أكتر سؤال بنتسأله واحنا صغيرين هو "عايز تبقي ايه لما تكبر"؟ واجابتنا بتختلف ما بين دكتور، مهندس، مدرسة والاجابة الأشهر كانت "ظابط" وكل الاجابات كانت بتبقي نتيجة تأثرنا بشخصيات قريبة مننا لكن فى الواقع التخطيط الشخصى لحياتنا ده علم كبير والنهاردة هنحاول نشرحلكم أهمية التخطيط لحياتنا وازاى نخططلها..

طيب ليه نخطط لحياتنا؟! أولاَ لان ده هيساعدنا نعرف هدفنا فى الحياة بشكل أسرع وهيخلينا دايماَ بنسعى علشان نحققه وتحققينا للهدف ممكن فى يوم من الأيام يخلينا قدوة لشباب تانين وفى مقولة شهيرة لتوني قاسكنس بتقول

"إذا كنت لا تسعى لتحقيق أحلامك، فستصبح موظفاً عند شخص لتحقيق أحلامه."

علشان كده لازم نحدد اهداف وخطط لسنين حايتنا الجاية طيب ايه هى الأسس اللى بنحدد على أساسها الأهداف دى؟

1- ان تكون الاهداف محددة : يعنى مثلا أنا محتاج أخس 10 كيلو خلال الـ 3 شهور الجاين.

2- قابلة للقياس : يعنى تكون محدد مقياس معين تعرف منه انت عملت ايه و ناقص ايه.

3-معقولة : يعنى تكون حاجه هادفة او ليها سبب وهتغير شكل حياتك أو هتخليها أحسن.

4-محدده بزمن : يعنى تكون محدد الفترة اللى المفروض تتحقق فيها الاهداف دى.

طيب أكيد فى سؤال دلوقتى بنسأله لنفسنا، "امتى أبدأ أخطط لحياتى"؟

التخطيط لحياتنا مش مرتبط بسن معين لكن أفضل فترة لوضع خطط حياتنا وأهداف هى في السن من 14 لـ 16 سنة ولازم كل فترة نراجع النتايج اللى اتحققت ونعرف هل وصلنا لهدفنا بشكل صح ولا حصلت أخطاء طيب كان سببها ايه ولازم يتميز أى هدف أو خطة بالمرونة يعنى مثلا مش معنى انك ما خستش تبقي حياتك وقفت لا عادى كلنا بنفشل وبنرجع تانى نحاول ونجرب.

ولازم أى خطة شخصية تشمل كل نواحى حياتنا وتكون متوازنة كالتالى:

1- التخصص : بمعنى ان كل شخص محتاج يحدد مجال شغله أو المجال اللي ممكن ينجح فيه علشان ما يواجهش صعوبات وميعرفش يتأقلم مع أى مجال مش مناسبه.

2- العلاقات : يعنى مثلا شكل علاقاتى مع اهلى او صحابى او زمائلى فى الشغل هتكون ازاى الفترة الجاية.

3- الصحة : زى قرارك بإنك هتمارس رياضة معينة او هتاكل أكل صحى علشان ما تتعرضش للأمراض.

4- المال : مش كلنا بنقدر نحوش فلازم تربط الهدف بحاجة معينة زى مثلا انك محتاج تشترى عربية قبل سن الـ 30 أو انك هتشتغل بشكل حر علشان تقدر تجمع مبلغ يساعدك انك تكون صاحب مشروع.

5- المهارات : اشوف انا مميز فى ايه و اطور نفسى فيه.

كل النقط اللى فاتت مجرد أمثلة وترتيب أولويتها خاص بكل واحد وشكل حياته ومش لازم نحق أهدافنا بنسبة 100%لانه أحيانا بيبقي مستحيل لكن المهم اننا نكون بنتقدم في حياتنا علشان منجيش فى نص الطريق و نلاقى نفسنا معملناش حاجه مفيدة فى حياتنا و بنعمل حاجة احنا مش بنحبها ولا عايزينها ولا عارفين هتوصلنا لإيه وأكبر مثال علي كلامنا هى مقولة فرجينيا روميتي-"لا تدع الآخرين يحددون لك ما ستكون.. أنت تعرف نفسك."

دلوقتى دوركم انتوا، شاركونا حققتوا ايه من أهداف حياتكم ونفسكم تحققوا ايه للفترة اللى جاية.