ممكن تبقى غني بعد الـ35 .. أصل النجاح مالوش سن

اليومين إلي فاتوا كان فيه كام تريند كده انتشروا على مواقع التواصل الاجتماعي، وكان منهم تريند أثار جدل كبير قوي وهو تصريح لرئيس مجلس إدارة مجموعة صيدليات "19011"، لما قال إن "اللي وصل 35 سنة ولسه فقير يستاهل يفضل فقير"!!

التصريح ده أثار غضب ناس كتير جدا-وبصراحة عندهم حق - يعني إيه إلي يدي أي حد حق يحكم بمصير الفقر على واحد لمجرد إنه وصل سن 35 ولسه ماعملش فلوس؟؟؟

طبعا التصريح ده خلانا نسأل نفسنا سؤال مهم... إيه هو سن النجاح؟ إيه السن المناسب إلي لما أوصله لازم أكون نجحت في شغلي أو البيزنس بتاعي وبقى معايا فلوس، وأقدر ساعتها أقول إني نجحت عشان عملت فلوس كويسة؟

الحقيقة إن مافيش وقت محدد لده، مافيش سن لازم لما أوصله أكون بقيت غني، ولو عملتش ده يبقى هقضي عمري الباقي فقير وبشحت بقى ومش لاقي أكل.

ولو بصينا حوالينا وقرينا عن نماذج كتير لرواد ورجال أعمال ناجحين وأغنياء دلوقتي، هنلاقي إنهم بدأوا رحلة النجاح ديه وهما فقرا أو في مستوى مادي متوسط وعادي جدا، وكانوا في سن كبير قوي كمان!!

يعني عندنا مثلا "هارلاند ساندرس" أو المعروف أكثر بالكولونيل ساندرس، كان عمره 62 سنة لما أسس سلسلة مطاعم "كنتاكي" سنة 1952، وبعد 12 سنة باعه مقابل 2 مليون دولار، ساندرس بدأ مشروعه في سن كبير، وماكانتش حياته قبلها سهلة أو مرفهة، ده كان من طفولته عايش يتيم الأب وتحت خط الفقر مع أمه وأخوه وأخته، واشتغل كتير وهو صغير عشان يساعد أمه على تربية إخواته.

وكمان لما بدأ محاولاته عشان يأسس المطعم بتاعه بالخلطة السرية إلي توصل ليها وإلي بتستخدمها كنتاكي لحد النهاردة في آلاف الفروع ليها حول العالم، كان تجاوز الأربعين من عمره، وكمان واجه صعوبات كتير، وفشل أكتر من مرة، والبيزنس بتاعه وقع وكان بيفلس، وقام وعافر، وكانت بداية الإطلاق الرسمي لمشروعه ومن ثم انتشاره وتحقيق أرباح هائلة منه بعد ما تجاوز سن الستين.

خليني كمان أحكيلكوا قصة نجاح تانية بدأت بعد سن الخمسين، لسيدة مصرية اسمها عزة سالم، الست الرائعة ديه قررت تبدأ تعمل فلوس لنفسها بعد ما تمت خمسين سنة، وده كان في 2015 لما اتحدت العالم ونفسها وقررت يكون ليها حياة مهنية بتأسيس مشروع تجاري ليها من بيتها، واختارت مجال تصنيع الحلويات والمخبوزات وإلي على الرغم من وجود منافسين كتير فيه إلا إن اختيارها للمشروع ده جيه بسبب حبها لتجهيز الوجبات اللذيذة، وإلي بتقدر من خلالها تعبر عن حبها واهتمامها بالناس القريبيين منها، وفعلا أطلقت مشروعها "زوس - كيك".

دلوقتي عزة سالم دلوقتي كل شوية تكبر مشروعها وتضيف أصناف جديدة في قائمة الحلويات بتاعتها، لحد ما وصلت إنها بتعمل حلويات وتورت حفلات زفاف كبيرة.

عزة ما قالتش الوقت متأخر، ومش هينفع أعمل فلوس وأعيش في مستوى مادي كويس لأني عديت الخمسين، عزة كان عندها الشغف وقوة الإرادة وعشان كده نجحت وعملت فلوس رغم إن بدايتها كانت بعد سن الخمسين.

بس عشان نكون موضوعيين، كلامنا إلي فات ده لا يعني إنك تقعد مريح لحد ماتكبر وبعدين تبدأ تحاول، إنت برضه لو لسه موصلتش لفكرة تبدأ بيها تشتغل وتعمل فلوس، لازم تحاول على الأقل تستغل الوقت لحد سن 35 في إنك تشتغل على نفسك، وتطور مهاراتك إلي تساعدك بعد السن ده إنك تبدأ وتنجح وتعمل فلوس.

وعشان كده أي حد يوصل ل 35 سنه لازم يكون بقى غني بعلم ومهارات وتجارب حياتيه تخلي عنده القدرة علي كسب المال فيما بعد ال35 أو ال 40، كمان لازم تحاول تكون حددت الاتجاه الوظيفي إلي حابب تكمل فيه، صحيح كل واحد ليه ظروفه، وفيه إلي بيحدد قبل السن ده أو بعده، بس الأفضل إني على الأقل أكون حددت المجال إلي عايزة أنجح فيه وأعمل منه فلوس، عشان أقدر في سن 30-40 أشتغل وأخد الخبرة إلي هتخليني أعمل فلوس من المهنة أو المجال ده بعدين.

عايزين في النهاية نأكد على إن مقولة "It’s never too late" ديه حقيقية جدا، مافيش سن للنجاح، مافيش سن مناسب لإنك تعمل فيه فلوس وبعد ما تتجاوزه تبقى فرصتك ضاعت، النجاح ممكن يتحقق في أي وقت وفي أي سن طالما عند الفكرة المميزة وقوة الإرادة، وبتشتغل على نفسك وبتطور مهاراتك.