FB Instagram Twitter Youtube Linkedin اعمل إعلانات تعلم مع الناس | أكاديمية اعمل بيزنس
 
الرجوع الى المدونة

اعمل إعلانات تعلم مع الناس

اعمل إعلانات تعلم مع الناس

كفاية كليشيهات.. اعمل إعلانات تعلم مع الناس

شوفت كام مرة إعلان مسحوق الغسيل اللى بيشيل أصعب البقع من أول غسله، الشامبو اللى بيخلي شعرك طويل ولامع من المرة الأولى، معجون الأسنان الرائع اللى هيخلى أسنانك تنور، إعلان كريم البشرة اللى هيفتح بشرتك خلال7 أيام بس، تأثرت كام مرة بالإعلانات دي أو افتكرتها وقررت تشتري المنتج؟

المستهلك كل يوم بيفتكر 16% فقط من الإعلانات التلفزيونية اللى شافها في اليوم اللى قبله، وفقا لمعهد أبحاث Ehrenberg-Bass لعلوم التسويق، وده بسبب كثرة الإعلانات والتشابه الكبير اللي ما بينهم واستخدام "الكليشيهات" اللى شوفناها كتير وبتتكرر بقالها سنين، من غير وجود رسالة حقيقية تعبر عن المنتج.

ووفقًا للكاتب كلود هوبكنز، مؤلف كتاب Scientific Advertising، استخدام جمل زى خصم خاص لاول 100 متصل، عرض لفترة محدودة، نقدم أفضل المنتجات، المنتج الأكثر مبيعاً، المنتج رقم واحد فى السوق فى الاعلانات، يعتبر أساليب قديمة للبيع، كانت بتنجح فى التمانينات والتسعينات لكن فى الوقت الحالي محدش بقى بيصدقها، والجمهور بيتجاهلها بالكامل ومش بتزود المبيعات بل على العكس بتضرها، ده لأننا عايشين فى عصر الإنترنت والمعرفة والناس بكل بساطه تقدر تدور وتعرف كل المعلومات اللى محتاجاها عن أي منتج، والإثبات الوحيد على صدق كلامك هو مراجعات وتقييمات الناس ليك.

وبالرغم من كده لسه فى شركات كتير بتستخدم نفس الكليشيهات دى فى الإعلانات سواء التلفزيونية أو المطبوعة أو على وسائل التواصل الاجتماعي من غير أي جديد، مجرد تنفيذ مختلف وبالتالي مفيش حاجه منهم بتعلق مع الناس، وفي وسط الزحمة اللي احنا عايشين فيها الناس بتعدي على الإعلان وبعد ساعة واحدة مش بتفتكره.

ولو دورت على أكتر اعلانات علمت مع الناس هتلاقي أنها دايمًا كانت:

- إعلانات بتقدم رسالة قوية وهادفة، بتستخدم شعارات ملهمة، أو قصص مؤثرة تلمس الجمهور.
- إعلانات تخليك تفكر، تضحك، أو بتعرفك معلومة جديدة.
- إعلانات بتقولك إزاي المنتج أو الخدمة دي هتساعدك وهتحل مشكلتك أو إزاى هتخلي حياتك أفضل وأكثر سعادة.
- إعلانات تزيد من ثقة العملاء في المنتجات لأنها بتقدملك معلومات حقيقية عن المنتجات وأراء عملاء حقيقيين.

ومن أشهر الحملات الإعلانية على مدار التاريخ اللى نفذت الكلام ده وعلمت مع الناس بشكل كبير وقت نزولها:

- حملة إعلانات نايك " Just Do It " :

سنة 1988 كانت مبيعات Nike سنويًا بتقدر بقيمة 800 مليون دولار، وكانت شركة Reebok هى الشركة الرائدة فى صناعة الأحذية الرياضية وقتها، وكانت نايك عاوزه تعديها، وبدأت حملة إعلانية باستخدام شعار Just Do It مع دعم مجموعة من أشهر الرياضيين وقتها، وبالفعل الحملة الإعلانية نجحت بشكل كبير فى كل انحاء العالم، وبعد 10 سنين بلغت مبيعات نايك 9.2 مليار دولار.

وهنا نايك ركزت على أفضل طريقة ممكن تقدم بيها المنتج، ركزت على المشكلة اللى بيحلها، واستخدمت شعار ملهم وحماسي يخدم المنتج بتاعها ويعبر عن الحالة الحماسية للعملاء عند ممارسة الرياضة، وفي نفس الوقت بيشجع الناس على تجربة الأشياء الجديدة، وأنها تاخد خطوة وتبدأ لأن أي خطوة هتكون أفضل من أنك تفضل واقف فى مكانك، والشعار مازال ناجح لحد دلوقتى وبمجرد ما تسمع اسم Nike هتفتكر شعارها Just Do It .

- حملة إعلانات فولكس فاجن " Think Small ":

سنة 1960، كان معظم الأمريكيين بيفضلوا انهم يشتروا العربيات الأمريكية الكبيرة، ومحدش ابداُ كان بيفكر في العربيات الألمانية الصغيرة، لكن فولكس فاجن قررت أنها تغير تصورات الناس عن العربيات اللي بتصنعها من خلال حملة " Think Small "، من خلال طباعة إعلانات عن سيارة البيتل، الإعلان كان عبارة عن ورقة بيضا فاضيه وفي النص في صورة صغيرة لعربية بيتل، ودى كانت طريقة مختلفة للإعلان عن السيارات في الوقت ده وعبرت بشكل ذكي عن بساطة السيارة وتصميمها المختلف، وبالفعل الحملة نجحت فى إثارة فضول المستهلكين الأمريكيين وجذب اهتمامهم للسيارات الألمانية.

فولكس قررت تكون صادقة مع عملائها، مقالتش أنا بقدم عربية مليانة مميزات وإمكانيات متعددة زى باقي الإعلانات في الوقت ده، لا قالت أنا بقدم عربية صغيرة وبسيطة وفيها مجموعة من المميزات من خلال تصميم إعلان يعبر عن الفكرة، وبالتالي المستهلكين قدروا الصدق ده، وتم تصنيف الحملة الاعلانية دي على أنها واحدة من أفضل الإعلانات المطبوعة على مر التاريخ.

- حملة إعلانات ريد بول " Red Bull Gives You Wings" :

حملة ريد بول "بيعطيك جوانح" تعتبر واحدة من أنجح الحملات الإعلانية بسبب اعتمادها على أسلوب سرد القصص، بتحاول دايماً تجمع ما بين القصص والفكاهة في نفس الوقت، من خلال استخدام قصص بتقولك إزاي المنتج بتاعهم هيخلى حياتك أفضل، وإزاي هتكون متنبه أكثر في شغلك أو مذاكرتك، وإزاي هيكون عندك طاقة لو عايز تلعب رياضة أو تحتفل، بأسلوب بسيط وفكاهي ويعلق معاك، ومناسب لكل الأعمار سواء الشباب أو كبار السن، إعلان يخليك أول ما تحس أنك مش مركز ومحتاج طاقة تفكر تشترى ريد بول.

وهنا ممكن نتعلم أن القصص البسيطة اللي بتعبر عن الناس والمواقف اليومية اللى بيمروا بيها في حياتهم واستخدام الفكاهة المناسبة للتعبير عنها دايمًا هتكون طريقة فعالة لتحقيق شهرة ونجاح للمنتج

- حملة إعلانات كوكاكولا "Share a Coke" أو "كوكاكولا احلى مع" :

شركة كوكاكولا دايمًا بتحاول توصل رسالة أن مشروب كوكاكولا مرتبط بالسعادة، وهتلاقي معظم الحملات الإعلانية بتاعتها بتعبر عن كده، لكن في 2011 فكرت في طريقة مختلفة لتسويق المنتج في أستراليا من خلال حملة " Share a Coke " واستخدمت اكثر 150 اسم منتشر في المدينة وكتبتهم على الكانز والازايز بتاعتها، وكمان عملت خدمة أنك ممكن تطلب علبة مطبوع عليها اسمك أو أي اسم وشعار تحبه، الحملة كانت تجربة جديدة ومختلفة والناس اعجبت بيها وساعدت على زيادة مبيعات كوكاكولا بشكل كبير في أكثر من 70 دولة، ونفس الشئ حصل في مصر، مين فينا مدورش على الكانز اللى مكتوب عليها " كوكاكولا احلى " مع اسمه او اسماء أصحابه أو " كوكاكولا أحلى مع امى".

كوكاكولا، خلت العملاء يحسوا أن المنتج بتاعهم وأنها عملته مخصوص عشانهم، والفكرة شجعت العملاء على شراء المنتج ومشاركته مع عملاء أكثر، وساعدتهم يكونوا سبب فى فرحة أصحابهم وأهلهم، شجعت العملاء على التقاط الصور مع المنتج ومشاركتها على مواقع التواصل الاجتماعي المختلفة.

والخلاصة، حاول دايمًا أنك تقدم إعلان مؤثر وملهم، يخلي العملاء يحسوا أنك فاهمهم وعارفهم وقريب منهم، ووريهم أن المنتج بتاعك هيعمل فرق في حياتهم زي ما عمل فرق فى حياة ناس غيرهم، إعلان يخليهم يقدروا يميزوا بينك وبين اى منتج تاني في السوق، إعلان يشجعهم على شراء المنتج من غير أي كليشيهات أو عبارات مكررة ومملة.

 

شارك المقال :