FB Instagram Twitter Youtube Linkedin المشاريع الضعيفة هي اللي هتقفل | أكاديمية اعمل بيزنس
 
الرجوع الى المدونة

المشاريع الضعيفة هي اللي هتقفل

المشاريع الضعيفة هي اللي هتقفل

من سنتين أحد مستشاري تطوير الأعمال اجتمع بإخواته اللي عندهم بيزنس عائلي في مجال المطاعم ونصحهم يطوروا نفسهم وإاا هيقفلوا خلال 3 سنين وطبعاً لم يقتنعوا لأنهم كانوا شايفين إنهم بيكسبوا كويس وشغالين ( بما يرضي الله ) وبقالهم 15 سنة ( زي الفل ) ليه يغيروا من طريقتهم أو يدفعوا فلوس في التطوير وكان بيحكيلي على تفاصيل التطوير باعتباره بيشتغل معايا في الشركة .... من كام يوم هما طلبوا الإجتماع معاه وبلغوه إنهم تقريباً هيقفلوا لأن فاتورة الغاز زادت والرواتب زادت والخامات زادت وكل حاجة زادت بزيادة الدولار فرد عليهم إن الزيادة دي على كل الناس .... ليه فيه مطاعم بتتوسع ومطاعم بتقفل فردوا عليه إن دي أرزاق ومحدش بياخد أكتر من نصيبه ومشي من عندهم على إنهم هيصفوا النشاط في أسرع وقت وإن ده نصيب وهما مكانش في إيديهم إنهم يعملوا حاجة بالعكس الناس بتشتغل بإخلاص وبتتعب في الشغل جداً .

طبعاً أزمة الدولار وتأثيرها على البيزنس كبير وده اللي إحنا بنحاول نعالجه في السلسلة دي لكن في النهاية أي أزمة هيبقي ضحاياها الأضعف في السوق اللي أصلاً كانت عنده مشاكل كتيرة وهو كان بيحاول يغمض عينه عنها أو لم يطور نفسه وشغال بنفس الطريقة طالما دخله كويس وده أكيد هيخرج من السوق إلا لو ربنا كرمه واستعان بحد شاطر وطور نفسه بسرعة .... زي أي مرض أو حتى ضربة الشمس ممكن يتعرض ليها الملايين لكن فيه كبار السن والمرضى والضعفاء هما اللي بيموتوا تأثراً بيها .

أي شركة أو بيزنس أو مؤسسة محتاجة تطوير مستمر لأن كل حاجه بتتغير والدولار مش أول مشكله ولا هيبقى آخر مشكلة بالعكس ميزة مشكلة الدولار إنه مشكلة على الكل مش مشكلتك لوحدك كشركة يبقى فيه ناس هتقدر تتعامل معاها صح وناس لأ وأي بيزنس بيحصل فيه كده لو رجعت بذاكرتك هتلاقي محلات وسط البلد وعبد العزيز كانت واخدة معظم سوق الأجهزة الكهربائية في مصر من 30 سنة وكان المحل ما بيعملش أي مجهود وبيبيع مبيعات رهيبة دلوقتي بقى فيه محلات كبيرة داخل المولات أخدت منهم جزء من السوق وبعد كده المواقع الإلكترونية أخدت منهم جزء من السوق وبعد كده سلاسل المحلات المتخصصة الضخمة أخدت منهم جزء من السوق ولم يعد العميل لازم ينزل وسط البلد في الزحمة ويطلع عينه في ركنة علشان يشتري تلاجة ولا تليفيزيون دلوقتي أي هايبر أو مول فيه كل ده من غير خنقة وكمان بدل ما ينزل من بيته خالص ممكن يعمل أوردر بأي قطعه إلكترونية أو كهربائية .

السوق دايماً بيتغير وهيفضل يتغير وكل يوم فيه جديد وكلمة السر ومفتاح البقاء هو التطوير والرؤية الإستراتيجية واللي لو مش موجودة عندك ممكن تطلبها من خارج الشركة أفضل ما تتجمد وتشتكي إن السوق مش زي الأول لأن مش المفروض يبقى السوق على طول بنفس الوتيرة والنظام وبدل ما تضطر في الآخر تصفي مشروعك اللي تعبت فيه لكن تعبك كان في الإتجاه الخاطيء

شارك المقال :