FB Instagram Twitter Youtube Linkedin
920033973
16342
article

التنمر في أماكن العمل.. إيه الحل؟

May 07, 2019    

 

 
كتير مننا سمع عن حملة مواجهة التنمر إلي بتتعمل دلوقتي في مدارس مصر تحت رعاية المجلس القومي للطفولة والأمومة بالتعاون مع منظمة الأمم المتحدة للطفولة (يونيسف) وبتمويل من الاتحاد الأوروبي .. بس ياترى هل نعرف إن التنمر ده مش بس في السن الصغير لما بنكون لسه في المدرسة؟ وإن إحنا كمان ممكن نتعرض للتنمر في الشغل!!
 
آه زي ما قريتوا بالظبط، ممكن أبقى راجل كبير، أو امرأة عاملة وأتعرض للتنمر في الشركة أو مكان الشغل بتاعي.
 
خلينا مبدأيا نشرح معنى كلمة تنمر عشان نبقى فاهمين صح، التنمر ده عبارة عن شكل من أشكال العنف أو الإساءة من شخص أو مجموعة أشخاص نحو شخص آخر أو مجموعة أخرى من الأشخاص، وعادة بيكون الطرف المهاجم أقوى من الطرف إلي بيتعرض للهجوم.
 
وده يخلينا نبقى أكثر دقة لما نقول إن التنمر في مكان العمل عبارة تصرف مُتعمد وبشكل متكرر تجاه موظف بغرض الإساءة ليه وإهانته ووضعه في مواقف محرجة والتقليل من قيمة عمله ومجهوده.
 
لكن وعلى العكس من التنمر في المدارس لما بنلاقي ضحية التنمر هو الطفل الأضعف، التنمر في العمل بيقى عادة ضد الشخص الأقوى والأكفأ، يعني الشخص إلي بيمثل وجوده تهديد لزملائه الأضعف منه.
 
وعشان نقدر نفرق بين اختلافنا مع شخص ما وبين تعرضنا للتنمر في العمل، لازم نسأل نفسنا مجموعة أسئلة، ولو كانت الإجابة عليها بالإيجاب، يبقى أنا فعلا بتعرض للتنمر:
 
- هل عادة بحس بالإهانة والخوف؟
- هل تعرضت قبل كده للإهانة قدام زمايلي؟
- هل زمايلي مطلعين عليه ألقاب بينادوني بيها؟
- هل بيتم التقليل من قيمة شغلي؟
- هل بخاف إني أنزل أروح الشغل؟
 
والتنمر في العمل بياخد 3 أشكال إما تنمر لفظي يعني سخرية واستفزاز وتهديد، أو تنمر جسدي زي الضرب أو أي شكل من أشكال العنف البدني، وأخيرا التنمر العاطفي وده بيكون عن طريق الإحراج المستمر للموظف ونشر الشائعات عليه.
 
وبيكون للتنمر في العمل نتائج سلبية جدا بتأثر على حياة ضحية التنمر المهنية والشخصية، وفي بعض الحالات ممكن يوصل الموضوع لانتحار الشخص إلي بيتعرض للتنمر.
 
يعني لو إنت ضحية تنمر هتلاقي شغلك بيتأثر، وحالتك العقلية كمان، غير أضرار جسدية تانية كتير، ده بالإضافة لإنك هتضطر تاخد أجازات كتير من الشغل لأنك مش عايز تروحه، وهتتهز ثقتك بنفسك.
 
وبما إن التنمر ده عبارة عن وباء خطير، فلازم نعرف التصرف الصحيح إلي نعمله لو لقينا نفسنا ضحية تنمر في مكان شغلنا، عشان ما نعانيش من النتائج السلبية ليه، يعني لو رصدت إنك بتتعرض للتنمر لازم تنفذ الخطوات ديه:
 
1- ضع حدود واضحة للمتنمر:
حط حدود للشخص المتنمر بشكل واضح، عشان تبين له إن تصرفه غير مقبول بالنسبالك، يعني ما تقولش كلام عام زي "إنت بتضايقني"، لأ خليك محدد وقوله "إنت بتفتح جهازي وبتشوف إيميلاتي وده تصرف مش مقبول"، وخليك حازم في توضيح التأثير السلبي لتصرف المتنمر معاك وفي تأكيد رفضك لتكرار السلوك ده في المستقبل.
 
2- واجه المتنمر أمام مديرك:
صحيح مواجهة المتنمر بتبقى صعبة ومخيفة، بس افتكر كويس إنك شخص بالغ وتقدر تدافع عن حقوقك بنفسك، المهم إنك ماتفقدش أعصابك وتحتفظ بهدوءك.
 
لو المتنمر بينتقدك وقت العمل، قدام مديرك وجهله كلام مباشر: بتنتقدني ليه دايما؟ طيب لو شايف إني بغلط في شغلي تقترح عليه إيه عشان أعالج الخطأ ده؟
 
3- وّثق دليل على التنمر:
أهم حاجة عشان تقدر توقف المتنمر عند حده إنك توثق وقائع التنمر ضدك باليوم والساعة، وياريت لو فيه شهود من زمايلك.
ولو لاحظت زميل ليك بيتعرضوا للتنمر من نفس الشخص تجمعوا توثيق ده مع بعض.
 
4- أخبر الإدارة والموارد البشرية عن سلوك المتنمر:
هنا بقى بتيجي خطوة طلب المساعدة من المسئولين في إدارة الشركة وقسم الموارد البشرية مع تقديم الوثائق والشهادات إلي إنت جمعتها، وده عشان يتخذوا الإجراءات اللازمة ضد الشخص المتنمر.
 
أما في حالة إنك إنت صاحب العمل أو الشركة وعندك موظفين بيتعرضوا للتنمر .. إيه المطلوب منك؟ هقولك:
 
1- فعّل سياسة عدم التسامح مع التنمر والإرهاب النفسي في بيئة العمل:
لازم تتأكد من إن سياسة شركتك بتنص على عدم التسامح مع حالات التنمر، وده بيكون بالتنسيق مع المسئولين في الإدارات المختلفة.
 
2- تعامل مع حالات التنمر على الفور:
ماتكتفيش بقدرة أو نجاح موظفيك في التصدي لحالات التنمر، لازم تتصدى إنت أول بأول للحالات ديه، وتحّقق فيها، وماتسمحش إنها تنتشر وتأثر سلبيا على شغل الموظفين.
 
3- تجنب الاعتماد على عنصر المنافسة داخل العمل:
عادة بيظهر سلوك التنمر جوه الشركة نتيجة التنافس بين الزملاء، فيبدأ الشخص إلي عنده استعداد للتنمر يحس بالتهديد لنجاحه في الشركة، ويتنمر على زمايله المتفوقين عليه.
 
4- شجع على التواصل والتفاعل بين الموظفين والإدارة:
كل ما زاد التفاعل بين الموظفين بجميع مستوياتهم، كل ما هتقل العدائية بينهم، وكل ما قدرت كصاحب شركة إنك تتحكم وتسيطر على الأمور.
 
التنمر زيه زي أي مرض خطير، ويمكن أكتر لأن تأثيراته السلبية ممكن توصل لانتحار ضحية التنمر، عشان كده لازم يكون التصدي للظاهرة ديه على قائمة أولوية أي صاحب شركة أو مسئول عن موظفين، ومش لازم أي موظف يسكت أبدا على تعرضه للتنمر في مكان شغله.


مقالات مشابهة

المزيد
لا للإزعاج!
لا للإزعاج!

الشغل مش بس مكتب وتارجت ومرتب آخر الشهر لكن كمان زمايل

صاحبك ... وتحويشة العمر
صاحبك ... وتحويشة العمر

(كم مرة سمعت عن واحد عايز يفتح مشروع، فيشوف واحد صاحبة

قبل ما تاخد قرار.. لازم تحسبها صح
قبل ما تاخد قرار.. لازم تحسبها صح

كل قرار بيتاخد في البيزنس أكيد هيكون له نتيجة سواء

انت شاطر.. بس فوت علينا بكرة!
انت شاطر.. بس فوت علينا بكرة!

    بنسمع كتير من كل اللي بيتكلم عن فن القيادة

الأكثر قراءة

المزيد
مراحل ترقي الـ HR: من HR Coordinator ل HR Director
مراحل ترقي الـ HR: من HR Coordinator ل HR Director

تعتبر وظيفة الـ HR واحدة من الوظائف المطلوبة بقوة في

أفضل 6 أفلام عن البيزنس لرواد الاعمال
أفضل 6 أفلام عن البيزنس لرواد الاعمال

يمكن الهدف الأساسي اللي بيخلينا نشوف فيلم أو مسلسل هو

التعليم في الصغر كالنقش على الحجر
التعليم في الصغر كالنقش على الحجر

طول الوقت كنا بنسمع من أهلنا مقولة بتقول “التعليم

شركات تنافس اوبر وكريم
شركات تنافس اوبر وكريم

بتعتبر شركة اوبر وكريم من الشركات الناجحة فى السوق

"ماكدونالدز" و"برجر كينج".. الصراع على عرش البرجر

في مايو اللي فات، قدمت سلسلة مطاعم "برجر كينج" 5 وجبات

ليه كورسات أكاديمية إعمل بيزنس أون لاين ؟
ليه كورسات أكاديمية إعمل بيزنس أون لاين ؟

    لاحظنا تزايد أسئلة الأعضاء بخصوص إن ليه

اسباب فشل الشركات الناشئة
اسباب فشل الشركات الناشئة

عالم ريادة الأعمال عالم كبير شبيه بالمدرسة أو الجامعة

تطبيقات مهمة للبزنس
تطبيقات مهمة للبزنس

تطبيقات مهمة للبزنس.. على موبايل أي رائد أعمالمن

بطريقة سهلة ... ازاي تكتب إميل احترافي 
بطريقة سهلة ... ازاي تكتب إميل احترافي 

    كتابة إميل بشكل احترافي بتعتبر من الأساسيات