النهاردة هنبدأ معاكوا سلسلة عن ازاي تبدأ مشروعك .. وهنتكلم عن أهم العناصر والخطوات بشكل عملي من أول لما الفكرة تتبادر إلى ذهنك حتى مرحلة التشغيل .

السلسة دية مش هتكون في اتجاه واحد .. لا، احنا هنستني بعد كل مقال أسئلتكوا واضافتكوا عشان نرد عليها في الحلقات الجاية .

أول عناصر انشاء أي مشروع ناجح .. الفكرة، وهي من أول وأهم عناصر المشروع لأنه يبدأ بالفكرة ويكتمل بالفكرة وتقوم كل مراحله على هذه الفكرة، فكرة المشروع لازم تتوافر فيها بعض العناصر عشان نقدر نقول ان الفكرة دية هتكون سبب في نجاح المشروع .

الفكرة لازم تكون جديدة أو على الأقل فيها جانب متعملش قبل كدة .. واحنا كلنا بنشوف مشاريع جديدة بتفتح كل يوم .. اللي بيتعرف ويحقق منها نجاح هو المشروع اللي مبني على فكرة جديدة اذا كانت في الشكل أو الطريقة أو حتى طريقة التسويق .

فكرتك ممكن تكون جاية عن طريق خبراتك السابقة أو مشاريع قائمة بالفعل، وانت طورت فكرتها، أو حتى جتلك من خلال احتياج أو موقف شخصي .

وفي قصص كتير جداً لأشخاص أصروا على تنفيذ أفكارهم اللي جاتلهم في ظروف صعبة وكانت تبدو غريبة أو فاشلة لكن اصرارهم وايمانهم بالفكرة حولها إلى واقع ملموس وحول مسار حياتهم إلى الأفضل، زي "كلايد بيزلي" اللي كان مسجون بأحد السجون الامريكية، وجاتله فكرة تبدو غريبة لما كان بيشاهد مباراة في الجولف وتم الغائها عشان الأمطار، ففكر انه ممكن يخترع لعبة جولف مصغرة تتلعب في أماكن مغلقة .

الفكرة سيطرت على رأس "كلايد" لمدة 11 سنة، مدة سجنه، ولما طلع قام يعمل نموذج للعبة وبدأ يعرضه على أصحابه وجيرانه وأبدو اعجابهم الشديد باللعبة، وبدأ يسوق لفكرته عن رجال أعمال ونوادي لكن فكرته كانت مثار سخرية ورفض في البداية لكنه لم يصاب باليأس.

وفي مرة كان بيحضر معرض مخصص لألعاب البلياردو، شركة أبدت اعجابها باختراع كلايد وقررت تنفيذه، وهو ما حوله إلى مليونير في خلال سنوات قليلة .

دايما لما تقول لحد كلمة مشروع بيجي في ذهنه فكرة معينة، ممكن تكون مناسبة أو غير مناسبة لكن في النهاية في فكرة ممكن تشتغل عليها وتوصل بيها للمشروع الناجح.

الفكرة لازم يكون ليها سوق أو احتياج، يعني لازم تسأل نفسك سؤال هل الناس محتاجة الخدمة أو السلعة اللي المشروع بيقدمها .. حجم الاحتياج دة قد ايه ؟ .. هل في مشاريع مشابهة في نفس المنطقة وبنقدم سلع وخدمات مشابهة لفكرتك ؟

اطرح فكرتك على الناس المحيطة بيك من الأصدقاء والأقارب وشوف رد فعلهم وتعليقاتهم على الفكرة وخدها في الاعتبار لأن ده هيطور الفكرة أكتر وهيعكس احتياجات ممكن تكون متعرفهاش، ويفضل تكون الفكرة ديه ليها علاقة بمهارة أو خبرة سابقة ليك لأن ده بيسهل بعد كدة تنفيذ المشروع .

لو تقدر تطرح الفكرة على من تتوقع يكونوا مستهلكين أو مستخدمين للخدمة ديه وتسمع آرائهم هتكون خطوة جيدة جداً في طريق انك تتأكد من فاعلية الفكرة ونجاح المشروع فيما بعد .

الخلاصة .. الأفكار هامة جداً لبداية مشروع ناجح وليها شروط لازم تتوفر فيها، كمان الاصرار والصبر وعدم اليأس من رد فعل الناس في بعض الأحيان لأن الفشل في البداية وارد بس ممكن ننطلق منه لنجاح كبير.