920033973
16342
article

إزاي تطلب زيادة في المرتب؟

May 20, 2019    

الطريقة المثالية لطلب زيادة المرتب

 

"الموظف: صباح الخير كنت عايز أتكلم مع حضرتك في موضوع مهم.

المدير: اتفضل.

الموظف: بقالي فترة بشتغل في الشركة وأثبت نفسي وخدت خبرة كبيرة، وبقيتوا بتعتمدوا عليه بشكل أساسي، أنا شايف إني أستحق إن مرتبي يزيد.

المدير: صعب، مش دلوقتي، إنت لسه محتاج تتعلم حاجات كتير قبل ما تطلب زيادة المرتب بتاعك."

.........................

السيناريو ده تقريبا ما فيش حد بيشتغل مامرش بيه في فترة من حياته، لكن المشكلة هنا مش قصة إنت تستحق الزيادة فعلا ولا لأ، لأن ده مش موضوعنا، إحنا هنتكلم في بوست النهاردة عن الموظف المجتهد إلي يستحق فعلا زيادة مرتبه، وإزاي بقى يقدر يطلب الزيادة ديه بالطريقة المثالية إلي تخليه ياخد إلي هو عايزه وإلي هو يستحقه:

 

1- اعرض أهدافك واطلب تقييم مديرك:

لو إنت في نفس منصبك أو شغلك لمدة 6 شهور أو أكتر، اقعد قاعدة ودية مع مديرك، كلمه عن شغلك وعن أهدافك في الفترة الجاية، وعايز تتعلم إيه وتتقدم في شغلك إزاي.

ماتكتفيش إنك تعرض إلي عندك، اطلب كمان من مديرك يقّيم أدائك وشغلك، واسأله عن نصايحه ليك في الحاجات إلي هتخليك أحسن، وشوف هو محتاج منك تتعلم أو تطور نفسك في إيه؟ .. ونفذ إلي قالوا مديرك بالظبط.

 

2. اتحّمل مسئوليات زيادة في الشغل:

الأول.. اتمكن كويس قوي من الشغل والمسئوليات بتاعتك دلوقتي، وبعدين إبدأ حل المشكلات وساهم في الدور إلي عايز تتحمله في المستقبل، ومرتبك يزيد عشانه، وعشان تقدر تعمل ده لازم تدير وقتك صح وتخطط ليه كويس قوي.

 

3- اعرض إنجازاتك باستمرار:

سّبق انت.. بشكل بسيط ومن غير مبالغة استغل الفرص وبّين إنجازاتك في الشغل، عشان لما يجي الوقت إلي هتطلب فيه الزيادة في مرتبك، مديرك هيبقى بالفعل جواه القناعة إنك تستحق، والقناعة ديه هتكون اترسخت جواه مع الوقت عشان كل شوية يظهر قدامه إنجاز من إنجازاتك في الشغل.

 

4- ركز على سبب استحقاقك للزيادة، مش سبب احتياجك ليها:

قبل ما تقنع رئيسك إنك تستحق الزيادة، لازم إنت من جواك تبقى مقتنع إنك تستاهلها بجد، ولما تبقى مصدق ده هتلاقي نفسك وإنت بتطلب الزيادة بتتكلم عن أسباب إنك تستاهل الزيادة، مش أسباب إنك محتاج لفلوس زيادة في حياتك بشكل عام عشان الدنيا غليت والمصاريف بقت كتير.

يعني طلبك للزيادة يبقى عشان أدائك مش عشان احتياجك للفلوس.

 

5- توّقع مديرك هيسألك عن إيه، واتدرب على الإجابات:

اقعد مع نفسك واتخيل إنك بتطلب من مديرك الزيادة في المرتب، وتخيل ممكن يقولك إيه ويسألك عن إيه في شغلك وإنجازاتك، واتدرب على الإجابات إلي هترد بيها.

هتلاقي إنك ساعة المناقشة الفعلية مع المدير هتتكلم بشكل أفضل وبسلاسة نتيجة التدريب إلي عملته.

 

6- ادرس سوق التخصص بتاعك عشان تحدد الزيادة بدقة:

ما ينفعش تروح تطلب من مديرك زيادة المرتب، وتحدد الرقم جزافا كده، لأنك في الحالة ديه يا إما هتبالغ في الرقم وأكيد طلبك هيترفض وقتها، أو هتطلب رقم قليل وساعتها هتبقى أخدت أقل من حقك.

قبل ما تحدد الزيادة إلي إنت عايزها تبقى سألت ودرست سوق العمل الخاص بالتخصص بتاعك، وعرفت متوسط مرتب حد في سنك وخبرتك قد إيه.

 

7- اتكلم عن خططك المستقبلية:

وانت بتطلب الزيادة وضّح لمديرك خططك المستقلبية، واشرح هتقدر تساهم بإيه وتطور الشغل إزاي، وإيه المسئوليات الإضافية إلي إنت مستعد تتحملها في المستقبل.

 

8- أسلوب الطلب:

رتب كلامك وإنت بتطلب الزيادة، خليك هادي ونبرتك صوتك مش عالية، ابدأ بكلام إيجابي عن المدير والشركة، وبعدين اعرض الطلب بتاعك.

في النهاية لازم تكون مستعد تسمع كلمة " لأ" كرد على طلبك بزيادة المرتب بتاعك، والأهم إنك ماتعتبرش ده نهاية لمفاوضاتك.

لو طلبك اترفض اطلب تقييم أداء ليك، مع الاتفاق على مدة معينة وأهداف محدودة مطلوب تنجح في تحقيقها، وبعد ما تعمل ده وتحقق المطلوب منك هيكون جه معاد الجولة التانية من المفاوضات.

خصم 50% عند الإشتراك في أكاديمية إعمل بيزنس


مقالات مشابهة

المزيد
أحيانا.. الاستقالة
أحيانا.. الاستقالة "شر لابد منه"

"الحمدلله الذي بنعمته تتم الصالحات... أنا استقلت

الأكثر قراءة

المزيد
كيف تصطاد الموظف العصفورة
كيف تصطاد الموظف العصفورة

الموظف العصفورة هو نوع من الموظفين تكاد أي بيئة عمل لا

ادخر بذكاء: تعرف على أفضل طرق استثمار المدخرات الشخصية 
ادخر بذكاء: تعرف على أفضل طرق استثمار المدخرات الشخصية 

لم يعد الراتب الشخصي كافيًا ليغطي تكاليف المعيشة، ومع

دليلك المختصر للوظائف والدورات المطلوبة في سوق العمل 2023
دليلك المختصر للوظائف والدورات المطلوبة في سوق العمل 2023

يمر سوق العمل بالعديد من التقلبات المزلزلة، فبين ليلة

المنافسة الشرسة لما تكون شريفة
المنافسة الشرسة لما تكون شريفة

بمناسبة المنافسة الشرسة لما تكون شريفة .... فى سنة 2007

لماذا يستقيل أفضل الموظفين؟ 
لماذا يستقيل أفضل الموظفين؟ 

شركات كتير بتواجه نفس المشكلة وبشكل متكرر، وهي إن

إزاي تتعامل مع مديرك البطيخه!
إزاي تتعامل مع مديرك البطيخه!

إزاي تتعامل مع مديرك البطيخه! جربت تتعامل مع مدير

اللي بيدير الفلوس اهم من الفلوس
اللي بيدير الفلوس اهم من الفلوس

يوم السبت اللى فات اللى هو أجازة طبعاً كنت عايز أشترى

لا تعطنى سمكة ولكن علمنى الصيد
لا تعطنى سمكة ولكن علمنى الصيد

فاكرين المثل اللى بيقول لا تعطنى سمكة ولكن علمنى

أبل ورؤية ستيف جوبز
أبل ورؤية ستيف جوبز

بمناسبة نزول ال I Phone 6 افتكرت تصريح كان قاله ستيف جوبز