التمويل الجماعي ... طوق النجاة لرواد الأعمال

لما بتفتح كلام مع أي رائد أعمال في الغالب أول شكوى هتسمعها منه هتكون مرتبطة بتمويل مشروعه، ورغم حقيقة إن تمويل المشروعات الناشئة كان ومازال لسه سبب أساسي في عدم تحول أفكار ناس كتير لمشروعات على أرض الواقع أو كان سبب في توقف بعض المشروعات بعد ظهورها للنور إلا أنه في العشر سنين اللي فاتوا بدأت تحصل تغييرات عالمية واضحة في الجزئية دي مع ظهور مواقع أو منصات التمويل الجماعي.

فكرة مواقع التمويل الجماعي دي قامت على استثمار حالة الانفتاح اللي بيعيشها العالم بسبب الإنترنت وإننا زي ما بقينا بنتشارك في كل حاجة، ليه منتشاركش كمان في أحلامنا وأفكارنا اللي ممكن يقتنع ناس تانية بيها ويساعدونا على تحقيقها بدعمهم لينا مش بس فكريًا لا كمان ماديًا رغم اختلاف الثقافات وبعد المسافات.

وفعلًا في 2008 بدأت تظهر مواقع بتسمح للناس اللي عندهم أفكار أو مشروعات ناشئة بالتسجيل فيها وعرض فكرة المشروع مع خطة واضحة لتنفيذه تتضمن حد أدنى لميزانيته، وبتبدأ الناس اللي بتعجبها فكرة المشروع بتمويله إما من خلال الاستثمار أو الشراء أو التبرع، ولأن المواقع دي بتتوجه لناس كتيرة في معظم أنحاء العالم فغالبًا بتكون قيمة الأموال الفردية المدفوعة قليلة إلا إن المحصلة النهائية بتكون قادرة على تمويل المشروعات.

مهم جدًا هنا إننا نوضح إن صاحب الفكرة أو المشروع مهمته مش بتنتهي بعد وضعه لفكرة مشروعه على موقع التمويل الجماعي لأنه بيكون مطلوب منه يقنع الآخرين بفكرته فمثلًا لو قدر يقنع مليون شخص بمشروعه وكل واحد دفع جنيه واحد هيكون حصيلة التمويل اللي هيخده مليون جنيه.

علشان كده هنلاقي ناس كتير بتلجأ للمقربين منهم لمساعدتهم في تعريف الناس بالفكرة وإقناعهم بها، وفي ناس تانية ممكن تطلق حملات محدودة الميزانية على مواقع التواصل الاجتماعي علشان تقنع أكبر قدر ممكن من الناس بمشروعاتهم.

وبالتدريج فكرة المواقع دي بدأت تتطور فهنلاقي في مواقع طلعت بيتم جمع التمويل فيها من خلال قياس تفاعل الجهور مع أفكار المشروعات وده بيعرفوه عبر مشاركة المستخدمين لمنشورات خاصة بالفكرة أو التعليق عليها أو مشاهدة بعض الفيديوهات على مواقع التواصل الاجتماعي وبناء عليها بياخد المشروع نقط بتتحول لفلوس.

وكمان في مواقع تانية ابتكرت طرق جديدة جذابة وممتعة لتمويل المشروعات تعتمد على الترفيه علشان تحفز الناس، وده من خلال السماح للمستخدمين بمشاركة الألعاب الإلكترونية الموجودة على الصفحة مع أصدقائهم وبكده بيكونوا دعموا المشروع.

ومع نجاح مواقع التمويل الجماعي سواء عالميًا أو عربيًا في دعم الكثير من المشروعات إلا إن لسه في كتير من رواد الأعمال العرب معندهمش خلفية كافية عنها، وعن أنواعها وطريقة عملها ودي حاجة مهمة جدًا لأن اختيارهم للموقع الأنسب لفكرتهم هيساعدهم على تنفيذ مشروعاتهم وضمان تحقيق حملتهم لأهدافها خاصة إن في حملات كثيرة فشلت بسبب تجاهلها للعامل ده.

وده هينقلنا للكلام عن أنواع مواقع التمويل الجماعي اللي بتتقسم وفقًا للمقابل اللي بيحصل عليه مقدمي التمويل، وهي:

- تمويل قائم على المكافأة والشكر:
في النوع ده من التمويل بيفرض الموقع على صاحب المشروع إنه يقدم مكافأة لمقدمي التمويل بعد نجاح مشروعه، وبتختلف المكافآت بحسب نوع المشروع، وحجم التمويل المقدم فهنلاقيها بتبدأ بنشر نص لشكر الناس، وإقامة حفل عشاء لحد ما بتوصل لتقديم نسخة من المنتج النهائي للمشروع كهدية، يعني لو المشروع معني مثلًا بتصنيع هواتف ذكية هيحصل الممول على نسخة منه.
ومن المواقع اللي بتعتمد على الشكل ده من التمويل:

موقع Indiegogo 
يعتبر من أوائل مواقع التمويل الجماعي في العالم واللي كان مقتصر في الأول على تمويل الأفلام وبقى مفتوح لمشروعات من مختلف المجالات وبيتميز بأنه مش بيقيد رواد الأعمال بميزانية معينة أو مدة زمنية محددة.

موقع "ذو مال" 
بيعتبر من أوائل المنصات العربية في التمويل الجماعي لمشروعات متنوعة، واللي بيشترط على المستخدمين بعد التسجيل إنهم يحددوا هدف مادي خلال مدة أقصاها شهرين وفي حالة عدم جمع المبلغ خلال المدة يتم إعادة الأموال لأصحابها.

- تمويل قائم على القروض:
هنا بياخد صاحب المشروع المبلغ المطلوب من مقدمي التمويل على إنه قرض يجب عليه إعادته بعد فترة زمنية بيتم الاتفاق عليها، وبيختلف النوع ده من التمويل عن البنوك في إنه مفيهوش كتير من الشروط التعجيزية اللي بتكون موجودة في بعض القروض البنكية. 

ومن المواقع اللي بتعتمد على الشكل ده من التمويل: 

موقع Kiva
يهدف الموقع، التابع منظمة غير ربحية إنسانية دولية، لتحسين حياة الآخرين علشان كده بيتيح لأصحاب المشروعات الناشئة والراغبين في إكمال تعليهم في أكتر من 80 دولة في العالم بتقديم طلب لجمع المال مع الالتزام برده علشان يستفيد ناس تانية.

موقع Liwwa
بيعتبر الموقع ده وسيط بين الشركات الصغيرة والمستثمرين اللي عايزين يساعدوا المشروعات الناشئة، فبعد التقدم بالفكرة والموافقة عليها بيتم تقديم تمويل للشركة الناشئة على شكل قرض على أن يتم تسديده على دفعات شهرية.

- تمويل قائم على الاستثمار:
في النوع ده بيتم التعامل مع مقدمي التمويل على إنهم مستثمرين وبالتالي هيكون ليهم نصيب من أرباح الشركة في المستقبل.

ومن المواقع اللي بتعتمد على الشكل ده من التمويل:

موقع Eureeca
بيعتبر من أوائل منصات التمويل الجماعي في العالم العربي اللي بتركز على تمويل المشروعات الصغيرة والمتوسطة مقابل الحصول على أسهم فيها.

موقع MicroVentures
بيعتمد الموقع ده على جمع أموال قليلة من أكتر من مستثمر لتمويل الشركات الناشئة اللي بيتم قبول ملفها.

- تمويل دون مقابل:
في النوع ده بيتم تمويل المبدعين بدون مقابل وفي كتير من الأحيان بتكون المواقع دي بتستهدف كمان الناس اللي عايزه تكمل دراستها أو محتاجة سكن.

ومن المواقع اللي بتعتمد على الشكل ده من التمويل:

موقع patreon
يعتبر من أشهر المواقع اللي بتنتمي للنوع ده لأن مقدمي التمويل بيقدموا أموالهم من غير ما يستنوا مقابل غير استمرار المبدعين في تقديم أعمالهم المفيدة واللي أغلبها بيكون فيديوهات تعليمية وترفيهية، بس المتبرع هنا لازم يلتزم بمبلغ شهري أو بمبلغ عن كل عمل جديد بيكون زي راتب للمبدعين علشان يقدروا يتفرغوا لأعمالهم.

موقع Gofundme
بيدعم الموقع ده كل الباحثين عن تمويل دون مقابل سواء أفراد أو مجموعات أو حتى شركات أي كان السبب (تأسيس مشروعك الخاص، أو استكمال دراستك، أو العلاج، أو إيجاد سكن...).

مواقع التمويل الجماعي على اختلاف أشكالها قدرت تكون طوق نجاة لكتير من رواد الأعمال والمبدعين في العالم خاصة إن أغلبهم مكنوش بيلاقوا مصادر تمويل بسهولة أو بيعانوا من تحكم أصحاب رأس المال في مشروعاتهم، وعلشان كده قيمة اقتصاد التمويل الجماعي بعد 5 سنين بس من انطلاقه قدرت تتعدى ال5 مليار دولار ده وقدر يثبت نفسه كواحد من المجالات الواعدة في السنين الجاية.