إزاي تحول فكرتك لمشروع قائم!

10 خطوات لتحويل فكرتك لمشروع قائم
أكتر سؤال بيجيلنا يومياَ هو ازاي أبدأ مشروعي؟ عندي فكرة مشروع معين ومش عارف أبدأ إزاي؟ وغيرهم من الاسئلة المتعلقة بنفس الموضوع علشان كده قررنا نعمل بوست مخصوص عن " إزاي تبدأ شركتك وتحولها من مجرد فكرة إلى شركة على أرض الواقع"

1-حدد هدفك.
اسأل نفسك انت محتاج تعمل مشروع ليه؟ إيه الغرض من مشروعك؟ هل الغرض من كده إن يكون ليك مشروع خاص لتحسين مستوى معيشتك؟ ولا علشان تكون رجل أعمال على المدى البعيد؟ ولا لتقديم خدمة معينة؟ 
بمجرد ما تحدد الهدف من مشروعك لازم تسأل نفسك الأسئلة اللى جاية علشان تعرف هتبتدي منين؟
- إيه هي المهارات إللي عندك علشان تعرف تدير مشروع بالكامل؟
- إيه المجال إللي عندك خبرة فيه؟
- هتصرف على مشروعك إزاي؟ 
- رأس المال إللي محتاجه قد إيه؟
بمجرد ما تجاوب على الأسئلة دى هتكون عرفت ايه هى الحاجة اللى انت متميز فيها وايه هو المجال اللى هتقدر تشتغل فيه.
2- جمع أفكار!
لو ماعندكش فكرة للمشروع ومحتار تعمل مشروع إيه؟ شوف ايه هي المشاريع إللي السوق محتاجها، بلاش تختار مشروع موجود ومنتشر، خلي عندك نظرة مستقبلية وشوف العالم رايح على فين؟ وإيه أكتر المجالات إللي مطلوبة مستقبلاً؟ ومن هنا اختار المشروع اللي هتعمله.
3- اختار اسم البيزنس.
من الضروري انك تختار اسم البيزنس بتاعك بعناية ويفضل إنه يكون سهل، ويكون ملائم مع اللي بتقدمه علشان يكون سهل على العملاء إنهم يحفظوه ويعرفوه بسرعة، وانت بتختار اسم البراند لازم تتحقق الأول من تواجد الاسم وان مافيش براند تاني واخد الاسم ده.
4-اعمل بحث تسويقي.
ضروري جداً إنك تعمل بحث تسويقي وتشوف السوق محتاج إيه ؟ والمنافسين بيقدموا ايه ؟ ماينفعش تنزل بمنتج أو بخدمة يكون السوق متشبع بيها، اختار منتج أو خدمة تكون ناقصة في السوق وفعلاً الناس محتاجينها.
5-اعمل خطة عمل.
خطة العمل ببساطة عبارة عن وصف مكتوب لكيفية تطوير عمل و تطوير مشروعك من البداية إلى النهاية، بمعنى إنك تكتب كل حاجة انت هتعملها وعايز تحققها في المشروع زي :
- استراتيجيات السوق.
- السوق المستهدف.
- إزاي هتبيع منتجك بأفضل سعر في السوق.
- تحديد الأهداف.
- كيفية تحقيق الأهداف.
- تحديد نقاط القوة والضعف عند المنافسين.
6- تحديد مصدر التمويل.
من النقاط المهمة جداً إنك تحدد مصدر تمويل مشروعك ماينفعش تاخد قرار انك هاتعمل مشروع وماتكونش محدد مصدر التمويل إللي هتصرف بيه على مشروعك ، مصادر التمويل إللي ممكن تستعين بيها كتير زي :
- التمويل ذاتي. 
- التمويل من الأصدقاء أو الأقارب " ومش بننصح بيه لان من الصعب فصل العمل عن العلاقات الشخصية.
- طلب قرض.
- البحث عن شريك.
- اختيار مصدر التمويل المناسب ليك.
7-ابدأ في بناء فريقك.
في بداية المشروع انت ممكن تدير مشروعك بعدد أفراد قليل، لكن بعد وقت معين هتحتاج إنك تكبر الفريق بتاعك لأن بالتأكيد المسئوليات هتكتر ووقتها مهم جداً إنك تختار فريق العمل بعناية ويكونوا على دراية كاملة بمشروعك وعندهم خبرة كافية في مجال مشروعك.
8- تحديد المكان.
المقصود من تحديد المكان هو هل المشروع بتاعك هايكون أونلاين ولا على أرض الواقع ولا الاتنين، وفي الحالة دي بتحدد إيه أكتر حاجة مناسبة للمشروع بتاعك.
9- سجل مشروعك.
علشان تكون كيان تجاري رسمي لازم تسجل مشروعك في الحكومة من خلال طلب قيد فى السجل التجارى.
10- الإعلان عن مشروعك.
بمجرد بدء نشاطك التجاري بتبدأ إنك تعمل إعلانات عن مشروعك علشان الناس تعرفك، وتوصل إلى أكبر قاعدة من العملاء المهتمين بالمنتج أو الخدمة بتاعتك.