بنسمع كتير من كل اللي بيتكلم عن فن القيادة وإزاي تبقى قائد حقيقي مش مجرد مدير، إنك لازم تدّور على أعلى الموظفين في الأداء وأكثرهم تميزا وتعينهم، بس لو بصينا حوالينا هنلاقي الواقع بيحصل فيه غير كده، هنلاقي أمثلة عملية كتير لمديرين بيرفضوا ويخافوا إنهم يعينوا الموظفين المتميزين قوي، وبيفضلوا يختاروا موظف متوسط الأداء عن تعيين موظف مجتهد وأداؤه متميز.

وكمان بيحسوا بقلق كبير من مجرد التفكير في توظيف حد إنجازه عالي في شغله... ليه بقى؟ إيه إلي يخلي مدير يعمل كده؟ رغم إنه المنطقي إني كقائد لفريق العمل، أبقى عايز ناس شاطرة في الفريق بتاعي عشان ينجح.

دراسات كتير طلعت بخصوص القصة ديه، بس خلينا هنا نلخص أبرز الأسباب إلي بتخلي المدير يستبعد تعيين الموظفين الأفضل أداءً:

- يمكن أبرز سبب هو شخصية المدير اللي بيخاف يشتغل مع موظف يبان إنه أشطر منه هو شخصيا، موظف يبقى متميز وبيقترح أفكار مبدعة أفضل من المدير نفسه، أو يبقى الموظف معلوماته بالفعل أكبر وأوسع من المدير، لأن وقتها المدير بيخاف إن الموظف ده يغطي عليه ويبقى بمثابة تهديد لمنصبه، يعني باختصار مش بيبقى عايز يشتغل موظف هيقوم بمهامه كمدير في يوم من الأيام في المستقبل.

- أوقات المدير بيفضل يعين شخص متوسط ومرن الأداء، عشان ينفذ المطلوب منه من غير شكوى أو مناقشة.

- لما تكون الشركة حاطه معايير محددة للأداء والمرتبات، بيبقى صعب على مديرين كتير إنهم يوظفوا ناس متميزة، لأنهم مش هيقدروا يكافئوهم لما يتفوقوا في الأداء عن باقي الفريق، أو يكونوا سبب في زيادة أرباح الشركة بنسبة كبيرة نتيجة تميز أدائهم.

- فيه مديرين بيخافوا يشتغلوا مع ناس مبدعة بتطرح أفكار جديدة بشكل مستمر، لأنهم بيخافوا يجربوا حاجة مختلفة ويفشلوا فيها.

- مديرين تانيين بيكون مبررهم هو إن تعيين موظف متميز الأداء هيأثر بالسلب على باقي أفراد فريق العمل، وهيخليهم يحسوا إنهم مش كفء في شغلهم.

- فيه كمان نوع من المديرين بيحب ينسب لنفسه أي شغل كويس، وماحدش غيره ياخد شكر أو تقدير، وطبعا وجود موظف ذكي وشاطر في الفريق هيسرق الأضواء من المدير.

- لو شخصية المدير تتسم بالديكتاتورية، فهنلاقيه بيتجنب الموظف المبدع، يعني بيبعد عن أي حد بيبادر بالاقتراحات ومحاولات تحسين جودة الشغل، لأنه هيأثر على باقي الفريق وممكن يشجعهم يعملوا زيه، وطبعا الديكاتاتور اللي ماسك فريق العمل هيرفض يفتح الباب للموظفين عشان يتكلموا ويشاركوا.

- ممكن باختصار برضه يكون المدير عايز يوفر للشركة، والموظف الشاطر أكيد هيستحق مرتب أكبر.

طبعا اللي فات أكيد مش صح، وأسباب المديرين لتجنب تعيين الموظفين أصحاب الأداء الأكثر جودة أسباب مش منطقية، وبتضر أي شركة وبترجعها لورا أكتر.

طيب الصح بقى إيه؟ إزاي كمدير أقدر أجذب النوع المتميز من الموظفين لشركتي؟ وأتعامل معاهم إزاي عشان يطلعوا أفضل شغل ويبقوا مبدعين؟

1- كمدير لازم تتجنب أي انطباع شخصي، وتحكم على نتايج الشغل، ماتحكمش بناء على شخصية الموظف، أو طريقة أداؤه للشغل لأنها ممكن تكون مختلفة عن طريقتك، خلي معيارك هو النتيجة النهائية، لما يحقق الموظف نتيجة كويسة لازم تشجعه وتكافئه.

2- ارصد العقبات اللي ممكن تقيد أو تأخر الموظفين المتميزين عندك، وحاول توفرلهم كل الأدوات إلي ممكن تخليهم يؤدوا وظيفتهم بأكبر كفاءة ممكنة.

3- الموظف اللي بيسعى دائما للتميز وتحسين أداؤه في الشغل، بيبقى غالبا عنده دافع لده، اتعرف على دوافع موظفيك المتميزين وعززها، هتلاقي أدائهم أحسن وإبداعهم بيزيد، يعني لو موظف بيسعى للحصول على المدح والتقدير، تقدر تحققله ده، وتاخد منه شغل وإبداع أكتر.

4- أما بقى أذكى تصرف ممكن يصدر من مدير في تعامله مع الموظفين متميزي الأداء في فريقه، هو إنه يشوف هما بيعملوا إيه عشان يحققوا الأداء ده، ويبدأ يعلم المهارات ديه لباقي الفريق.

الخلاصة إن وجود موظف متميز بيحقق نتايج هايلة وبيبدع في فريقك، ممكن يكون سلاح ذو حدين، وعلى حسب طريقة تعاملك مع الموظف ده هتحدد السلاح ده هيفيدك ولا هيضرك ويضر فريق العمل كله.