واحد من أعضاء الأكاديمية كان بيناقشنا أثناء واحدة من ورش العمل إنه في كتير من أصحاب البيزنس مبيعرفوش يعملوا Separation - إنفصال - بشكل شيك، للأسف إحنا بنشوف أثناء عملية إنفصال شركات عن بعضها أو إنفصال إتنين شركاء ؛ بتلاقيهم بينفصلوا كأنهم مخطوبين أو متجوزين وانفصلوا وعاملين زي الأعداء ودى مشكلة فى البيزنس خطيرة جدًا.

أكيد مر عليك مورد بيوردلك وطلع غالى أو بيتأخر عليك وخدت قرار إنك توقف التعامل معاه ؛ مش لازم حضرتك تفك الشراكة بخناقة يعني :) ؛ إعمل حسابك إنه ممكن يصلح من نفسه، حتى لو كان شريك ليك حاول تنفصل معاه بشياكة حتى لو كنت مظلوم لأن صورتك وإسمك في السوق هما في الأخر جزء كبير من راس مالك، إعرف إنك لو شتمته أو خاصمته أو حتى إتكلمت عليه وحش حقك مش هيرجعلك.

خلينا ناخد كمان مثال عن الـ Separation أو الإنفصال بس من زاوية تانية، لو إنت موظف فى شركة وجاتلك فرصة إنك تشتغل في مكان تاني ببـ position أفضل حاول تسيب ذكرى كويسة ؛ متمشيش فجأة وتعمل للشركة ربكه ؛ خلي الموضوع يتم بشياكة وإديهم فرصة يعينوا البديل ليك وتسلم شغلك ليه، وإنت ماشي سلم عليهم حتى لو إنت شايف إنك كنت مظلوم أو مش واخد حقك في المكان ده.

أما لو إنت صاحب الشغل أو مدير في شركة وشايف إن فيه موظف مش مناسب حاول وإنت بتمشيه تديله حقه بزيادة وتشجعه وتديله إحساس إن هو مش مناسب للمرحلة دى فى الشركة وانه هيكون مناسب ومتميز في مكان تاني ؛ وياسلام لو قدرت تساعده أو تديله إختيارات للأماكن ممكن يكون فيها أفضل.

الفكرة إنك بتحاول تخفف عليه ضغط الإنفصال وتسيبله صورة حلوة عن الشركة وإنها من أحسن الحاجات اللي حصلتله في حياته وقد إتعلم منها، خد بالك إن ممكن الشخص ده ياخد موضوع الإنفصال دا تحدي ويطور من نفسة ويرجع يشتغل عندك تاني.

لو جيت دورت على أساس المشكلة هتلاقيه إنك مش بتخطط لقدام ومبتكونش حريص على البراند بتاعك اللي هو إسمك في السوق وممكن تقلل منه بتصرفات مش متناسبة معاك، خد بالك إن لو ليك إسم كبير فالسوق فده مش علشان إنت أحسن واحد وبس ؛ لكن علشان في كتير منافسين مش كويسين، فمتعملش تصرف يقلل منك أو من إسم البراند بتاعك.

إزاي تعمل Separation بشياكة

مقالات مشابهة

الأكثر قراءة

الضمير المهني ج1

إزاي تعمل Separation بشياكة