920033973
16342
article

المسار الوظيفي ج1

September 14, 2017    

كيف أحدد المسار الوظيفي الـCareer Path
- كان ليا صديق فاتح شركة سنة 2005 وكان بيزورني في شركتي وأنا بزوره في شركته اللي وقتها كانت عبارة عن 5 أفراد تقريباً وكنت بساعده في تعيين بعض الوظائف نظراً إن خبرته بالبيزنس كانت ضعيفة وهو كان فاتح الشركة لتنفيذ مشروع مؤقت وفعلاً قدرت إني أساعده بشكل كويس وعينت معظم أفراد الشركة أو فريق العمل ....المهم كان من ضمن الفريق شاب كان عنده تقريباً 22 سنة وكان حابب يشتغل في التسويق وفعلاً تم تعيينه في شركة صديقي وكان شاب متحمس وعايز يتعلم ويشتغل عشان يحدد المسار الوظيفي بتاعه لكن صديقي لأنه معندوش خبرة في البيزنس ولم يكن لديه نيه إنه يكمل أطلق علي كل فريق العمل لقب مدير بمعني إن الموظف الوحيد في الفريق اللي عليه مهام التسويق قاله إنت مدير التسويق ...والموظف الوحيد في فريق العمل الموكل ليه مهام البرمجة قاله إنت مدير البرمجيات ...وهكذا :)

ايه الفرق بين المسار الوظيفي للموظف والمسار الوظيفي للمدير
- طبعاً صديقي كان بيوزع الألقاب من باب التشجيع وإن إيه يعني ما نفرح الشباب وبعدين هيا الألقاب دي حكر علي حد ولا عليها ضرايب مثلا ؟؟
لكن المشكلة مش في صاحب الشركة اللي فعلاً مش فارقة معاه ولكن في فريق العمل اللي ممكن بعضهم في وقت معين يصدق التسمية ويثبت عنده إنه مدير ويمسك في الكلمة وده اللي حصل مع الشاب اللي اشتغل في التسويق وبعد ما صديقي أغلق شركته كما هو مخطط لقيت الشاب ده بيتصل بيا وبيقوللي إنه عايز ينضم لفريق العمل عندنا في الشركة طبعاً أنا رحبت جداً وحددت معاه موعد تاني يوم واجتمعت معه للاتفاق على التفاصيل وبعد محادثة مني عن طبيعة دورة في التسويق لقيته بيستغرب جدا !!!

- سألته إيه المشكله بالظبط في كلامي أو في العرض اللي أنا قدمته له قاللي أنا جاي أشتغل مدير تسويق مش فرد عادي حاولت أفهمه إن فريق التسويق عندنا في الشركة كبير وبيديره شخص معاه ماجستير في إدارة الأعمال اللي أنا ساعتها مكنتش حصلت عليها وإنه هيستفيد جداً لما يشتغل معاه وياخد من علمه وخبرته فلقيته يرفض بشده وحسم وإنه طالما وصل للقب مدير مش هينفع (ينزل) تاني لمسوق عادي :) وطبعا ً لم يلتحق بالوظيفة الموجودة واللي كانت فرصة ليه وقعد يدور على شركة تقبل بيه كمدير وهو عنده سنه أو سنتين خبرة المهم أنا عايز أتكلم باختصار شديد في نقاط محددة :

ازاي تحدد المسار الوظيفي فى شركتك

أولاً لازم تفهم إن المدير ده مش لفظ لكن مسئولية وعلم وإنك لو حصل بالصدفة إنك بقيت مدير فانت كده بتحرق مراحل كتير في المسار الوظيفي بتاعك لأن الرجوع عنها بيبقي صعب وفي نفس الوقت لو انت اخدتها في شركة نتيجة ظروف معينه ممكن بعد كده متلاقيش شركة بنفس الشكل تقبل بيك.

ثانياً انت عندك وقت لازم تتعلم فيه علشان تشتغل على المسار الوظيفي و لما تبقي مدير تطبق اللي اتعلمته وتعلمه للي تحت منك فلو الوقت ده إنت ضيعته أو نطيته هتبقي مدير فاشل لا انت عارف حاجه علشان تطبقها ولا فريقك بيستفيد منك بعلم أو خبرة علشان كده قابلت ولا زلت ناس كتير بترفض الترقية مش هربا من المسئولية ولكن لإحساسها إنها لسه محتاجة تتعلم علشان لما تاخد الخطوة تبقى أدها.

ثالثاً لازم تقيس نفسك بالسوق مش بشركتك بمعني إنك لازم تشوف المدير في السوق بتاعك أو في الصناعة بتاعتك بيبقي خبرته كام سنه وايه المسار الوظيفي للمسمي الوظيفي ؟ علشان دايما لازم تفكر إنك ممكن تسيب شركتك الحالية بكره (علي سبيل المثال) فلازم تقيس نفسك في السوق ومتقبلش اللقب وخلاص.

رابعاً الشركات بره لما بتبقى عندها مشكلة في مدير ساب الشركة مثلاً وفيه حد موجود ينفع يبقي مكانه لكن خبرته أقل إخترعوا حاجه اسمها Acting as Manager يعني انت مش مدير لكن هتشتغل سنة أو اتنين كأنك مدير لحد ما تبقي مناسب لمسئوليات المنصب وبعد كده تاخد الترقية أفضل ما أرقيك وألاقيك مش مناسب فاضطر استغني عنك لأني مش هجيب مدير جديد علي مدير سابق وده تأمين للموظف وللشركة معاً.

أخيراً محدش يستعجل وكل حاجه بأوانها ولازم يبقي عندنا تخطيط واضح للمسار الوظيفي Career Path ولو أنا أخدت كل لقب متأخر سنة أو اتنين أحسن من إني أخده بدري وأفشل ويتحرق مساري الوظيفي أو تبقى علامة سوداء في مسيرتي تأخرني على المدى الطويل وتضرني اكتر ما تنفعني وربنا يوفق كل المجتهدين اللي بيعرفوا يخططوا صح

 


مقالات مشابهة

المزيد

الأكثر قراءة

المزيد
المسار الوظيفي ج1
المسار الوظيفي ج1

كيف أحدد المسار الوظيفي الـCareer Path- كان ليا صديق فاتح

تعرف على انواع اسوأ شركات بالعالم
تعرف على انواع اسوأ شركات بالعالم

كيف تتعرف على انواع اسوأ الشركات بالعالم؟ سؤال يطرح

التناوب الوظيفي
التناوب الوظيفي

"التناوب الوظيفي".. الشغل على طريقة جيل الألفية عادة

حدد مرتبك بنفسك
حدد مرتبك بنفسك

أخيرًا.. أنت اللي هتحدد مرتبك مفيش حد فينا ما حلمش