إيه هي الـ"بيتكوين"؟.. أهم 10 حقائق عن العملة الافتراضية

انتشرت الفترة اللي فاتت كلام كتير عن "بيتكوين" ما بين مؤيد ومعارض للفكرة، ناس قالوا إنها وسيلة الإرهاب الجديدة في نقل الأموال ما بين ممولين الإرهاب والإرهابيين، وناس تانية قالت إنها وسيلة ذكية حلت مشكلة كبيرة ووفرت على الناس رسوم كتيره كانت تنفق في الدفع الإلكتروني، وناس تالته خالص طلعوا قالوا إنها فكرة تافهة ونكتة زي ما قال الملياردير الأمريكي "وارين بافيت"، إحنا نقدر نحكم هل هي مفيدة ولا مضرة وهل من الممكن نستخدمها في البيزنس بتاعنا ولا لأ من خلال الحقائق ديه:

1. اخترع "بيتكوين" شخص غير معروف، أو مجموعة من الناس باسم "ساتوشي ناكاموتو"، وتم إطلاقه كبرنامج مفتوح المصدر في عام 2009.
2. "بيتكوين" هي عبارة عن عملة "افتراضية" يعني ملهاش وجود مادي، ومشفرة وتعاملاتها على الإنترنت بس، والتشفير هنا متمثل في أن هوية المتعاملين في البيع أو الشراء بتكون غير معروفة ولا يمكن تتبعهم.
3. "بيتكوين" سرية جداً لدرجة أن مفيش حكومة أو بنك يقدر يتتبعها أو يتابع تحركاتها فالموضوع عامل زي اللي ساب فلوسه في درج وعمله برقم سري ولما يحتاج يشتري أي حاجة بيدي للبياع الرقم السري والبياع ده بيروح يلاقي فلوسه ياخدها ويمشي وطبعاً مع الحفاظ على هوية الاتنين، وده لأن "بيتكوين" نظام بيشتغل عن طريق ما يسمى ب network contract اللي هو عقد شبكي ما بين جهاز البائع وجهاز المشتري وبيتم تحقيق المعاملات دية في دفتر حسابات موزع على ملايين الأجهزة في العالم يسمى ب block chain أو سلسلة الكتل.
4. استخدامها عالمي بمعنى أنك تقدر تقوم بعمليات بيع وشراء في أي مكان في العالم لأي شخص في أي مكان.
5. الحصول على "بيتكوين" من خلال أكثر من طريقة بس أكثرها شهرة هو التنقيب، اللي بيحصل من خلال جهاز كمبيوتر واتصال بالإنترنت وبرمجية التنقيب، وطبعاً الجهاز لازم يكون بمواصفات خاصة بحيث يقدر المستخدم الحصول على وحدات "بيتكوين" مقابل استخدام القدرة الحسابية اللي بيمتلكها جهاز الكمبيوتر في توليد قطع جديدة من "بيتكوين"، عبر حل معادلات رياضية ذات خوارزمية معقدة خاصة.
6.  سعر الـ 5000 "بيتكوين" في 2009 كان بيساوي 27 دولار وفي 2013 أصبح 800 ألف دولار وفي2017 أصبحوا 50 مليون دولار والزيادة دي كانت نتيجة أن عدد من الدول بدأت تعترف بيها كوسيلة للتعاملات النقدية بجانب أن معيار الزيادة قائم على العرض والطلب وحجم سوق "بيتكوين" النهارده عالمياً وصل ل 450 مليار دولار.
7. العبقرية في تكنولوجيا "بيتكوين" متمثلة في أكثر من حاجة بما فيها تكنولوجيا الblock chain وتكنلوجيا الnetwork contract لأن الأثنين دول بيمثلوا عقود ودفعات بتم ما بين ملايين من أجهزة الكمبيوتر حول العالم.
8. الاستثمار في البيت كوين مقلق لأن قيمتها متقلبة بشكل قوي ولكونها مجهولة المنشأ فمحدش يعرف مين هو "ساتوشي ناكاموتو" مخترع العملة، إذا كان شخص حقيقي ولا لأ، ولأن التنقيب عنها كمان عملية صعبة للغاية، بتتطلب وقت وأجهزة وتكلفة وطاقة كهربية مع العلم أن مع زيادة عمليات التنقيب بتزيد صعوبة استخراج "بيتكوين".
9. الاستثمار في البيتكوين ربحه سريع وأبسط دليل على كده هو أن مع بداية كتابة المقال ده كانت قيمة البيت كوين الواحدة 16780 دولار وفي نهاية كتابة المقال أصبح سعره 16801 اللي يثبت أنك في خلال 10 دقايق ممكن تكسب مبلغ كبير بس في نفس الوقت ممكن تخسره.
10. أكثر خمس دول في العالم تستخدم "بيتكوين" هم أمريكا، كندا، بريطانيا، إسبانيا وفنلندا يعني ولا فيهم بلد عربي ولا أفريقي فخلي بالك من النصب بجانب أن "بيتكوين" لسه ما تمش الاعتراف بيها في السوق المصري.

في النهاية مش مهم أنت ناوي تستثمر في "بيتكوين" ولا "فوركس" ولا العقارات ولا الذهب المهم أنك تكون فاهم في اللي هتشغل فلوسك فيه البيت كوين مربح؟ أه جداً بس مش أمان وقليلين اللي اعترفوا بيه وناس كتير شايفه أنهblack web على العموم أحنا مش هنقول استثمر فيها ولا لأ، بس زي ما قلنا أقرا أكثر عن أي مجال أنت ناوي تستثمر فيه.