انواع رواد الاعمال

4 أنواع لرواد الأعمال.. إنت مين فيهم

هل في تشابه ما بين ستيف جوبز ومارك زوكربيرج و والت ديزني ؟

متفكرش كتير، صحيح التلاته عندهم جينات الأبتكار وريادة الأعمال، وقدروا يعملوا بيزنس كبير ويحققوا ملايين ويكونوا من أنجح رواد الأعمال في العالم، لكن ده مش معناه أنهم متشابهين! لأن كل واحد منهم بيمتلك أسلوب ريادي وشخصية مختلفة، أهداف وأفكار مختلفة، وكمان نقاط قوة ونقاط ضعف مختلفة.

والكلام ده أكد عليه رجل الأعمال والمؤلف جو أبراهام من خلال دراسة بحثية حديثة أجراها على أكثر من 1000 رائد أعمال للإجابة على سؤال هل رواد الأعمال متشابهين؟، والنتائج اللي نشرها في " الحمض النووي الريادي " أكدت أن رواد الأعمال مختلفين وإنهم بينقسموا ما بين أربع شخصيات هنعرفهم دلوقتي:

البناء:

النوع ده من رواد الأعمال اتولد بس عشان يبني وينفذ مشروعات ومش ممكن يكون موظف في يوم من الأيام، عنده قدره على بناء شركات كبيرة وسريعة التطور، قادر يبني علامة تجارية تحقق ملايين في سنوات قليلة، ومش بيهتم بالمشروعات قليلة الأرباح، يعني أقل من 10 مليون جنيه مش هقبل. وده لأنهم عندهم طموح كبير ورؤية ومفيش سقف للمكاسب والأرباح اللي عايزين يحققوها.

قادرين ياخدوا قرارات وينفذوا استراتيجيات للتطوير بطريقة فعالة، لو حطتهم في أي مكان هيكونوا عارفين ايه اللي ممكن ينجح ويحقق مكاسب وإيه اللي لأ وإيه اللي محتاج تعديل، بيعرفوا يشوفوا المواهب ويجذبوا الموظفين الموهوبين للعمل معاهم، منظمين، عندهم خبرات ومهارات متعددة.

وفي نفس الوقت بيكونوا مزاجيين عندهم ميل كبيرة للسيطرة والتحكم في كل كبيرة وصغيرة في العمل، ومش بيهتموا بالعلاقات الشخصية بشكل كبير يعني ماشيين بمبدأ " انا في البيزنس معرفش ابويا "، بيشعروا بالملل بشكل سريع وبالتالي بيفضلوا يتنقلوا من مشروع للتاني بسرعة كبيرة.

صائد الفرص:

هو الشخص اللي عنده استعداد للمخاطرة بكل شيء لو شايف أن في فرصة كويسه (معظم رواد الأعمال بيكون جزء من شخصيتهم صائد الفرص)، بيروح أي مكان ممكن يكون فيه مكسب، النهارده بيشتغل في العقارات، بكرة تلاقيه بيشتغل في الاستيراد والتصدير.

المهم أنه يكون موجود في المكان المناسب في الوقت المناسب ويكسب أكبر قدر ممكن من المال في اسرع وقت ممكن، هو شخص متفائل وايجابي جدا ومعندوش أي مشاكل مع الفشل، ممكن يخسر النهارده ملايين ويصحى بكرة يبدأ في مشروع جديد، ونقطة ضعفه هو أنه اوقات كتير بيكون مندفع وبياخد قرارات متسرعة.

المتخصص:

رائد الأعمال المتخصص هو الشخص اللي بيبني البيزنس بتاعه بناء على مهارة او مجال هو متخصص فيه، بيعتمد على مهارات اكتسبها اثناء الدراسة او العمل زي المبرمجين والدكاتره والمهندسين، مشروعاتهم بتعتمد على الخبرة والعلم، بيميلوا لحساب وتحليل كل خطوة بيخدوها وبالتالي هما ضد المخاطرة والمجازفة بشكل كبير.

بيعتمدوا على معارفهم وشبكة علاقاتهم في العمل، معيار نجاحهم هو حجم دخلهم الشخصي، مشروعاتهم دايماً بتكون طويلة وبتعيش سنين، وعيبهم هو عدم سعيهم وراء الفرص والتوسع والتنويع.

المبتكر:

رائد الأعمال المبتكر هو شخص بقى رائد أعمال بالصدفة من غير أي تخطيط، يعني شخص جاتله فكرة حلوة ومبدعة وراح محولها لمشروع وهوب بقى رائد أعمال. بيركز على البحث والتطوير والابتكار أكتر من أدارة الأعمال والأمور المالية، لأن هدفه هو الوصول لابتكار جديد، مش بناء شركة جديدة.

الموضوع عندهم مش موضوع فلوس ومعيار نجاحهم هو مدى نجاح منتجهم او خدمتهم في خدمة البشرية وبالتالي معظم الابتكارات المؤثرة في العالم اصحابها هم رواد اعمال مبتكرين.

في رأيك أنت أنهي رائد أعمال فيهم؟ شايف نفسك شخص مبتكر، ولا صائد للفرص ولا شخص متخصص؟

ممكن نقول ان مفيش نوع منهم أفضل من التاني، كل نوع منهم له مميزات وله عيوب، والفكرة هنا هي معرفة نقاط القوة والاستفادة منها لتحقيق نجاح أكبر، وكمان معرفة نقاط الضعف وعلاجها او التعامل معاها بشكل صح، زي أنك تختار فريق عمل او تتعاون مع شريك يكمل اللي ناقص عندك، يعني لو انت متخصص محتاج تتعامل مع شخص صائد للفرص وهكذا.

مع العلم أنه مش بالضرورة شخصيتك تكون بتمثل نوع واحد من الأنواع الأربعة، يعني ممكن يكون عندك جزء من كل شخصية منهم، ممكن تكون متخصص وصائد للفرص وبناء في نفس الوقت.