فى إحدى الشركات كان عندنا منتج بيكسب كويس وأخدنا قرار بغلق القسم وبإنهاء المنتج وحاليًا لدينا منتج يخسر بشدة ومع ذلك أخدنا والشركاء قرار فى التوسع فيه وضخ المزيد من المال وزيادة الإستثمار فيه، فإيه هى المحددات إللى تخلينى أقفل منتج أو أقرر إنهاء مسيرته بالرغم إنه ممكن يكون بيكسب ؟؟؟

فيه محددات كتير خلينا ناخدها خطوة خطوة وبعدين نقول الخلاصة ...

أولًا هل المنتج ده متميز ولا فيه زيه كتير فى السوق؟

بمعنى عدد المنافسين إللى بينافسونى فيه، المنتج الأول كان بدأ يبقى فيه عدد منافسين كتير مما خلى فيه المنافسة صعبة جدًا والمجهود المبذول عنيف لتحقيق مكسب .

ثانيًا هل هناك عوائق بتمنع المنافسين للدخول فيه مستقبلًا ولا لأ Entry Barriers

والعوائق دى زى مثلًا رأسماله كبير (يعنى مش أى حد معاه قرشين هايفتح وينافسنى بكره) أو يكون له Know how صعب سر صنعة يعنى .لو البيزنس أو المنتج له عوائق كتير وإنت دخلته خلاص يبقى صعب توقفه حتى لو بتخسر فى البداية .

طبعًا المنتج إللى أنا قفلته كان له سر صنعة فى الأول وبعدين السوق كله عرفه فبقى أى حد بيفتح وبياخد من السوق .

ثالثًا فى أى مرحلة المنتج ؟

(دورة حياة المنتج 4 مراحل البداية ثم النمو ثم النضج ثم الإنحدار) وهانشرح المراحل دى بعد كده .

لو فى المراحل الأولى وبتخسر يبقى ده طبيعى إنما لو وصلت للمرحلة التالتة وبتكسب مكاسب بسيطة يبقى فيه حاجة غلط . طبعًا المنتج إللى خدنا قرار بغلقه كان فى المرحلة الرابعة مرحلة الإنحدار واللى واخدين قرار بالتوسع فيه لسه فى المرحلة الثانية اللى هى النمو .

رابعًا الفرصة البديلة

ودى حسابها مهم جدًا، فى حالة المنتج اللى وقفناه كان بياخد 85% من رأس مال الشركة علشان يكسبنا 100 ألف ج مثلًا وكان فيه منتج تانى لسه بادئ وكان بياخد 15% من رأس مال الشركة ومجهودها وكان بيكسبنا 150 ألف ج مثلًا فى السنة .

وفشلت محاولاتنا فى تطوير المنتج التانى اللى بيكسبنا كويس وبياخد مجهود قليل فى ظل وجود منتج ضخم وله مشاكل كتير جدًا وفى ظل محدودية المصادر (رأس مال – كوادر إدارية .... إلخ ) خدنا قرار شجاع بإلغاء النشاط الأول مما تسبب لينا فى كثير من النقد من العملاء والمعارف والموردين ولكن إحنا حسبناها كويس وحسبناها صح

خامسًا البعد الإقليمى

من الآخر أحسن الكلمة شكلها صعب إنت بستهدف مين وفين ؟ يعنى المنتج الأول كان بيستهدف مصر والمنتج الثانى بيستهدف العميل الأوروبي ونظرًا لأن الناس دى معاها فلوس وبتدفع وفرق العملة كبير يبقى نعالج مشاكله ونصبر عليه أفضل

سادسًا المجهود المبذول وحل المشاكل

فيه منتج بيخسرك بس إنت مبذلتش مجهود علشان تعرف إيه الغلط بتاعك ولو عرفت الخسارة هاتبقى مكسب كبير وفيه منتج إنت بذلت مجهود كبير فيه وحليت كل المشاكل المحتملة ومع ذلك بيخسرك يبقى كفايه عليه كده ونقفله ولا نكمل فيه ؟

الخلاصة : تقريبًا إحنا بنستثمر فى المنتج إللى شايفين فيه المستقبل حتى لو بيخسر وبنوقف فى المنتج إللى شايفين فيه الماضى حتى لو بيكسب .

كان فيه مصنع تليفزيونات في مصر مشهور بيصدر تليفزيونات أبيض وأسود لأفريقيا لحد وقت قريب وكان بيكسب كويس تفتكروا المصنع ده يكمل فى إنتاج التليفزيون الأبيض والأسود ولا يركز فى إنتاج ( LCD ) ؟

طبعًا هاتقول الإتنين .... مش دايمًا بينفع إنك تكمل فى الإتنين لأسباب تمويلية وتشغيلية وإدارية ولو ينفع نكمل فى الإتنين بقوة ماشى .... لو ماينفعشى يبقى لازم نركز مع المستقبل .... وربنا يوفقنا جميعًا .