FB Instagram Twitter Youtube Linkedin السوق المصرى | أكاديمية اعمل بيزنس
 
الرجوع الى المدونة

السوق المصرى

السوق المصرى

اللي عايز ينجح في مصر لازم يبقى مقتنع بالبلد وبالسوق المصري اللي يعتبر سوق قوي جداً وممتاز جداً وفيه فرص للنجاح أعلى من أي سوق في العالم نتيجة لعوامل كتير أولها إنك نشأت في السوق ده وبعدين سوق ضخم بيخدم أكتر من 100 مليون شخص ومتنوع جداً وهيفضل كده ....

ليا واحد صديقي فتح مشروعه في شهر مارس 2011 وقت ما كان البلد فيها لجان شعبية والنهاردة المشروع بتاعه وصل ل 7 فروع وأرباح عالية جداً (ما شاء الله) وهننزل فيديو عنه قريب إذن فالمشكلة مش في السوق المشكلة في ثقافة اللي بيفتح في سوق زي ده وعايز ينجح بدون ما يكون هو نفسه مؤهل للنجاح .

85% من المشروعات المتوسطة بتقفل خلال أول 18 شهر في الولايات المتحدة الأمريكية طبعاً في مصر مفيش إحصائيات واضحة ( وده من عيوب السوق ) إنما من وجهة نظري إن 50% فقط من المشروعات بتقفل يعني عندنا نسبة النجاح أكبر من أمريكا وده لأن السوق الأمريكي سوق ناضج المنافسة فيه عالية والعميل متدلع لأن عنده بدائل كتير أما في مصر فال50% بيبقى منها كتير نتيجة جهل اللي بيفتح مشروع بالبيزنس وإعتماده على الفهلوة لدرجة إن فيه ناس لما بتاخد رأيي عن طريق الصفحة بنصحهم يقروا سلسلة التسويق اللي هي 40 حلقة فبيردوا عليا هو أنا لسه هاقرأ كل ده ؟؟

طيب بلاش تقرأ وادخل السوق واعتمد على الفهلوة ولما تفشل ابقي اقعد اشتكي من السوق والبيروقراطية وسعر الدولار والبلد اللي مافيهاش عدل وانت نفسك أول واحد بتتسبب في فشلك بجهلك واستعجالك وإن انت تبدأ وانت غير مؤهل .

أنا اشتغلت في السوق سنة 87 عقب وفاة والدي وكنت بدير المحل اللي سابه إدارة كاملة وبدأت بيزنس لوحدي سنة 95 وفتحت شركة سنة 98 وطول عمر التجار بتشتكي وتشتم في السوق وبعد كده تلاقيهم بيتوسعوا وبيشتروا عربيات وبيبنوا عمارات من السوق اللي بيشتموا فيه وبيشتكوا منه وواخدين مبدأ (شكوى خير من ألف رقوة ) علشان خايفين من العين وخايفين من دخول منافسين لو انت سمعتهم بيشكروا في السوق

الناس كلها كانت بتقول بعد الثورة إن السوق انهار ومع ذلك السوق استوعب مليون سوري دخلوا السوق واشتغلوا وعملوا فلوس كويسة جداً سواء اشتغلوا كقوة عاملة أو كأصحاب بيزنس طيب إزاي سوق منهار ويستوعب العدد ده اللي اشتغلوا من أول سواق التاكسي وبياع في محل لحد أصحاب مصانع ومحلات؟؟

بلاش نركز أوي في ربط السوق الكلي اللي هو التضخم وميزان المدفوعات والسوق بتاعنا اللي هو شغلنا لأسباب كتيرة أولها إن مصر فيها بيانات رسمية لا تعبر عن الواقع من قريب أو بعيد لأن الإقتصاد الغير رسمي في مصر أكبر بعشر أضعاف من الإقتصاد الرسمي وكمان لأن حتى لو الإقتصاد واقع ممكن تلاقي مجالك فيه انتعاشة زي مثلاً السياحة النهاردة مضروبة بس تجارة الفاكهة واستيرادها وتصديرها منتعش فركز في مجالك.

يوم الخميس اللي فات زارني واحد من أصدقاء الصفحة عايز يصفي مشروعه ويسافر برة ولما قعدت أدرس شغله لقيته منتعش ما شاء الله وبيكسب مكاسب محترمة وعنده نمو رائع طيب عايز تسافر ليه ؟؟ علشان مصر هتفلس ؟؟ والبلد هتقفل

مفيش حاجة اسمها كده مترميش ودنك لحد واحكم باللي انت شايفه البلد مش هتفلس ومش هتقفل وحتي لو سعر الدولار زاد ل 20 ج برضه الدنيا هتمشي والبلد هيبقى فيها شغل وخصوصاً إننا سنه 99 سعر الدولار طلع من 3.4 ل 6 ج في يوم واحد والبلد كملت برضه ومحصلش حاجة كل اللي هيحصل السوق هيقف شوية لحد ما يستوعب ويكمل بعد كده .

أنا طبعاً مش ببسط الموضوع ولا بقول إن السوق المصري كله إيجابيات بالعكس فيه مشاكل كتير متعلقة بالبروقراطية والحقوق والتوظيف وعدم الاستقرار بس بعد كل ده السوق المصري يظل جذّاب وفيه ناس سواء من مصر أو برة مصر بتعمل في شغل جامد زي السوريين والسعوديين

اللي عايز أقوله ياريت منتأثرشي بكل اللي بنقراه أوبنسمعه ونحكم كويس ونطور نفسنا ولو مجالنا قفل جوا مصر نطلع بره مصر لكن مش بالسمع

وربنا سبحانه وتعالي يوفق كل مجتهد ويرزق كل ساعي

شارك المقال :