920033973
16342
article

ازاي تبعد عن اخطاء الترند

February 11, 2020    

وفاة "كوبي براينت" .. إزاي تختار الترند اللي تشارك فيه؟

كوبي براينت هو أسطورة وواحد من أهم وأنجح لاعبي كرة السلة في أمريكا والعالم، وفي 26 يناير 2019 العالم كله وخاصة محبي كرة السلة اتصدموا بخبر وفاته هو 8 أشخاص تانيين من ضمنهم بنته بعد سقوط الطيارة الهيلكوبتر بتاعته وتحطمها، وطبعا وفاة براينت المفاجأة خلقت موجة من التعاطف وردود الأفعال الحزينة من كل الناس.

لكن في وسط موجة الحزن على رحيله من الجمهور ورسائل التعزية من رؤساء الدول والمشاهير وكمان الشركات، ظهرت تويتة مثيرة للجدل من شركة Tron المتخصصة في تقنية البلوك تشين بتقول فيها" كوبي عضو من عائلة ترون، ولذلك سنقوم بإهداء مؤتمر niTROn القادم لحياته وارثه الأسطوري".

وبالرغم من إن ممكن كتير يشوفوا التويتة دي عادية وزيها زي رسائل التعزية التانية، إلا إنها في الحقيقة تسببت في هجوم عنيف من محبي كوبي براينت على شركة ترون واعتبروها بتحاول تنتهز فرصة موته للترويج للمؤتمر بتاعهم على حسابه، خاصة إن كوبي براينت مكنش له أي تعاون مع الشركة غير لما ألقى كلمة في المؤتمر اللي نظمته الشركة سنة 2019 ومش منطقي إنه بالكلمة دي يبقى "عضو من عائلتهم".

ردود الفعل العنيفة تجاه شركة ترون بتوضح أد إيه لازم الشركات تهتم جدا بالرسايل اللي بتستخدمها في الأوقات الحساسة والحزينة لكتير من الناس، وبما إن للأسف الأحداث الحزينة زي وفاة شخص مشهور أو وقوع حدث مأساوى يخص البلد شيء من الوارد حدوثه، تعالوا نتعرف على أفضل الطرق اللي ممكن الشركات تتعامل بيها مع موقف زي ده:

1. مش عيب إنك متتكلمش: كل شركة أو براند ليها السياسة الإعلانية والتسويقية الخاصة بيها وساعات بيكون من الأفضل لبعض الشركات إنها متتفاعلش مع الحدث من الأساس خاصة لو كان ممكن يخلق جدل مش مفيد ليها أو الناس تشوفه إنها دعاية ليها وخلاص، شركة سبرايت على سبيل المثال سنة 2003 أعلنت عن توقف حملتها الإعلانية مع كوبي براينت بعد ما تم اتهامه في قضايا ودعاوى جنائية ضده ساعتها واللي تم تسويتها في 2005، وعشان كده شوفنا الشركة معلقتش على خبر وفاته اللي كان ممكن يفتح كلام في مواضيع مش ده الوقت المناسب ليها.

2. اظهر دعمك بكل صدق ومتدورش على مصلحتك بس: شركات كتير من اللي اشتغلوا مع كوبي براينت وكانوا رعاة له عبروا عن مدى حزنهم وأسفهم لأسرته وأصدقائه واكتفوا بإظهار تقديرهم لحياته ومشواره الأسطوري مع وضعهم صورة بالأبيض والأسود له، شركة نايكي على سبيل المثال الراعي لبراينت لما يقرب من 20 سنة عبرت عن حزنها ودعمها لكل أصدقاء وعائلة براينت وذكرت تأثيره الكبير على العالم الرياضي، لكنها مستغلتش الحدث في ذكر الحذاء اللي تم إصداره مؤخرا بالتعاون مع كوبي براينت على الإطلاق.

3. التزم بعض الصمت: لما يكون في حدث مأساوي بيمس كتير من جمهورك من الأفضل إنك تستخدم لغة الصمت على السوشيال ميديا بتاعتك بحيث توقف أو تأجل البوستات الخاصة بيك لفترة عشان الجمهور يحس إنك متفاعل مع حزنهم وقريب منهم، شركة planters أعلنت بشكل مؤقت عن توقف حملتها الإعلانية المدفوعة مسبقا قبل بطولة Super Bowl وده على الرغم من إن الشركة مكنش في بينها وبين كوبي براينت أي تعاون قبل كده ولكن تقديرا للحزن اللي عند الناس.

4. متكونش انتقائي: بالرغم من إن الحدث الأبرز كان وفاة كوبي براينت، إلا إن كتير من الشركات ووسائل الإعلام تجاهلت تعزية بقية عائلات الضحايا اللي كانوا معاه على نفس الطيارة وده طبعا كان سبب في هجوم البعض على الشركات دي، وعشان تتفادى أي تعليقات سلبية متحاولش تكون انتقائي لو شركتك قررت تعلق على حدث من النوع ده، فلازم تظهر أسفك وحزنك على الجميع وعلى الموقف بشكل عام.

في النهاية صحيح إننا بقينا نشوف شركات كتير بتستخدم أسلوب " Newsjacking " عن طريق إنها تستغل الأحداث الترند وتستفيد منها للدعاية لنفسها، لكنها ممكن تتحول للأسف لكارثة على الشركة لو تم استخدامها في توقيت غير مناسب أو في موقف حزين بيمس مشاعر الناس، عشان كده أي شركة لازم تحط في اعتبارها إن بوست متسرع على السوشيال ميديا في وقت غير مناسب ممكن يتسبب في اتهامات ليها بالانتهازية واستغلال الحدث والركوب على الموجة.

 


مقالات مشابهة

المزيد
كيف تصبح كاتب محتوى سيو seo محترف؟
كيف تصبح كاتب محتوى سيو seo محترف؟

  مطلوب كاتب محتوى متوافق مع محركات البحث.... مطلوب

كيف يستفيد تجار الجملة والتجزئة من تطبيق تيليجرام؟
كيف يستفيد تجار الجملة والتجزئة من تطبيق تيليجرام؟

يبلغ عدد المستخدمين النشطين لتطبيق تيليجرام Telegram

أفضل  كورسات السيو التي يحتاجها كل مبتدئ في المجال 
أفضل  كورسات السيو التي يحتاجها كل مبتدئ في المجال 

هل تساءلت يومًا ما الذي يجعل الموقع س يظهر كنتيجة أولى

كيف تستغل Canva في الدعاية لمشروعك الصغير: 7 نصائح فعالة
كيف تستغل Canva في الدعاية لمشروعك الصغير: 7 نصائح فعالة

هل نظرت يومًا إلى تصميم ما بإعجاب  وقلت لنفسك

الأكثر قراءة

المزيد
12 نصيحة للترويج لعيادة 
12 نصيحة للترويج لعيادة 

 التسويق للعيادات أمر صعب جدًا وخصوصًا لو ملكش أي

مشاكل التسويق وحلولها
مشاكل التسويق وحلولها

 تتعرض الشركات لكتير من المشاكل التسويقية العصيبة،

مفهوم تقسيم السوق
مفهوم تقسيم السوق

تقسيم السوق أو الـ Segmentation من أكثر المصطلحات الهامة

إزاي تعمل براند ؟ 1
إزاي تعمل براند ؟ 1

هنبتدي النهارده معاكم سلسلة مقالات بعنوان إزاي

إزاي تعمل خطة تسويقية في 7 خطوات!
إزاي تعمل خطة تسويقية في 7 خطوات!

أهمية الخطة التسويقية : كتير من أصحاب المشاريع - وخاصة

دليلك الشامل لأهم 100 مصطلح في عالم التسويق 
دليلك الشامل لأهم 100 مصطلح في عالم التسويق 

يعد علم التسويق الحصان الرابح فى عالم  الأعمال

كيفية الربح من الفيس بوك: أفضل 13 طريقة لتحقيق الربح من الفيسبوك
كيفية الربح من الفيس بوك: أفضل 13 طريقة لتحقيق الربح من الفيسبوك

  يٌعد الفيس بوك أكبر منصة للتواصل الاجتماعي فيبلغ

تعريف SWOT analysis
تعريف SWOT analysis

ما هو تحليل سوت أو الـ swot analysis تعريف تحليل سوت أو الـ

شغل دماغك تعمل بيزنس
شغل دماغك تعمل بيزنس

لو كان لديك قوة ملاحظة تستطيع بها أن تلاحظ الفرص