FB Instagram Twitter Youtube Linkedin المزيج التسويقي الجديد.. من الـ4PS لــ 4CS  | أكاديمية اعمل بيزنس
 
الرجوع الى المدونة

المزيج التسويقي الجديد.. من الـ4PS لــ 4CS 

المزيج التسويقي الجديد.. من الـ4PS لــ 4CS 

زمان كانت عناصر المزيج التسويقي المتعارف عليها واللي بيدرسها أي حد بتاع تسويق هم الأربعة عناصر الأساسية الـــ 4PS (المنتج product – السعر price– الترويج Promotion– المكان place)، وده كان في ظل وجود وسائل الإعلان التقليدية زي التليفزيون والراديو والمطبوعات، لكن حاليًا ومع التقدم التكنولوجي وانتشار الإنترنت الوضع اختلف! 

"بوب لوتربورن" Bob Lauterborn أستاذ الإعلان والتسويق بجامعة"North Carolina " عمل تتبع للمنتجات الجديدة في السوق الأمريكي سنة 1990، ولقي إن 80 % من المنتجات دي فشلت، وده كان مؤشر كبير على إن عناصر المزيج التسويقي القديمة والمتعارف عليها محتاجة تتطور نتيجة دخول الإنترنت، وبالتالي دعا " لوتربورن" للتحولــ من الــ 4PS لــ 4CS أو لتطوير عناصر المزيج التسويقي القديم عشان تتلائم مع العملاء في عصر الانترنت.

طيب إيه اللي عمله الإنترنت وأثر على المزيج التسويقي ؟!
معظم العملاء زمان كانوا مجزئين في سياق السوق الشامل "mass-market "، وكان فيه إحكام وسيطرة على السوق قبل وجود الإنترنت، لكن دلوقتي أصبح السوق منفتح بشكل كبير، وطبيعة العملاء نفسهم اتغيرت نتيجة ظهور الإنترنت اللي أدي لتغير حاجتهم ورغباتهم، فكان لازم عناصر المزيج التسويقي تتطور هي كمان عشان تلائم الانفتاح ده، وبالتالي ظهرت الــ 4CS أو المزيج التسويقي الحديث زي ما بيسميه البعض.

ايه التطور اللي حصل في المزيج التسويقي؟

1- المنتج: تحول لـ " رغبات واحتياجات العميل" (Consumer wants and needs (vs. Products):
زمان كنت ممكن تعمل المنتج أو الخدمة بتاعتك، وتحاول تقنع الجمهور بيها عن طريق التسويق التقليدي، دلوقتي الفرضية دي مبقتش موجودة، وأصبح لازم تعرف حاجات ورغبات العميل الأول وبعدين تقدم خدمة أو منتج يلبي الاحتياجات دي.

2- السعر: تحول لـ " تكلفة إرضاء العميل" (Cost to satisfy (vs. Price:
قبل الإنترنت كان السعر عبارة عن "تمن المنتج وبس"، لكن دلوقتي بقي تمن المنتج حلقة واحدة من سلسلة من الحاجات اللي بترضي العميل، يعني إيه ؟! لو انت فاتح مطعم مثلًا فالسعر مبقاش هو تمن السنادوتش اللي بيدفعه العميل وبس، كمان فيه تكلفة الانتقال للمطعم وتكلفة ركن السيارة وسهولة الوصول للمطعم وكمان راحة العميل وهو بياكل السندوتش! كل ده لازم تحطه في اعتبارك عشان ترضي العميل بتاعك، فالموضوع مبقاش مقتصر علي تمن الشراء وبس، لكن التكلفة الكلية بالنسبة للعميل.

3- المكان: تحول لـ " راحة العميل " Convenience to buy (vs. Place): باختصار تقدم المنتج اللي بيحتاجه العميل في الوقت اللي يناسبه والشكل اللي يريحه؛ وده لأن العميل دلوقتي -ومع وجود الانترنت-مبقاش مضطر ينزل السوق عشان يشتري سلعة أو منتج، ومبقاش مضطر يدفع فلوس كاش وممكن يشتري أونلاين بسهولة؛ وبالتالي لازم تدور على المكان اللي يريح العميل مش المكان المتاح بالنسبالك.

4- الدعاية: تحولت لــ " الاتصالات " (Communication (vs. Promotion: قبل كده كانت الدعاية عبارة عن إعلانات من طرف واحد وكنت انت اللي بتخاطب العميل وبس، لكن وجود الانترنت خلي الدعاية عبارة عن اتصال بينك وبين العميل وأصبح الموضوع عبارة عن حوار واخد وعطاء، ولازم تشوف أراء وتعليقات العملاء ومدي رضاهم عن المنتج بتاعك وتغليفه وكمان وسائل الدعاية والإعلان نفسها!

باختصار، الـ 4PS كانت بتركز على التسويق من وجه نظر البائع وعناصرها كانت (المنتج والسعر والمكان والترويج)، لكن الــ4CS بتهتم بالتسويق من وجه نظر المشتري وعناصرها (القيمة للعميل والتكلفة بالنسبة للعميل والراحة والاتصال).

 

شارك المقال :