920033973
16342
article

إلغاء الدولار الجمركي

September 04, 2019    

فاكر اللي حصل بعد قرار تعويم الجنيه وحالة الفوضى اللي شوفناها في أسعار السلع؟! الفترة دي كان عادي جدًا فيها تشوف نفس المنتج بأكتر من سعر عند أكتر من تاجر، ومنتجات سعرها بيزيد أضعاف قيمتها الحقيقية، لإن ببساطة سعر الدولار كان متذبذب وبيختلف من يوم للتاني، وده صعب على صاحب أي بيزنس إنه يسعر منتجاته، عشان كده ظهر قرار العمل بالدولار الجمركي.

بيعمل إيه الدولار الجمركي ده؟!

قرار استخدام الدولار الجمركي كان هدفه ببساطة ضبط أسعار السلع المستوردة، خاصة وإنه بيحدد قيمة الجمارك المفروضة على السلع دي وبالتالي التحكم في قيمتها في السوق، ولإن قيمته في البداية كانت بتتحدد شهريًا قبل ما يتم وضع قيمة ثابتة ليه عند 16 جنيه، فده خلى المنتجات المستوردة، وخاصة المنتجات الأساسية، متتأثرش بدرجة التذبذب الكبيرة اللي مر بيها سعر صرف الدولار الحر في الفترة دي، والنتيجة كانت استقرار الأسواق.

بمرور الوقت، ومع زيادة استقرار الأسواق، قررت وزارة المالية في ديسمبر اللي فات إنها تلغي الاعتماد على الدولار الجمركي مع المنتجات الترفيهية، قبل ما تقرر يوم الأحد اللي فات إنها تلغي الاعتماد عليه تمامًا، طب ليه ما إحنا كنا كويسين! الحكومة بتقول: ما إحنا لسه كويسين برده... تعالى وأنا أقولك إزاي!
بعد التعويم، سعر الدولار كان متذبذب، مكنش ليه كلمة ثابتة وكل يوم بسعر، وكمان نسبة التضخم كانت مرتفعة، ولكن مع قرارات الإصلاح الاقتصادي، الدولار قيمته نزلت وبقت قريبه من سعر الدولار الجمركي "سعر صرف الدولار الحر النهاردة وصل لـ16.6 جنيه مقابل 16 جنيه للدولار الجمركي"، وبالتالي مبقاش فيه داعي للاستمرار في أي "قرارات استثنائية" زي استخدام الدولار الجمركي، وكمان الوزارة ببساطة كانت عاوزه توفر الدعم اللي بتحطه على الدولار الجمركي عشان يقدر يتوافق مع سعر الدولار العادي في التعاملات.

الكلام ده فعلًا سليم، ولكن زيه زي أي قرار اقتصادي، وارد يكون لإلغاء الدولار الجمركي إيجابيات أو سلبيات على صاحب أي بيزنس أو مستهلك، وده اللي هنوضحهولك في اللي جاي:
- السلبيات:

• لف وإرجع تاني؟!
فاكر اللي أصحاب البيزنس كانوا بيشتكوا منه في البداية من ناحية إنهم مش قادرين يسعروا منتجاتهم بسبب تذبذب سعر الدولار بعد التعويم؟ هنشوف ده بيحصل من تاني، لأن القرار ده هيرجع يحط السلع المستوردة تحت رحمة التغير اللي ممكن يحصل لسعر صرف الدولار، سواء التغير ده كان بالزيادة أو بالنقصان.
بالإضافة لكده، لو مفيش رقابة كافية على السوق، فده هيساعد اللي بيقدم منتج ملوش بديل إنه يستغل إمكانية حدوث التذبذب ده من تاني في إنه يتحكم في سعر المنتج ده، ويرفعه بالطريقة اللي هو عاوزها، وده اللي هيأثر بالسلب على المستهلك من الناحية التانية، وممكن يرفع معدلات التضخم من جديد.

• خسارة الـ"Market share": 
تخيل معايا كده، لو في سلعة لقيت سعرها ارتفع، ممكن تعمل إيه؟
نتيجة لإن مختلف السلع أسعارها بقت في السما، فأي مستهلك بقى بيدور دلوقتي على السلعة الأرخص اللي هتقدر إنها توفرله احتياجاته، حتى ولو جودتها كانت أقل بشكل بسيط. 
الموضوع ده أكيد هيأثر بالسلب على صاحب أي بيزنس المنتج بتاعه بيعتمد على مواد خام أو مستلزمات إنتاج مستوردة، لإنه هيكون مضطر يزود من سعر منتجه، حتى ولو بنسبة ضئيلة مش هتتجاوز الـ5% دلوقتي ووارد تزيد قدام لو سعر الدولار ارتفع، عشان يقدر يوازن ما بين الزيادة دي وبين الأرباح اللي عاوز يحققها.

كمان هيحطه في منافسة مش متوازنة قدام بيزنس تاني ممكن يكون اشترى المواد والمستلزمات دي بسعر الدولار الجمركي قبل إلغاءه، وبالتالي هيقدم المنتج بتاعه بسعر أرخص وهيخلي صاحب البيزنس اللي فوق ده يخسر زبونه. 
كل ده طبعًا في حالة السلعة اللي ليها بديل، طب بالنسبة للي ملهاش بديل، زي الخشب مثلًا؟!
محسن التاجوري، نائب رئيس الشعبة العامة للمستوردين في الاتحاد العام للغرف التجارية، قال في تصريحات لموقع "مصراوي"، إن إلغاء الدولار الجمركي هيضر بالمنتجات دي، لإنه وارد يرفع من سعرها وبالتالي هيزود من حالة الركود اللي بتمر بيها من ساعة التعويم، وده اللي هيضطر المستثمرين فيها إنهم يدوروا على استثمارات بديلة يكون فيها حالة نشاط عشان يقدروا يحققوا العائد من الاستثمار اللي عاوزين يوصلوله.
القرار ده مش كله سلبيات، في إيجابيات كتير ممكن منكونش شايفنها وممكن نستغلها في البيزنس بتاعنا مستقبلًا، زي:

• انخفاض قيمة المواد الخام = تقليل قيمة المنتج = زيادة المبيعات
السلع المستوردة لما تبقى تحت رحمة سعر صرف الدولار العادي مش دايمًا حاجة سلبية، لإنه زي ما هيرفع من سعر مواد الخام ومستلزمات الإنتاج بارتفاع الدولار، فهي ممكن برده تقل بانخفاضه، وده اللي هيشجع صاحب البيزنس إنه يقلل من سعر المنتج بتاعه، وبالتالي يزود مبيعاته، خاصة لو سعر الدولار قل خلال الفترة الجاية عن أخر سعر للدولار الجمركي "16 جنيه".

• ميزة تنافسية:
إلغاء الدولار الجمركي هيرفع من أسعار المنتجات المستوردة في السوق خلال الفترة الجاية حتى ولو بنسبة ضئيلة، وبالتالي زي ما قولنا، المستهلك هيضطر يدور على منتج محلي سعره أرخص... وهنا هتيجي فرصتك!
لو بتعتمد على مواد خام ومستلزمات تصنيع محلية، ساعتها القرار ده مش هيأثر على سعر منتجك، وبالتالي ده هيديك ميزة تنافسية قدام المنتجات المستوردة، لإنه هيجذب ليك المستهلك اللي بيدور على منتج سعره أقل، وبالتالي هيزود من مبيعاتك.
الخلاصة، إلغاء الدولار الجمركي سلاح ذو حدين لأي بيزنس بيعتمد على مواد خام مستوردة، لإن تأثيره على البيزنس ده بالسلب أو بالإيجاب بقت تحت رحمة استقرار سعر صرف الدولار، ولكن في النفس الوقت هيساعد على جذب انتباه المستهلك للمنتج المحلي، لإنه ببساطة هيبقى المنتج الأرخص الموجود في السوق.

 


مقالات مشابهة

المزيد
تعويم الذهب والدولار والجنية - ج17
تعويم الذهب والدولار والجنية - ج17

- علشان فيه ناس كتير سألوني عن وجهة نظري عن إتجاه

تعويم الذهب والدولار والجنية - ج16
تعويم الذهب والدولار والجنية - ج16

أولاً أنا شخص متفائل جداً فياريت بلاش حد يقوللي إنت

تعويم الذهب والدولار والجنية - ج15
تعويم الذهب والدولار والجنية - ج15

اتفقنا قبل كده إننا نراقب موضوع تعويم الجنيه بدون أخذ

تعويم الذهب والدولار والجنية - ج14
تعويم الذهب والدولار والجنية - ج14

مبدئياً لازم نأكد إننا صفحة لتعليم الإدارة والإستثمار

الأكثر قراءة

المزيد
تعويم الذهب والدولار والجنية - ج1
تعويم الذهب والدولار والجنية - ج1

هل إنخفاض سعر الجنيه كويس لأصحاب الأعمال ولا لأ ؟

تعويم الذهب والدولار والجنية - ج2
تعويم الذهب والدولار والجنية - ج2

عندي كام نقطه عايز أقولها في ظل مناقشة موضوع الدولار

تعويم الذهب والدولار والجنية - ج5
تعويم الذهب والدولار والجنية - ج5

أهم ميزة من مميزات مصر اللي لازم أي حد بيعمل بيزنس ياخد

تعويم الذهب والدولار والجنية - ج10
تعويم الذهب والدولار والجنية - ج10

ممكن يكون ده آخر موضوع نتكلم فيه عن الدولار والدهب

تعويم الذهب والدولار والجنية - ج15
تعويم الذهب والدولار والجنية - ج15

اتفقنا قبل كده إننا نراقب موضوع تعويم الجنيه بدون أخذ

تعويم الذهب والدولار والجنية - ج9
تعويم الذهب والدولار والجنية - ج9

جرام الذهب عيار 21 كان ب 360 ج في شهر إبريل 2016 لما كان

تعويم الذهب والدولار والجنية - ج17
تعويم الذهب والدولار والجنية - ج17

- علشان فيه ناس كتير سألوني عن وجهة نظري عن إتجاه

تعويم الذهب والدولار والجنية - ج4
تعويم الذهب والدولار والجنية - ج4

اتكلمنا قبل كده عن مميزات تخفيض الجنيه أمام الدولار

تعويم الذهب والدولار والجنية - ج13
تعويم الذهب والدولار والجنية - ج13

معنى تعويم الجنيه تركه لآليات العرض والطلب وظهور سعره