920033973
16342
article

العلامة التجارية العطرية

August 01, 2019    

سوٌق منتجك على "الريحة"

 مع احتدام المنافسة بين الشركات في السنوات الأخيرة بقت كل مؤسسة بتسعى إنه يكون ليها تجربة استثنائية مع عملائها تخلي عندهم ولاء ليها لأطول فترة ممكنة، وواحدة من الطرق اللي بتسمح لهم بتحقيق ده هي إنه يكون عندهم علامة تجارية عطرية وإنهم يستخدموا التسويق بالرائحة. 

أيوا أنت شفت صح "علامة تجارية عطرية" و"التسويق بالرائحة"، طيب خلينا نبدأ من الأول ونقول إنه إذا كانت العلامة التجارية هي إشارة مميزة بنقدر من خلالها نفرق بين المنتجات والخدمات المختلفة، هنلاقي إن كلنا اتعودنا إن الإشارة المميزة دي بتكون بصرية يعني لوجو بيكون عبارة عن صورة أو رسمة، أو بتكون سمعية يعني نغمة بمجرد ما تسمعها تعرف المنتج، لكن ما حدش خطر في باله إنها ممكن كمان تكون رائحة أو عطر بمجرد ما نشمه نعرف العلامة التجارية. 

هو الكلام قد يبدو غريب بس الحقيقة إن حاسة الشم تعتبر الأقوى والأكثر ارتباطًا بأحاسيسنا وذاكرتنا العاطفية بين جميع الحواس لأن بحسب دراسة أجراها الخبير في مجال العلامات التجارية مارتن ليندستروم هنلاقي إن الروائح عندها قدرة إنها تثير مشاعر جوانا متعلقة بالماضي بنسبة 75%، وإن امتلاك الشركة لعلامة تجارية بصرية وسمعية وعطرية بيرفع قدرتها على التأثير على جمهورها وبيخليها توصل لـ70%. 

وكمان إحنا عندنا قدرة إننا نتعرف على أكتر من 10 آلاف رائحة مختلفة حتى لو كان تاريخها بيرجع للطفولة، ده غير إن أي فرد يقدر يفتكر ويستدعي من ذاكرته روائح مر عليها سنة بدقة مقدارها 65% وده في مقابل إنه هيفتكر الصور بدقة قدرها 50% بعد مرور 3 أشهر بس على رؤيتها. 

وعلشان كده لما أي علامة تجارية تربط نفسها عند عملائها برائحة مميزة محددة أو عطر معين بتكون قادرة إنها تتواصل مع جمهورها بشكل أعمق وده بينتج عنه تجربة صعب إنها تتنسي، ده غير إن العلامة التجارية العطرية عندها القدرة إنها تجذب عملاء جدد، وترفع المبيعات، وتزود من إدراك العملاء لقيمة المنتج ونسبة رضاهم عنه، وبتخليهم عندهم استعداد إنهم يدفعوا فلوس أكتر في منتج معين كمان. 

فمثلًا هنلاقي إن ماركة الأحذية الرياضية الأمريكية "نيو بالانس- NB " استخدمت التسويق بالرائحة لما جت تتوجه للجمهور الصيني، ونشرت في المتاجر بتاعتها رائحة عبارة عن مزيج من الأخشاب والجلود علشان تنقل للعملاء احساس بالحنين للماضي وكمان تمكن علامتهم التجارية من شغلها فكانت النتيجة إن الصينيين قضوا وقت أطول في المتاجر وتسوقوا بمعدلات أعلى. 

وده بيأكد الدراسة اللي كانت عملتها شركة "سامسونج" واللي أظهرت نتائجها إن المستهلكين لما بيتعرضوا للعلامة التجارية العطرية للشركة بيزيد وقت التسوق بتاعهم بنسبة 26%، وبيكون عندهم استعداد يشوفوا منتجات أكتر. 

وبسبب الفوائد الكتير اللي بتتيحها العلامة التجارية العطرية هنلاقي إن في السنوات الأخيرة في شركات كتير بتنتمي لمجالات زي (صناعة العربيات، وبيع الملابس، وشركات الطيران، والفنادق، ودور السينما، ومجال الرعاية الصحية، والعقارات، واللياقة البدنية) بدأت تستخدمها كوسيلة علشان ينمو أعمالهم بطريقة استراتيجية ويحتلوا مكانة مميزة عند جمهورهم وما يغيبوش عن أذهان عملائهم. 

وده بيفسر ليه دلوقتي بقى فيه وكالات متخصصة في التسويق بالرائحة بيكون دورها إنها تستوعب هوية العلامة التجارية للشركة، والجمهور المستهدف، والرسائل التسويقية والقيم والمشاعر اللي المؤسسة عايزة تربطها بتجربة العميل للمنتج أو الخدمة بتاعتها، وتقوم صايغة كل اللي فات ده في جملة بيتم ترجمتها إلى عطر. 

وبعد كده بتيجي خطوة الاستعانة بشركات العطور المتخصصة اللي لازم تكون عندها قدرة عالية على الابتكار علشان تقدر تعمل عطر بيعكس رؤية وأهداف كل مؤسسة بدقة، ودي مهمة بتكون أصعب لما الشركة يكون عندها منتجات متنوعة وبتستهدف شرائح مختلفة من العملاء، وبتبقى أصعب أكتر لو كانت المؤسسة بتستهدف جمهور من ثقافات مختلفة لأن أذواق الشعوب بتختلف. 

وهنا نقدر نقول إن الأدوات اللي بتستخدم في التسويق بالرائحة هي الزيوت العطرية واللي كل واحد فيهم بينقل للعملاء شعور معين، يعني هنلاقي إن الروائح الحارة أو الثقيلة زي رائحة التوابل، وأزهار البرتقال والخوخ، والأخشاب العطرية بتدينا شعور بالحيوية والطاقة، أما روائح الحمضيات الخضراء فبتنقلنا شعور بالنظافة والنظام، ومزيج الأوراق العشبية والأخشاب الرطبة والطحالب الترابية بيدي شعور بالبساطة والرفاهية والشفافية والطمأنينة. 

وبعد مرحلة اختيار العطر بتيجي مهمة إزاي هتوزع علامتك التجارية العطرية علشان تحقق الهدف المرجو منها، يعني هتكتفي برشه في المداخل الرئيسة للفروع بتاعتك بحيث يكون رسالة ترحيب بالعملاء، ولا هتخلي العطر منتشر بقوة في كل الفروع بتاعتك ولا هتختار الفروع المزدحمة بس. 

مش بس كده كمان لازم يتم تحديد التوقيت والساعات اللي بيترش فيها علامتك التجارية العطرية يعني هيكون على مدار الساعة ولا في ساعات محددة بس، وبعد كده بيتم اختيار أفضل موقع لجهاز رش العطر وأوقات تشغيله وإيقافه وسرعته علشان يحقق الهدف منه. 

وفي أحيان كثيرة، لما العلامة التجارية العطرية بتنجح في التعبير عن المؤسسة الخاصة بيه مش بس بترفع مستوى ولاء الجمهور بعلامتهم التجارية لكن كمان بتكون مصدر دخل للشركة لأنها بتكون مطلوبة من العملاء وبالتالي ممكن بيعها بشكل منفصل كعطور أو شموع معطرة وكمان منتجات للعناية الشخصية. 

وفي النهاية، نقدر نقول إن التسويق بالرائحة والعلامة التجارية العطرية عندهم قدرة قوية وفورية صعب الاستهانة بيها على ربط عملائك بالمنتج أو الخدمة اللي بتقدمها علشان كده مهم تبدأ تفكر في الهوية العطرية المناسبة للمؤسسة بتاعتك.
خصم 50% عند الإشتراك في أكاديمية إعمل بيزنس

 


مقالات مشابهة

المزيد
كيف أبدأ في مجال التسويق بالعمولة؟
كيف أبدأ في مجال التسويق بالعمولة؟

  التسويق بالعمولة يعتبر بمثابة طوق النجاة والقشة

كيف تصبح كاتب محتوى سيو seo محترف؟
كيف تصبح كاتب محتوى سيو seo محترف؟

  مطلوب كاتب محتوى متوافق مع محركات البحث.... مطلوب

كيف يستفيد تجار الجملة والتجزئة من تطبيق تيليجرام؟
كيف يستفيد تجار الجملة والتجزئة من تطبيق تيليجرام؟

يبلغ عدد المستخدمين النشطين لتطبيق تيليجرام Telegram

أفضل  كورسات السيو التي يحتاجها كل مبتدئ في المجال 
أفضل  كورسات السيو التي يحتاجها كل مبتدئ في المجال 

هل تساءلت يومًا ما الذي يجعل الموقع س يظهر كنتيجة أولى

الأكثر قراءة

المزيد
12 نصيحة للترويج لعيادة 
12 نصيحة للترويج لعيادة 

 التسويق للعيادات أمر صعب جدًا وخصوصًا لو ملكش أي

مشاكل التسويق وحلولها
مشاكل التسويق وحلولها

 تتعرض الشركات لكتير من المشاكل التسويقية العصيبة،

مفهوم تقسيم السوق
مفهوم تقسيم السوق

تقسيم السوق أو الـ Segmentation من أكثر المصطلحات الهامة

إزاي تعمل براند ؟ 1
إزاي تعمل براند ؟ 1

هنبتدي النهارده معاكم سلسلة مقالات بعنوان إزاي

إزاي تعمل خطة تسويقية في 7 خطوات!
إزاي تعمل خطة تسويقية في 7 خطوات!

أهمية الخطة التسويقية : كتير من أصحاب المشاريع - وخاصة

دليلك الشامل لأهم 100 مصطلح في عالم التسويق 
دليلك الشامل لأهم 100 مصطلح في عالم التسويق 

يعد علم التسويق الحصان الرابح فى عالم  الأعمال

كيفية الربح من الفيس بوك: أفضل 13 طريقة لتحقيق الربح من الفيسبوك
كيفية الربح من الفيس بوك: أفضل 13 طريقة لتحقيق الربح من الفيسبوك

  يٌعد الفيس بوك أكبر منصة للتواصل الاجتماعي فيبلغ

تعريف SWOT analysis
تعريف SWOT analysis

ما هو تحليل سوت أو الـ swot analysis تعريف تحليل سوت أو الـ

شغل دماغك تعمل بيزنس
شغل دماغك تعمل بيزنس

لو كان لديك قوة ملاحظة تستطيع بها أن تلاحظ الفرص