التعليم في الصغر كالنقش على الحجر

طول الوقت كنا بنسمع من أهلنا مقولة بتقول “التعليم في الصغر كالنقش على الحجر" ولأن زيها زي كتير من الأقاويل المعروفة اللي دايمًا كانوا بيقولوها، كنا بنرددها وخلاص من غير ما نفهم ايه المغزى من وراها أو المعنى الحقيقي للمثل ده؟ هل مربوطة بحكاية أو قصة لفلان وعلان؟ ولا هو بس عشان قافية الكلام حكمت وملهاش أساس مبنية عليه؟

 لكن اتضح مع الوقت بسبب كتر التجارب اللي بنتعرض ليها في حياتنا اليومية إن المقولة دي صحيحة بنسبة 100%، لا وكمان ليها أساس علمي مبنية عليه، وعشان كده أنظمة تعليمية في دول كتير بدأت تتبنى تطبيق فكرة المقولة دي على هيئة "برامج التعليم في مرحلة الطفولة المبكرة" اللي بيكون هدفها الأساسي هي تهيئة الطفل مش بس للتعليم، لا ده صحيًا ونفسيًا وسلوكيًا، بس خلينا نعرف ايه هي أصلا مرحلة الطفولة المبكرة؟

ايه هي مرحلة الطفولة المبكرة؟

بيتم تعريف مصطلح الطفولة المبكرة بإنها الفترة اللي بتكون من أول يوم ولادة لحد السنة الثامنة من عمر الطفل، بس يا ترى ايه بيميز الفترة دي عن غيرها ويخليها مهمة أوي كده؟ ده بسبب إنها أكتر فترة في عمر الإنسان بيحصل فيها نمو بشكل ملحوظ وسرعة كبيرة في تطوير القدرات والوظائف الدماغية للطفل، وكمان بيتأثر الأطفال في المرحلة دي بالأشخاص المحيطين بيهم وبالبيئة الموجودين فيها اللي بيساعدهم في تكوين شخصيتهم وآمالهم وطموحهم لسنين قدام.

ليه التعليم فى الصغر مهم؟

كتير دايمًا كنا نقول الطفل ابن فلان ده بيسجل كل حاجة وبيحفظ كل الكلام اللي بيسمعه من اخواته أو أي حد في محيط بيئته وبيحتك بيه، وقد ايه إنه ذكي جدًا وبياخد باله من كل الأحداث اللي بتحصل حواليه والأفعال والحركات اللي بيشوفها وده بيخليه أوقات يقلد ويجرب أي حاجة لفتت انتباهه.

 عشان كده الأبحاث أظهرت إن التعليم في مرحلة الطفولة المبكرة من أفضل الطرق لمساعدة طفلك على تنمية مهاراته الحركية والإجتماعية والعاطفية والإدراكية اللي بيحتاجها في تحضيره بداية من مرحلة المدرسة الابتدائية لحد مراحل حياته فيما بعد، وده يرجع لسبب علمي بحت.

أثبتت الدراسات إن في أكتر من مليون اتصال عصبي جديد بيتشكل كل ثانية داخل مخ الطفل أثناء الفترة دي من العمر، وكمان الارتباطات العصبية دي بتكون مسؤولة عن عملية الإدراك والتفكير والتعلم عند الطفل، ونصيحة مهمة ليك/ي لازم تستغلوا فترة النمو دي إنكم تساعدوه في تطوير مهاراته الإدراكية والفكرية عشان يستفيد بأكبر قدر ممكن من المرحلة دي، بس ايه اللي هيعود على الطفل لما يمارس التعليم في مرحلة الطفولة المبكرة؟

فوائد التعليم في الصغر

زي ما وضحنا في أول المقالة عن أهمية التعليم في الصغر وليه لازم نهتم جدًا بالفترة دي من حياة أطفالنا، خلونا نتكلم عن أهم الفوائد اللي هتعود على طفلك لما يتأسس صح وتأثير تعلم المهارات دي في سنه الصغير وازاي حياته هتكون أفضل لما يتم نشأته بشكل سوي لإن ده هيساعد طفلك يكون:

1- شخص إجتماعي.

التعليم المبكر واحتكاك الطفل مع أشخاص خارج محيط الأسرة هيساعده إنه يكون شخص إجتماعي ويقدر يكون صداقات ويخلق علاقات مع أطفال في سنه أو حتى مع ناس أكبر منه، كمان هيساعده في تعلم مهارات زي مهارة التخاطب في الكلام مع أي شخص جديد عليه وميبقاش خايف ياخد دفة الحوار ناحيته غير إنه هيكسر حاجز الخجل والخوف عنده ويخلي عنده ثقة بالنفس.

 2- طفل متعاون.

بتبدأ تتكون مهارة التعاون عند طفلك من بداية عمر السنتين، وده العمر اللي بيكون الطفل وصل لقدر كافي من الوعي إنه يقدر يتفاعل مع البيئة اللي حواليه ويفهمها كويس كمان، ده هيعلمه إنه يكون متعاون ويشارك اللي حواليه في كل حاجة وغياب الأنانية اللي بتكون عند الأطفال، عن طريق إشراك الطفل في أنشطة بتتطلب تعاون بينه وبين طفل تاني، ومع ذلك أكيد ده بردو مش هيتحقق غير لما طفلك يشوف بنفسه مشاركة أبوه وأمه في أمور البيت ومن هنا يبدأ يقلدهم.

3- مكتشف صغير.

الأطفال في بداية عمرهم بيكون عندهم فضول كبير وبيبقى عندهم أسئلة فضولية كتيرة، ومن واجبكم انتوا كأولياء أمور لازم تساعدوهم إنهم ياخدوا إجابات منطقية ترضي الفضول اللي عندهم وتتجنبوا الامتناع عن الاجابة أو اتباع اسلوب الصد لإن ده هيأدي لحاجة من اتنين، إما يخليه يبطل يفكر ويفتكر إن مجرد التفكير ده خطأ كبير وبالتالي هيقتل جواه مهارة الابداع أو لو كان طفلك فضولي أوي هيبدأ يدور على مصادر تانية يجيب منها إجابات لكل تساؤلاته ودي حاجة هتكون خطر على إدراك طفلك في السن ده، الفضول عند طفلك شئ إيجابي ومن علامات الذكاء عشان كده لازم تستغلوه صح.

4- رجل مجتمع.

العمل الجماعي عند الأطفال بيعزز المهارات الاجتماعية والعاطفية اللي هتساعده في مراحله الحياتية خاصًة مرحلة المراهقة والشباب، تدريب الأطفال في سن صغير على المشاركة في الأعمال الجماعية سواء أنشطة مدرسية أو ألعاب مكونة من كذا فريق أو الالتحاق بالأعمال التطوعية، العمل الجماعي عامل مهم لتنمية مهارات هيقدروا من خلالها يكسبوا قيم إيجابية جديدة زي التعاون والمشاركة وتقبل الآخر وتقديم مصلحة الجماعة على مصلحتهم الشخصية.

5- طفل شاطر في دراسته. 

كل ما كان الطفل من صغره بيتعلم حاجات جديدة كل يوم وبيشارك في أنشطة كتيرة قبل ما يلتحق بالتعليم الأساسي، ده هيساعده في تحسين أداءه الدراسي وقدرة الاستيعاب للمناهج الدراسية خلال المراحل الاولى من التعليم الابتدائي والاعدادي والمراحل اللي بعد كده، وده أكيد بسبب امتلاكه لقدر كبير من المعلومات اللي اكتسبها عن طريق تجاربه وخبراته في سنه الصغير، غير طبعًا الطفل اللي كان متعود على أجواء التعليم وقت الدراسة بس.

6- شخص مسئول عن تصرفاته.

لازم نهتم بتعليم الطفل في مراحل طفولته الأولى على تحمله للمسؤولية، وده عشان تقدر تخليه شخص قادر إنه ياخد قرارات لوحده ويعمل كل حاجة بنفسه من غير ما يحتاج يعتمد على أي حد، ده بيدي للطفل ثقة في نفسه ويخليه يحس بالفخر إنه اتحمل المسؤولية وبقى شخص كبير وبيتاخد برأيه كمان، وده هيخليه يحب التعاون مع اللي حواليه ويعرض عليهم المساعدة، ويكون إنسان محب للغير.

7- صاحب مستقبل مشرق.

من فوائد التعليم في مرحلة الطفولة المبكرة إنها بتأثر على مستقبل الطفل بالإيجاب، بحسب دراسات اتعملت بتقول إن البالغين اللي حصلوا على شهادات مرموقة، كانوا مشتركين وهما صغار في البرامج الخاصة لتعليم الأطفال في سن مبكر، في حين إن الأطفال اللي مكنش ليهم أي ممارسة لنشاط أو تعلم أي مهارة في مرحلة طفولتهم كان مستواهم قليل جدًا بسبب إن مكنش ليهم أي خبرات من قبل مرحلة التعلم الدراسي.

فى النهاية نحب ننصح كل الأباء والأمهات إنهم يستثمروا فى ولادهم عشان مستقبلهم ميبقاش مبهم، علموا ولادكم ازاي يكون عندهم رؤية مستقبلية وقدرة على التخطيط وعلموهم يعرفوا ياخدوا قرارات كبيرة ويشيلوا المسئولية، ازرعوا فيهم مفهوم إن العلم وسيلة والشهادة ممكن تكون دليل على جودة التعليم ولكنها مش دايمًا دليل على جودة صاحب الشهادة وإن الأهم من الشهادة هي المعرفة اللي اكتسبها خلال تجربته ومن خلالها يقدر يعمل إيه.

إحنا بنرشح لكم كورس بسيط ممكن طفلك يستفيد منه ويتعلم مهارة البرمجة اللي بقت مطلوبة جدًا في سوق العمل حاليًا، كورس "البرمجة باستخدام سكراتش" هيساعد الطفل إنه يصبح مبرمج صغير يقدر يصمم من خلاله قصصه الكرتونية اللي هيألفها وكمان هتكون متفاعلة معاه بالإضافة للألعاب  وهيتعلم يضيف الأصوات والمؤثرات التانية المختلفة، وكل ده هيتعلمه بسهولة جدًا بدون ما يضطر يحفظ الأكواد أو أي حاجة ممكن تكون صعبة عليه، هتكون بداية موفقة لطفلك يقدر من خلالها يبني مستقبل أفضل وتكونوا متطمنين عليه.