفكرك بالسبب إلي مخليك تجتهد وتشتغل كل يوم.

- اقرا قصص الناجحين:

لما تتعب وتفقد حماسك، وتبدأ تحس إنك مش قادر تكمل، اقرا قصص الناس إلي نجحت قبلك وبالذات في نفس المجال بتاعك، هيكون لده تأثير كبير في تحفيزك وزيادة حماسك عشان تكمل، لأنك هتلاقي ناس واجهت صعوبات زيك، وجربت وفشلت، بس لما كملت نجحت.

- اقرا كتب تحفزك:

فيه مجموعة كتب كده ما ينفعش تقراها وتفضل محبط، أو مستسلم قدام أي تحدي يواجهك، لما تحس إن حماسك قل ارجع للكتب ديه واقراها، وخلينا هنا نرشحلك مجموعة منها زي: قوة الآن (The Power of Now)، الحياة المنطلقة نحو الهدف (the purpose driven life):، السر (The Secret):، العادات السبع للناس الأكثر فعالية (The 7 Habits of Highly Effective People):، قوة التفكير الإيجابي (The Power of Positive Thinking):.

- افتكر دايما إنجازاتك:

أحد الطرق إلي تقومك من جديد إنك تفتكر إلي حققته، لما تفكر تستسلم اقعد بورقة وقلم واكتب كل إلي حققته وكان في يوم من الأيام مجرد حلم، هتحس قد إيه إنت قوي وهتقدر تكمل.

وفي النهاية لازم تعرف إن أساس النجاح بيبدأ بوضوح الهدف وقوة الإرادة، لأنك لو مش محدد هدف هتوه في الطريق، ولو إرادتك مش قوية مش هتقدر تصمد كتير.