هنكمل مع بعض سلسلة "البيزنس و ..." وهنتكلم عن بيزنس التنظيف

بمجرد ربط معايير صناعة البيزنس واستخدام تطبيقات العلوم الإدارية بأي مشروع بيحوله لكيان قوي ليه شخصية وأسلوب مختلف، في الجزء الـ3 من سلسلة "البيزنس و..." هنتكلم عن شركة مصرية قدرت انها تحول طريقة تقديم خدمة تنظيف المنازل من الطريقة التقليدية إلى طريقة سهلة وبتضمنلك جودة الخدمة وسرعتها.

في 2015 تأسست شركة "MERMAID" اللي بتقدم خدمات تنظيف المنازل بشكل يومي أو على فترات حسب رغبة العميل وده بيتم من خلال موقع إلكتروني سهل تقدر تقدم من عليه طلب خدمة التنظيف وبتحدد الباقة اللي أنت محتاجها ولو في خدمات زيادة بتحددها وبتضافلك على الحساب، غير أن اللي بيقوموا بالخدمة بيكونوا محل ثقة لأنك بتتعامل مع شركة مش مجرد شخص، ومن مميزات الشركة الاهتمام بالتفاصيل زي توحيد الزي والاهتمام بمستوى الخدمة والدقة في المواعيد، النموذج ده بيعتبر من النماذج اللي قدرت توظف التكنولوجيا وعلوم الإدارة في كيان واحد بيقدم خدمة متكاملة.

الشركة قدرت انها تطبق العلوم الإدارية بشكل جيد، وده كان واضح في:

- التسويق: حددوا شريحة مناسبة يستهدفوها عشان يعرضوا عليها خدماتهم، فركزوا على الستات المتزوجين اللي بيشتغلوا وبيعانوا من ضيق الوقت كمان بيكونوا قلقانين من انهم يسيبوا عاملة نظافة في البيت لوحدها وركزوا كمان على المكاتب والشركات الجديدة اللي معندهاش حد يقوم بالتنظيف بشكل منتظم وده في التسويق اسمه (segmentation) وعلى أساسه بنرسم شكل ولغة البراند، وطبقا للفئة المستهدفة برضوا اعتمدوا بشكل كبير على التسويق الإلكتروني من خلال قنوات التواصل الاجتماعي واستخدام الإيميل للتسويق.

- الموارد البشرية: إدارة الشركة كانت مؤمنة بأهمية الاستثمار في العنصر البشري عشان كده بيبقى في تدريب مستمر للعاملين على تحسين جودة الخدمة من حيث أسلوب التعامل مع العملاء وكيفية تقديم الخدمة، بالإضافة إلى أن الشركة أخدت في اعتبارها مراعاة شعور العاملين من واقع ان غالبية المجتمع بتستخدم مسمى (خدامة) اللي ليه بعض المدلولات السلبية عند البعض، وأطلقت أسم "Mermaid"على العاملين في خدمات النظافة ومعناه بالعربي "عروس البحر" واللي مستوحى من كلمة Maid، الشركة دي قدرت تطبق مبدئين من أهم مبادئ إدارة الموارد البشرية على مشروعها واللي هم التطور المستمر والتدريب وتقدير قيمة الموظفين.

في النهاية.. المفهوم السائد أن رأس المال القوي هو سر النجاح ده مفهوم خاطئ تماماً، لأن العنصر الأساسي في أي مشروع هو العقول والأفكار والعلم والدراسات اللي بنطبقها في أقسام المشروع المختلفة واللي بتكون هي كلمة السر في نجاح المشروع.