FB Instagram Twitter Youtube Linkedin إزاي تسيطر على "عم ضياء" اللي شغال معاك؟ | أكاديمية اعمل بيزنس
 
الرجوع الى المدونة

إزاي تسيطر على "عم ضياء" اللي شغال معاك؟

إزاي تسيطر على

 

 
الموظف "العم ضياء" في نفسه بقي موجود دلوقتي في كل الشركات تقريبا، أنت نفسك لو لفيت بكرسي المكتب بتاعك كده غالبا هاتعرف انا بتكلم على مين، أيوه هو الموظف الكئيب اللي مسودها في وشك وكاره الشغل باللي فيه وعمال يتكلم على ده ويقطع في فروة ده، تحس كده إنه بيشفط الهوا النقي في أي مكان يدخله وبينشر بداله طاقة سلبية تجبلك أنفلونزا الإحباط انت وزمايلك في الشغل.
 
الموظف اللي من النوع ده هتلاقيه كمان نازل بأوبشنز سلوكيات متعددة المهام كلها مخربة وسامة للي حواليه، زي إنك تلاقيه بيشع إحباط وكراهية للي حواليه، أو بيتكلم في ضهر زمايله وبيطعن فيهم، أو عمال ينشر في إشاعات ويتكلم في حاجات ملهاش لازمة طول الوقت أو إنه يقعد يقلل من شغل اللي حواليه ويحبط فيهم، وسبحان الله أول ما يجي يتكلم عن شغله تلاقيه فجأة بقي ولا محمد رمضان وهو واقف في الساحة لوحده  .
 
الحقيقة إن التأثير السلبي للموظف عم ضياء أو السام على الشركات دلوقتي بقي للأسف أكتر بكتير من زمان، وده لأن أغلب الشركات دلوقتي بتحاول تعتمد في شغلها على العمل الجماعي والتعاون بين أفراد فرق العمل بطريقة فعالة، ووجود موظف بينشر أفكار سامة ومحبطة أو بيروج لإشاعات تقلب الموظفين على بعضهم أو تخليهم مش حابين بعض، ده في النهاية هيسبب ضرر كبير على الشركة ككل.
 
وبما إن الوقاية خير من العلاج فبيبقى من الأفضل ليك كمدير هو إنك تتفادي تضم لفريق عملك موظف من النوع ده، لأن غالبا النوع ده من الموظفين مش بيخالف بشكل واضح أي لائحة أو قانون موجود في الشغل، ده غير إنه ممكن يبقى شاطر في شغله وبالتالي مش بيبقى من السهل رفده إلا لما الكل يتفق على كده في حالة لو تجاوز الحدود بشكل كبير، وعشان كده بدل ما تحاول ترفده هنقولك على بعض النصايح اللي ممكن تخليك تعرف تتعامل معاه بطريقة تفيد الشغل:
 
• اتناقش معاه بطريقة مباشرة وصريحة: ممكن يكون الموظف ده مش مدرك لمدى تأثير سلوكه السام على الآخرين، عشان كده من المهم جدا إنك تحاول تقدمله الرأي والتقييم صادق لسلوكياته بطريقة تفهمه المشكلة وتوضحله السلوك اللي انت عايزه يتسم بيه وتخليه عنده فرصة يمكن يعرف يتغير بشكل إيجابي.
 
• اشرحله العواقب: في بعض الشخصيات مبتمشيش صح إلا لما تستخدم معاهم أسلوب الترهيب، ولو حسيت إن في موظف عندك مش عايز يغير من سلوكياته المحبطة للي حواليه، ابتدي دور على أكتر الحاجات اللي بتهمه في الشغل سواء كانت مزايا خاصة أو مكافئة مالية أو ترقية محتملة منتظرها وخليه يحس إنها هتروح منه، وفي الغالب هتلاقيه ابتدى يتصرف بشكل إيجابي.
 
• وثق كل حاجة بتحصل: لو وصلت لنتيجة إنك لازم تطرد الموظف ده، فلازم أول حاجة تعملها إنك توثق كل الإساءات والسلوكيات السامة اللي كان بينشرها ووثق كمان كل الخطوات اللي خدتها معاه والحلول اللي حاولت تقدمهاله ومستجبش ليها، وده هيكون من خلال الشكاوى الرسمية فيه منك أو من زملائه ومراجعات الأداء اللي اتعملت له وكل ده عشان توضح للموظف أسباب طرده بطريقة محددة.
 
• اعزله عن بقية الفريق: ممكن يبقى الموظف ده شاطر في شغله ومش متاح ليك إنك تمشيه من عندك في الوقت الحالي وفي نفس الوقت مينفعش لسلوكياته السامة دي إنها تستمر لأنها ممكن تبقى عدوى تنتشر بين زمايله كمان وبيبقى الحل الأفضل في الحالة دي إنك تحاول تفصله عن بقية زمايله بقدر الإمكان، زي إنك تعيد ترتيب أماكن جلوسهم في المكتب أو تقلل عدد الاجتماعات اللي بيعملوها مع بعض وممكن تشجعه على إنه يزود من فترات شغله من البيت.
 
• اوعى تركز معاه وتنسى نفسك: متحاولش تستهلك نفسك ووقتك في إدارتك للموظف السام بالطريقة اللي تخليك تهمل من بقية أولوياتك ومسئولياتك التانية واللي ممكن تكون أهم، وعشان كده حاول دايما يبقى حواليك أشخاص إيجابيين وداعمين ليك يبقوا زي المضاد الحيوي اللي هتقضي بيه على إنفلونزا الإحباط اللي الموظف ده ممكن يسببها ليك ولزمايله في الشغل.
 
إحنا مش عايزين نبقى محبطين زي الموظفين اللي عمالين نتكلم عليهم بس في الحقيقة لازم تتقبل حوار إن في بعض الأشخاص مش هاتعرف تغيرهم سواء بسبب إنهم مش "عارفين" يتغيروا أو مش "عايزين" يتغيروا لأنهم حاسين إنهم يقدروا يعملوا أي حاجة من غير ما يتم حسابهم، ولو النوع ده من الموظفين السامين عندك منه بننصحك تستخدم المصل المناسب للسم بتاعه سواء بمجازاته أو حتى طرده في النهاية.

شارك المقال :