FB Instagram Twitter Youtube Linkedin ازاي تبدأ مشروعك .. خطة العمل أو Business Plan | أكاديمية اعمل بيزنس
 
الرجوع الى المدونة

ازاي تبدأ مشروعك .. خطة العمل أو Business Plan

ازاي تبدأ مشروعك .. خطة العمل أو Business Plan

أول حاجة عشان تبدأ مشروع لازم تعمل إعداد خطة العمل Business Plan للمشروع، وهي عبارة عن توثيق وتوضيح لأهدف ورؤية المشروع وكيفية تحقيقها، بالإضافة إلى إطار زمني للخطوات العملية لتنفيذ المشروع وإزاي الشغل هيمشي، بشكل أو آخر هي خارطة الطريق لمشروعك.

عناصر خطة العمل 
في خطة العمل بنحدد الاحتياجات المادية والبشرية والمعرفية الواجب توافرها قبل بداية المشروع، ولازم خطة العمل يكون فيها ردود على اسئلة زي، إزاي هعمل الأرباح؟ أو كيفية التصرف إذا كانت المبيعات منخفضة أو الأرباح قليلة؟ كمان لازم تحتوي على من هم المنافسون، وما هي السوق المستهدفة، وكيفية الوصول إليها، وخطة العمل طبيعتها انها قابلة للتحديث والإضافة بشكل مستمر لأن ظروف السوق متغيرة وبالتالي تقدر تصحح مسارك في أي وقت.

الملخص التنفيذى لخطة العمل
أول جزء في خطة العمل بيكون الملخص التنفيذي وبيكون فيه المهمة الرئيسية للمشروع والاحتياج الذي يغطيه المنتج، بالإضافة إلى الرؤية والشعار وكل ما له علاقة بهوية وشخصية المشروع والمنتج.

لازم يكون في البيزنس بلان جزء عن أهم خطط التسويق والمبيعات والفئة المستهدفة وخصائصها والفئة العمرية وكافة التفاصيل عنها، وتوقعات ميزانية إنفاقهم على الخدمة أو المنتج الذي تقدمه، كمان معلومات المتنافسين في السوق وميزة ونقاط ضعف كل واحد منهم، كمان نقاط القوة في المنتج أو الخدمة بتاعتك اللي هتخليك تتفوق عليهم.

البيزنس بلان فيها جزء مهم عن الموارد البشرية، وهنا هنحدد احتياجات المشروع من الموظفين والعمال والمتخصصين ومرتباتهم، وشرح مختصر للهيكل التنظيمي، ووصف وظيفي موجز لكل منصب والمهارات المطلوبة لكل منصب، ويفضل كتابة خطط التدريب، والتكلفة والوقت المطلوب.

يجي بعد كدة جزء عن العمليات التشغيلية والموردين وده بتحدد فيه طبيعة احتياجاتك من الموردين، هل هو يومي أو أسبوعي أو دوري أو غير منتظم، كمان بنذكر متطلبات المرافق زي حجم ومساحة الموقع وأنظمة الإدارة والمعلومات ومراقبة المخزون وإدارة الحسابات ومراقبة الجودة وتتبع العملاء وأي متطلبات ليها علاقة بأنظمة تكنولوجيا المعلومات، كمان لازم نحدد كل مراحل عملية الإنتاج بداية من الطلب الي تسليم المنتج، ويجب أن يكون كل الموظفين على علم بكافة الخطوات ديه.

آخر جزء بيكون في خطة العمل هو تحويل كل ما سبق إلى أرقام في الموازنة المالية التقديرية، وبيكون فيها احتياجات المشروع من الأموال ومصادرها وكمية الإيرادات المتوقعة بناء على حجم العمليات.

وديه بعض النصائح إذا قررت تكتب خطة العمل لمشروعك:

- خليك مختصر وتخلص من المعلومات الغير مفيدة.

- لازم تكون واقعي وموضوع.

- خليك أمين مع نفسك واذكر كل التحديات والعقبات اللي ممكن تواجه المشروع.

- استخدم الرسوم البيانية والجرافيكس لإبراز وتوضيح تفاصيل مشروعك.

- كن مبدعاً في كتابة خطة العمل ولا تتقيد، في الآخر ديه الخطة الخاصة بمشروعك اللي انت اكتر واحد بتهتم بيه.

وربنا يوفق الجميع

 

شارك المقال :