في فرق كبير بين كونك شخص ناجح في شغلك وبتعرف تشتغل كويس وبين إنك تكون مدير مسئول عن فريق مكون من أكثر من فرد وتكون المسؤول عن القرارات اللى بتحدد مسار الشغل.

كيف تكون مدير مبيعات ناجح؟

ديف أندرسون "رجل مبيعات ناجح" كان بيحكي لمندوبين المبيعات اللى كان بيديرهم انه من حوالي 13 سنة تم ترقيته الى مدير مبيعات لإنه كان شاطر جداً في المبيعات وكان بيحقق مبيعات عالية، فكان القرار هو ترقيته لمدير مبيعات، أندرسون لما اترقى أكتشف إنه معندوش أي فكرة عن كيفية التعامل مع الأشخاص على الرغم من إنه رجل مبيعات ناجح، وقتها كان بيدير الموظفين وهو متبع مبدأ التخويف والتسلط والسيطرة بدلاً من مصاحبة الموظفين وتحفيزهم، دلوقتي أندرسون هو أكثر واحد بيعرف يتعامل مع الموظفين وكتب كتاب خاص بالموضوع ده بعنوان " قيادة بلا معنى ".

إللي عايزين نوصله من القصة دي إن مش معنى ان اي حد شاطر في شغله ينفع يكون مديرمبيعات ناجح، في ناس كتير مديرين ولكن ماعندهمش القدرة انهم يتعاملوا مع الموظفين ومحتاجين يتعلموا مهارات كتير و عشان تكون مدير مبيعات ناجح لازم يكون عندك مهارات معينة زي:

1- إدارة التغيير.
المهمة الأكبر والأكثر تحديًا لمدير المبيعات الناجح هي إنك تكون مستعد دايماً لأي تغيير ممكن يحصل يؤثر على الشغل بالسلب، لأن من الوارد جداً أن يحصل حاجة في السوق مينفعش تشتغل معاها بالنظام اللي انت ماشي عليه فهتكون مضطر تغير من نظام شغلك، علشان كده لازم تكون مستعد للتغيير في شكل وأسلوب شغلك في أي وقت.

2- مدير ذو ثقة.
عادةً ممثلى المبيعات مش بيهتموا باللي بيقوله المدير بتاعهم إلا لو كان مصدر ثقة ليهم، علشان كده ضروري جداً إنك تلتزم بأي كلمة بتقولها أو بأي قرار، وفى أكتر من دراسة بتقول إن المديرين إللي دايماً بيغيروا وجهات نظرهم ما بيكونش عندهم مصداقية وبالتالي الموظفين يفقدوا ثقتهم فيهم.

3- الاعتراف بالخطأ.
كونك مدير ده مش مبرر انك ما تعترفش بالأخطاء خصوصاً لو كان الخطأ ده حصل بسببك، من الأحسن إنك تعترف إن فعلاً في غلط حصل وأتحمل المسؤولية كاملة، لان ده هيشجع الموظفين إنهم يعترفوا لو غلطوا في يوم من الأيام.

4- إعطاء ردود الفعل.
كتير من ممثلى المبيعات بيحصلهم إحباط لما مش بيلاقوا أي رد فعل سواء بالإيجاب أو بالسلب عن شغلهم، وده بيوصلهم إحساس أن مجهودهم مش بيظهر، عشان كده من المهام العظيمة لأي مدير ناجح إنه دايماً يشجع الموظفين من خلال انه يعبر للموظفين عن رأيه فى الشغل وبكده هيحسوا انهم متقدرين وإن جهدهم واضح.

5- بناء الحماس.
الرئيس التنفيذي لشركة All Copy Products ، زود إيرادات الشركة من 1.2 مليون دولار إلى 11 مليون دولار خلال الـ 3 سنين إللي قضاها في منصبه بيقول لو عايز تحقق أكبر النتائج اخلق جو من الحماس في شركتك، اعمل كل فترة مسابقات مثلاً وإللي هيحقق نتائج معينة هيكون ليه هدية مادية أو معنوية، وبالتالي الاسلوب ده هيخلي الموظفين عندهم حماس إنهم يشتغلوا اكتر وكمان هيخلق روح المنافسة بين الموظفين في الشركة.

6-تطوير فريقك.
المدير الشاطر هو اللى بيطور من الموظفين ويعرفهم دايماَ ايه الجديد وكمان يعرفهم أفضل الأساليب اللى يطوروا بيها نفسهم ويطوروا بيها شغلهم، أندرسون قال حاجة مهمة جداً في النقطة دي ، قال ما تخليش الموظفين يطوروا نفسهم بالصدفة، اعملهم خطة منظمة لتطويرهم وشوف مقياس نجاحهم قبل وبعد علشان يحسوا بدورك فى المسار الوظيفى بتاعهم.