- كلنا إتفاجئنا من قرار البنك المركزي برفع الفائدة لكن عايزين نفهم أو نحاول نفهم ليه البنك المركزي عمل كده وإيه تأثيره على البيزنس اللي هو المحور الرئيسي للموقع ... البنك المركزي قال في بيانه للزيادة (هدف تلك السياسة هو تقييد الأوضاع النقدية لإحتواء التضخم الضمني بعد إستبعاد صدمات العرض والذي يتأثر بتوقعات التضخم والضغوط الناجمة من جانب الطلب وليس لتحييد آثار الصدمات الناجمة من جانب العرض) بمعنى إن البنك المركزي شايف إن التضخم في مصر سببه إرتفاع الدولار لكن برضه البنك المركزي شايف إن بالرغم من زيادة الأسعار في المنتجات والخدمات لكن الربح الناتج عن زيادة الأسعار عوض النقص في المبيعات والزيادة في تكلفة الخامات .... (يعني لو مصنع كان بيبيع ألف وحدة سعر الوحدة ألف جنيه يعني مبيعات مليون جنيه وتكلفته 800 ألف جنيه كان بيكسب 200 ألف جنيه ....دلوقتي بيبيع 800 وحدة فقط سعر الوحدة 1500 جنيه يعني مليون ومائتين ألف جنيه والتكلفة للوحدة بدل ماكانت بـ 800 جنيه أصبحت 1100 جنيه يعني التكلفة أصبحت 880 ألف جنيه يبقى مكسب المصنع 320 ألف جنيه بدل ماكان بيكسب 200 ألف جنيه)

- بإختصار البنك المركزي شايف إن التجار والمصنعين زودوا السعر بنسبة أكبر من الزيادة اللي حصلت في الخامات وده عملهم مكسب أكبر من المكسب العادي وده له شواهد كتير سواء في الإقرارات الضريبية اللي اتقدمت 30-4 أو في بعض الشركات المقيدة في البورصه والأرباح الأكتر دي معناها سيولة أكتر وتضخم أكبر وزيادة الفائدة لسحب السيولة الزائدة من السوق للحد من التضخم وده السبب المعلن ...

- رأيي الشخصي القابل للخطأ إن السبب ده صحيح وممكن نديله رقم (أولا) لكن فيه أسباب تانية أدت لصدور قرار الزيادة ...

ثانياً الضغط علي حائزي الدولار بغرض السيطره علي سعر العمله وده هاييجي لما أقولك تعالي أديلك 20% وسعر الدولار دلوقتي 18 ج يعني لو بعته دلؤقتي كأنك بعته بعد سنه ب 21.6 ج وده سعر صعب إنه يتحقق في ظل إن 18 ج أصبحت مقاومة صعب تجاوزها برغم موسم رمضان سواء علي مستوي البضاعه والعمرة .

ثالثاً يضمن إنه لما يصدر سندات يتم تغطيتها بسبب ارتفاع الفائدة .

رابعا كده برضه بيحقق سياسة صندوق النقد الدولي اللي نصح مصر بزيادة الفائدة للسيطرة علي التضخم . ويبقي كده البنك المركزي المصري ضرب من وجهة نظرة 4 عصافير بقرار واحد وده مجرد تحليل للقرار وليس قناعتي الشخصية بالقرار .

- طيب سؤال مهم ....إيه تأثير ده علي البيزنس الخاص بينا ؟ رأيي الشخصي هو إن مفيش حد بيعمل بيزنس لما يلاقي فائدة أعلي هيصفي شغله ويحط فلوسه في البنك بفائدة أعلي لأن فائدة البنك أداه من أدوات الاستثمار ممكن تنافس البورصة أو السندات أو الذهب أو الأراضي والعقارات إنما إنك تعمل بيزنس فالموضوع مختلف لأنك معني إنك تعمل بيزنس إنك بتخاطر بفلوسك أو جزء مش صغير منها وانت عارف إنك أول سنه هتخسر وممكن تاني سنه وثالث سنه هتجيب مصاريفك وهتبدأ تكسب كويس في رابع أو خامس سنه وده الطبيعي ... وممكن يحصلك حالة غير طبيعية من المكسب الكبير في تاني سنة مثلا وتوصل في تالت سنه إنك تكسب 100% وهكذا ....البيزنس موضوعه مختلف البيزنس قائم علي المخاطرة والمدي الطويل من المصلحة والفائدة أما البنك فمصلحه معروفة وفائدة محصله علي المدي القريب .

- أتمني أكون وصلت اللي فهمته بشكل شخصي من زيادة الفائدة وبأكد تاني إني لما بحلل قرار مش معناه إني شخصيا مقتنع بيه لكن بحاول أفهم اللي طلع القرار طلعه ليه