أنشطة بناء الفريق ال Team Building.. مهمة ولا وكلام فاضي؟

أحلى إحساس وانا صغيرة كان لما ماما تيجي تاخدني من المدرسة في نص اليوم عشان رايحين مشوار، الإحساس ده لما كبرت بقيت أحسه عند كتير من زمايلي في الشغل لما الاتش ار يبلغهم إن هايبقى في فعالية لبناء فرق العمل Team Building event.

فعاليات بناء فرق العمل دي عبارة عن نشاطات بتنظمها الشركة في أماكن ترفيهية وسياحية ورياضية للموظفين عندها، الهدف من الفعاليات والأنشطة الترفيهية دي إنها تساهم بشكل إيجابي في زيادة التفاهم وتعميق العلاقات بين أفراد فرق العمل وده من خلال تقضيتهم لوقت ممتع وترفيهي مع بعض.

والحقيقة إن اليوم ده، وفي بعض الأحيان مجموعة الأيام اللي بيتم فيها نشاطات بناء فرق العمل، فيه جزء من الموظفين بيقابلها بفرح وترقب كبير جدا، والجزء التاني بيعتبرها نشاط تقيل على قلبهم وتضييع وقت وكلام فاضي ملوش لازمة، والكلام ده بيخلينا نسأل ليه ال Team Building eventsفيه شعور متضارب حواليها كده؟

الشعور المتضارب ده بيكون بسبب الإيجابيات والسلبيات اللي بتخلقها النشاطات دي، فلما بيتم تنظيمها صح بتكون نتائجها إيجابية بتحسن من إنتاجية الموظفين، أما لو اتعملت غلط فالنتائج بتكون عكسية، وفي البوست ده هانقولك على إيجابيات وسلبيات ال Team Building events اللي لازم تاخد بالك منها قبل ما شركتك تنظم أي ايفينت أو نشاط الفترة الجاية، وتعالوا نبدأ الأول بالإيجابيات:

• زيادة التفاهم: كل فرد في الشركة عنده تجارب ومستوى تعليمي وأراء خاصة بيه، وبالتالي أي مشكلة في الشغل كل واحد هايبصلها بشكل مختلف عن التاني، وأنشطة بناء فرق العمل هتساعد الأفراد دول على إنهم يتواصلوا بشكل أفضل ويتفهموا التجارب المختلفة لكل واحد فيهم.

• تخفيض الضغوطات: النشاطات دي بتخرج الناس من بره مود الشغل والمكتب لأنها هدفها هو الترفيه، وحتى الناس اللي بتكره التجمعات دي بيقدروا فكرة إنها بتبعدهم شوية عند الشغل والمشاريع المجهدة معظم الوقت.

• بتحسن الإنتاجية: لما كل واحد يفهم التاني أكتر، بيقدر يستوعب نقط قوة وضعف غيره، وبالتالي بيقدروا يتكيفوا كفريق عمل مع بعضهم وفي النهاية إنتاجيتهم هتزيد بشكل عام.

• تطوير أدوار فريق العمل: كل عضو في فريق العمل له دور محدد مسئول عنه، في ناس تفكيرهم مبدع، وفيه اللي شاطر في تفويض المهام، وفيه اللي بيتعرف على الأخطاء الصغيرة بسرعة وبيعرف يحلها، ولو الشركة عرفت تخلي الفريق ده يشارك في نشاطات بتركز على الأدوار دي، فالفريق هايبقى عارف كل واحد منهم بيتميز ايه وهايبقى مرتاح أكتر في اللي بيعمله.

لكن زي ما قولنا النشاطات المتعلقة ببناء فرق العمل فيه كتير بيشوفوا إن ملهاش لازمة وإن سلبياتها أكبر من إيجابياتها وده بسبب حاجات كتير منها:

• خسارة في وقت الشغل: معظم نشاطات بناء فرق العمل عادة بتحصل في أيام العمل، ده طبعا معناه إنك بتاخد من وقت الشغل وبالتالي لو مش متأكد إن اللي هتحققه من النشاطات دي هيتفوق على الوقت المهدور من الشغل فده يعتبر خسارة كبيرة.

• عملية مكلفة: زي ما قولنا هي هتاخد من وقت الشغل، وطبعا الوقت ده بفلوس ده غير إنك كمان هتتحمل تكلفة الايفينت أو النشاط ده وهتدفع تكلفة عمل الموظفين عندك اللي فعليا مش بيكونوا بيشتغلوا، وخلينا نكون واضحين هتلاقي منين موظفين هايوافقوا يطلعوا ايفينت زي ده مع زمايلهم اللي بيشوفوهم كل يوم ببلاش وانت خاصملهم اليوم من مرتبهم مثلا.

• مش كل الناس اجتماعية: في بعض الموظفين هتلاقيهم مقبلين أوي على إنهم يلعبوا شد الحبل مع زمايلهم، لكن في موظفين تانيين هيحتاجوا وقت عشان يقدروا يكون مرتاحين في فعل النشاطات دي، وده طبعا معناه إنك هتحتاج تكرر النشاطات دي على مدى أكتر من يوم لغاية ما يتعودوا عليها.

• في بعض الناس مش بتعرف تشتغل مع بعض كويس: أكيد بنصادف في الشغل ناس تحسهم ناقر ونقير ومش عارفين يشتغلوا مع بعض، إجبار الناس دي إنها تشتغل مع بعض بيكون عامل زي لما تصمم تدخل كورة في خرم إبرة، وساعتها هيكون نتيجة نشاط بناء فريق العمل اللي بتحاول تعمله هو إنك بتزود التوتر بينهم أكتر ما بتزود الإيجابية.

فعاليات بناء فرق العمل ليها مميزات وفوائد ممكن تحسن من الوضع العام لشركتك والموظفين فيها لكنها برده ممكن تكون سبب في مشاكل وسلبيات تانية، وعشان تتفادى أي سلبيات لازم يتم دراسة النشاطات اللي هتنظمها كويس جدا وتدرس هي ممكن تخدم فريق العمل عندك في ايه بالظبط.