أولاً : أحب أوضح ان كل المعلومات الواردة هى نتاج بحث ونقل خبرات وكلها من أوثق المصادر العالمية ... ليه لو الدنيا ضاقت عليك ممكن تطلع تروح افريقيا باختصار لأنها أسهل على الجنسية المصرية وانها أوفر على حجم رؤوس أموالنا وانها أفضل فرصة موجودة قدامنا

ثانياً : حابب كده نوضح شوية معلومات غلط بتيجى فى دماغنا أول ما بنسمع كلمة أفريقيا :

1- دى بلاد مليئة بالأوبئة وشعوبهم مرضى .. الكلام ده مش حقيقى فى الغالب ده الوجه اللى الاعلام الغربى بيحاول يصدره ليك فى الوقت اللى كل الشركات الغربية موجودة وليها مستعمرات .. ظهور الأوبئة فى أفريقيا دايماً سببه الغابات اللى تفاعل الطبيعة بتاعها ممكن يفرز فيروسات عشان كده دايماً هنصحك لما تروح افريقيا خليك دايماً فى العاصمة بلاش موضوع الأرياف ومع ذلك الأمر محدود للغاية .

2- دى شعوب ياعم بتقطع فى بعض وحروب أهلية .. برده الكلام ده بقى محدود جداً يمكن معظم الدول الأفريقية أصبح عندها ديمقراطيات راسخة وتداول سلمى للسطة ومناخ جيد من الحرية ودى هى الدول اللى احنا هنختارها معاك .

3- ياعم مفيش دولار هناك ؟ ولا فى مصر فيه دولار بس دايماً بيستحضرنى مقولة حلوة للأستاذ / كريم صادق العضو المنتدب لمجموعة القلعة أحد أكبر المستثمرين فى افريقيا ان فعلا مفيش دولار فى البنوك بسبب القوانين بتاعة الحكومة بس سهل تشتريه من السوق السوداء وبفرق بسيط زى احوالنا قبل الثورة

4- ياعم مفيش طرق نقل ومواصلات ... فعلياً دى أكبر أزمة فى افريقيا بس فى 2016 بقى فيه تطور رهيب مثلاً انت ممكن تطلع بعربيتك من القاهرة الى جنوب افريقيا الطريق تم تشغيله وتجربته ونشرف ان شركتنا كان فيها زميل لتدشين الطريق مع الجانب السودانى .. وكمان فيه طريق حالياً بقى يربط من الشرق من ميناء بورتسودان الى ميناء داكار فى السنغال غرب افريقيا .. وكمان فيه خط قطر شركة القلعة من تنزاينا اوغندا وفيه كلام على وصوله الى اثيوبيا ....

شركة السكك الحديدية الصينية هتنتهى خلال 5 سنوات من انشاء خط قطار يربط اثيوبيا بجيبوتى بباقى الدول الحبيسة وحالياً جنوب أفريقيا مع الصين بيحاولوا ينفذوا مشاريع خط الحرير الصينى البرى ... أفريقيا فعلياً مبقاش فيها أزمة شحن

5- التعليم ... بص مصر فى مؤشر التنافسية العالمية واخده المركز قبل الأخير فى جودة التعليم فالبتالى أى دولة أفضل بس متقلقش فيه مدارس أمريكان وبريتش هناك وكله وأسعارهم أرخص من مصر 40% وطبعا مع جودة أعلى لأن أصحاب المدارس والعاملين فيها بالغالب أوربيين هربوا من أوربا الى افريقيا فعيالك هيبقوا مبسوطين جداً

6- النصب والسرقة ده مش فى كل الدول والغريبة هتلاقيه فى أقوى دولتين فى أفريقيا جنوب أفريقيا ونيجيريا بس ليه معالجات وفى الغالب النصاب محتاج حد غبى يصدقه

ثالثاً : ازاى ندخل السوق الأفريقية ؟ بص مفيش غير طريق واحد انك تروح وتفتح شركة هناك وهنتكلم بعدين فى تكاليف انشاء الشركة واجراءتها حتى لو عايز تصدر افتح مخازن هناك ووزع ده أسلم وأنضف طريق

رابعاً : ايه هى الدول اللى ممكن ندخلها ؟ أفريقيا فيها أكتر من 22 تجمع تجارى (مجموعة دول عاملة اتفاقيات مرور وعبور وتسهيلات مرور الافراد ) لكن فيها 4 تجمعات مهمة جداً ومؤثرة وهما تجمع (ايكاس) وده واخد دول من وسط افريقيا ومعاهم دول من الغرب وتجمع الغرب الافريقى واسمه (ايكواس ) وتجمع الوسط مع الشرق الافريقى واسمه (كوميسا ) وده بالمناسبة مصر فيه .. وتجمع اسمه (سادك ) وده بتاع الجنوب الأفريقى وده أقوى تجمع بقيادة العملاق جنوب افريقيا ... عشان كده احنا اخترنا مجموعة دول محورية فى كل تجمع .. الدول دى أسواق للدول الأخرى ومراكز توزيع لها ... مثلاً طول عمرك فاهم الصمغ بتاع السودان وهو فى الحقيقة من تشاد وهكذا .. الدول اللى احنا اخترناها هى ( كينيا - اثيوبيا - نيجيريا - السنغال - الجابون ) مخترناش جنوب أفريقيا لأنها صعبة وغالية عليك .

كينيـا .. كينيا تقع فى الشرق الأفريقى وسبب نمو كينيا اهتمامهم باللوجيستيات والنقل للدول الحبيسة من خلال ميناء مومباسا ، الناتج القومى لكينيا 65 مليار دولار عدد السكان 44 مليون نسمة معدل النمو المتوقع فى المتوسط 5% سنوياً مفيش تسرب فى التعليم تعالو نبص على أرقام ومؤشرات كينيا

1- تأسيس الشركات ..عشان تأسس شركة لازم تعرف الحاجات دى - عدد خطوات تأسيس شركة فى كينيا 11 خطوة - عدد الايام اللى تستلم فيها ورقك القانونى 26 يوم - مصاريف انشاء شركة فى كينيا 500 دولار تقريباً - رأس المال المدفوع واللازم لانشاء شركة صفر

2- الضرايب : هندفع ضرايب ايه هناك واجمالى الضرائب فى كينيا 37% مرتفعة بس نفس نظام مصر

3- لو أنا هفتح مخزن وأجيب بضاعة من مصر ايه اجراءات الاستيراد عندهم وتكلفتها - الوقت الازم للافراج عن الحاوية هو (22) يوم عمل - مصاريف غير جمركية للحاوية (900) دولار شاملة أرضيات وتأمين ال22 يوم

4- تكلفة المعيشة هناك .. ده بتفرق انت عايز تسكن فى حى مستواه ايه بس ايجار الشقق المفروشة من 750$ دولار شهرياً الى 1800 $ وممكن أقل .. معدل تضخم الأسعار عندهم متوسط 8% - ايجار مكتب ومخزن ممكن سنويا 30 ألف دولار

5- ايه هى المجالات المناسبة : أى صناعة هناك هتمشى وكمان الاستثمار والتطوير العقارى والمجال الطبى - التعليم - الأثاث - أجهزة الاتصالات - الأجهزة المنزلية - البلاستيك .

اثيوبيا .. بص البلد دى فيه مشاكل بس حوت قادم بقوة عندهم حكومة عارفة عايزة ايه وبتعمل ايه لبلدها بخلاف طبعاً بعض مشاكل الاوروميين اللى من خلال تواصلى مع البعض انهم مش معترضين على الحكومة غير بس فى خطط التنمية وتوزيع الأراضى الناتج القومى الاجمالى عندهم 70 مليار دولار بمتوسط نمو سنوى 8% عدد سكانهم 96 مليون .

1- تأسيس شركة فى اثيوبيا عدد خطوات تأسيس شركة 11 خطوة - عدد الأيام اللى تستلم فيها ورقك القانونى 19 يوم - مصاريف انشاء شركة 250 دولار تقريباً - رأس المال المدفوع واللازم لانشاء شركة 900 دولار

2- الضرايب : هندفع ضرايب ايه هناك واجمالى الضرائب 32% مرتفعة بس نفس نظام مصر

3- لو أنا هفتح مخزن وأجيب بضاعة من مصر ايه اجراءات الاستيراد عندهم وتكلفتها - الوقت الازم للافراج عن الحاوية هو (25) يوم عمل - مصاريف غير جمركية للحاوية (668) دولار شاملة أرضيات وتامين ال22 يوم .. وفيها اتفاقية كوميسا بتعفينا جزئياً من الجمارك على المنتج المصرى

4- تكلفة المعيشة هناك .. ده بتفرق انت عايز تسكن فى حى مستواه ايه بس ايجار الشقق المفروشة من 250$ دولار شهريا الى 600 دولار والفلل 1200 وممكن أقل .. معدل تضخم الأسعار عندهم متوسط 8% - ايجار مكتب ومخزن ممكن سنويا 12000ألف دولار

5- ايه هى المجالات المناسبة : أى صناعة هناك هتمشى وكمان الاستثمار والتطوير العقارى والمجال الطبى والمقاولات ومواد البناء والطاقة والتكنولوجيا - البلاستيك - الأثاث .

نيجيريا.. نيجيريا هى أقوى قوة اقتصادية فى أفريقيا عندهم شوية مشاكل مع منظومة الحكم الجديدة للقضاء على الفساد بس هتعدى وهتكون أقوى طبعاً نيجيريا مفيش أى خيار غير انك تشتغل فى لاجوس وتحديدا منطقة (لاجوس ايبادان) وطبعاً لازم تكون الحراسة أو الغفر من سكان المنطقة ... نيجيريا 600 مليار دولار سنوياً عدد السكان 180 مليون معدل نمو فى متوسط 3.5%

1- تأسيس شركة فى نيجيريا عدد خطوات تاسيس شركة 8 خطوة - عدد الأيام اللى تستلم فيها ورقك القانونى 28 يوم - مصاريف انشاء شركة 700 دولار تقريباً - رأس المال المدفوع واللازم لانشاء شركة صفر

2- الضرايب : هندفع ضرايب ايه هناك واجمالى الضرائب 33% مرتفعة بس نفس نظام مصر

3- لو أنا هفتح مخزن وأجيب بضاعة من مصر ايه اجراءات الاستيراد عندهم وتكلفتها - الوقت الازم للافراج عن الحاوية هو (37) يوم عمل - مصاريف غير جمركية للحاوية (1100) دولار شاملة أرضيات وتامين ال22 يوم ..

4- تكلفة المعيشة هناك .. ده بتفرق انت عايز تسكن فى حى مستواه ايه بس ايجار الشقق المفروشة من 1200 : 1500 دولار سكن راقى وطبعاً أقل لومتوسط وممكن أقل معدل تضخم الأسعار عندهم متوسط 7% - ايجار مكتب ومخزن ممكن سنويا 12000 ألف دولار

5- ايه هى المجالات المناسبة : أى صناعة هناك هتمشى وكمان الاستثمار والتطوير العقارى والمجال الطبى والمقاولات ومواد البناء والطاقه والتكنولوجيا وشركات خدمات البترول والسلع الغذائية المصنعة ومتفكرش فى الأثاث - الأجهزة المنزلية - الحبوب - البلاستيك

السنغال : السنغال من دول الغرب الأفريقى وفيه آمال ضخمة على سرعة نموها مشكلتها هى اللغة الفرنسية وميزتها انها سوق لكثير من الدول الحبيسة الناطقة بالفرنسية أيضاً اجمالى الناتج القومى هو 17 مليار دولار عدد السكان 15 مليون معدل النمو 4%

1- تأسيس شركة فى السنغال عدد خطوات تأسيس شركة 4 خطوة - عدد الأيام اللى تستلم فيها ورقك القانونى 6 يوم - مصاريف انشاء شركة 600 دولار تقريباً - رأس المال المدفوع واللازم لانشاء شركة 100 دولار

2- الضرايب : هندفع ضرايب ايه هناك واجمالى الضرائب 47% مرتفعة بس نفس نظام مصر

3- لو أنا هفتح مخزن وأجيب بضاعة من مصر ايه اجراءات الاستيراد عندهم وتكلفتها - الوقت الازم للافراج عن الحاوية هو (7) يوم عمل - مصاريف غير جمركية للحاوية (885) دولار شاملة أرضيات وتأمين ال22 يوم ..

4- تكلفة المعيشة هناك .. ده بتفرق انت عايز تسكن فى حى مستواه ايه بس ايجار الشقق المفروشة من 350$ دولار شهريا الى 800 دولار وممكن أقل .. معدل تضخم الأسعار عندهم متوسط 9% - ايجار مكتب ومخزن ممكن سنويا 10000 ألف دولار

5- ايه هى المجالات المناسبة : أى صناعة هناك هتمشى وكمان الاستثمار والتطوير العقارى والمجال الطبى والمقاولات ومواد البناء والطاقه والتكنولوجيا - الأثاث - قطع الغيار - الأجهزة المنزلية - الغلال والحبوب - البلاستيك طبعاً .