بعد ماشرحنا ازاي نختار فكرة أي مشروع ناجح والعناصر اللي لازم تتوافر في الفكرة، تأتي مرحلة اعداد دراسة الجدوى ودراسة السوق والتخطيط لإطلاق المشروع، والهدف من الدراسات والتخطيط هو جمع المعلومات وتحليلها لتقليل المخاطر وتعظيم ربحية المشروع.

دراسة السوق: تعتبر من أهم عناصر نجاح اي مشروع، لو تم اتقانها والاهتمام بكل تفاصيلها لأنها ببساطة هي اللي بتحدد مدى نجاح المشروع وحاجة المستهلكين إلى الخدمة أو المنتج، ودراسة السوق بتعرفنا معلومات اساسية عن المنتجات او الخدمات المنافسة في السوق، زي حجم العرض والطلب وأسعار المنافسين وسلوك المستهلكين للخدمة او السلعة، وبالتالي تقدر تنافس في السوق.

ونقطة مهمة جداً في دراسة السوق، وهي انها لازم تتعرض لمشاكل وأوجه قصور المنتجات المنافسة في السوق، لأن ديه ممكن تكون عناصر تميز لمنتجك وتنافس بيها، مثلاً شركة "بوما" لإنتاج الأحذية والملابس الرياضية كانت شايفة ان في مشكلة في السوق فيما يخص الأحذية الرياضية الخاصة بالأطفال، وانهم ما بيعرفوش يربطوها كويس، فدورت على حل ووجدت ان في شركة تنتج لواصق اسمها "فيلكرو" وبدأت بوما تنتج أحذية أطفال من غير رباط، وده منحها ميزة كبيرة على الشركات المنافسة اللي عملت نفس المنتج في مراحل لاحقة.

الفكرة ان بوما سبقت المنافسين وكسبت لأنها كانت على دراية بمشاكل واحتياجات المستهلكين، وفي نفس الوقت كانت بتدور على حل للمشاكل والاحتياجات، وكمان سوقت المنتج ده وقتها بشكل مناسب جعلها تستحوذ على أرض جديدة في السوق، على عكس مثلاً شركة أخرى اسمها "بالم بيلوت" اللي كشفت عن أول آيباد في 1997 لكنها فشلت في تسويق المنتج، وجاءت شركات من بعدها واستغلت الفرصة وحققت الأرباح.

حاجة مهمة جداً وانت بتعمل دراسة السوق انك تبقى محدد مواصفات المنتج وشكله والشريحة التي تنوي استهدافها، يعني هل المنتج يستهدف طبقة اجتماعية أو فئة عمرية محددة، هل تميز المنتج في المكون الأساسي أم في طريقة تسويقه أو تغليفه، النقاط ديه لازم يكون في اجابات تفصيلية عنها قبل البدء في المشروع.

دراسة فنية للمشروع : من خلالها لازم نجاوب على كام سؤال، ما هي الأصول الثابتة التي سيحتاجها المشروع، وما هي متطلبات إنتاج السلعة، ومراحل إنتاج السلعة، الدراسة الفنية عادة ما تكون واضحة لأن كتير من الناس بيفكروا فيها قبل دراسة السوق وبالتالي يجب معرفة المكان حيث سيقام المشروع ومدى توفر الخدمات الاساسية فيه من مياه وكهرباء ومواصلات ونوع وعدد الآلات والمعدات الثابتة وأجور العمال ومراحل الإنتاج.

كمان لازم يكون عندنا دراسة مالية، اللي هتجاوب على أسئلة زي هل فكرة المشروع مربحة أم لا من أين سنحصل على التمويل، ما هي تكلفة المشروع المالية .

دراسة الجدوى المالية : بشكل رئيسي بنعرف من خلالها بندين رئيسين، التكاليف ومصادر التمويل، وتنقسم التكاليف إلى ثابتة وديه بتكون مثل الرواتب إيجار المحلات تأمينات العمال، أما عن التكاليف المتغيرة وديه بتكون زي المواد الخام وتكلفة الصيانة والمواصلات.

أما عن مصادر التمويل، فلازم من خلال دراسة الجدوى نحدد مصادر التمويل للمشروع، اذا كانت أموال صاحب المشروع أو قرض من البنك.

ممكن كمان تفكر في ادخال شريك اذا كان المبلغ المتوفر للمشروع غير كافي، ويفضل أن يكون صاحب الفكرة أو المشروع على علاقة ومعرفة جيدة بالشريك، وأن يكون هناك اتفاق على الاتجاهات التجارية للمشروع .

لازم واحنا بندرس المشروع مننساش الجوانب القانونية، يعني اسأل عن الاوراق والاجراء المطلوبة لإنشاء المشروع بشكل قانوني، والاطار القانوني بمعني شكل الشركة هل هو منشأة فردية أو شركة تضامن وغيرها.

الخلاصة .. دراسة المشروع بحرص وجمع المعلومات خطوة مهمة جداً وبتحدد مصير المشروع بنسبة كبيرة، حتى لو كلفتك وقت ومجهود، انت كدة بتشوف مشروعك مرسوم على الورق وبالأرقام كمان، وبكده انت بتقلل نسب المخاطرة أو الفشل لا قدر الله