ايه فوائد زيادة منتج جديد وإيه مخاطره ؟

فى ظل الأوضاع الإقتصادية الصعبة يجب أن يفكر كل شخص لديه مشروع فى إضافة منتجات جديدة لمشروعه حتى يستطيع أن يقهر هذه الأوضاع وأحيانًا حتى فى ظل عدم وجود أوضاع إقتصادية صعبة يكون من الجيد جدًا أن يتم استثمار المشروع وتحقيق أقصى استفادة ممكنة من خلال إضافة منتجات أخرى .... لكن هل الزيادة مفتوحة بأى عدد من المنتجات ؟ وهل هناك شروط للمنتج الذى يتم إضافته ؟ وهل توجد شروط لهذا المنتج لكى يتم تقبله من العملاء ؟ وهل هناك مخاطر قد تنتج من زيادة المنتجات الجديدة ؟

تعالوا بقى بالبلدى نرد على الأسئلة دى

أولًا مميزات إضافة منتج جديد على المشروع

- طبعًا بأقل تكلفة ثابتة وأحيانًا بتكلفة ثابتة منعدمة لأنك كده كده بتدفع إيجار وبتدفع كهرباء وبتدفع حاجات كتير هاتزود منتج جديد ويبقى مكسبه مكسب صافى لأن كل المدفوعات الشهرية لا تزيد بإضافة المنتج .

أى حد فينا وهو بيطلب أوردر من سلاسل المحلات العالمية للساندوتشات بيقعد يقوله أحطلك بطاطس أو تزود حاجة ساقعة لأنه بيكسب فى الأطباق الإضافية أكتر من اللى بيكسبه من الساندوتش الأصلى :) علشان كده بيغتتوا شوية أحيانًا .

- تحقيق زيادة رضا للعميل لأنك بتبيع للعميل منتجين معنى كده أنه بعد ماكان راضى عن المكان لمنتج واحد زادت علاقته بالمكان بالمنتج التانى .

- الحفاظ على العميل من أن يذهب لمورد آخر لأنه ممكن وهو بيدور على المنتج التانى يلاقى حد بيبيع المنتج الأول اللى حضرتك بتبيعهوله فميرجعلكشى تانى وعلشان كده فيه شركات بتزود منتجات مبتكسبشى فيها علشان العميل بتاعها مايروحشى لمورد تانى أو محل تانى يبيعله منتجين أو أكثر .

ثانيًا ماهى شروط المنتج الجديد ؟

- يجب أن يكون المنتج الجديد يخاطب نفس الفئة التى يخاطبها المنتج الأول يعنى لو حد فاتح محل أحذية حريمى يبقى المنتج التانى يبقى شنط حريمى والمنتج التالت ميبقاش أحذية رجالى مثلًا إنما ماكياج حريمى أو ملابس حريمى أو إكسسوارات حريمى ودى أمثلة طبعًا توضح إن المنتجات الجديدة لازم توجه لنفس الفئة المستهدفة .

- أن يكون المنتج أوالخدمة على نفس المستوى من الجودة يعنى ما ينفعشى شركة بتبيع كاوتش عربيات ملاكى جودته عالية جدًا ولما تشتغل فى الفرش الداخلى للعربية تشتغل فى نوع شعبى لأن أكيد العربيات اللى بتيجى من فئة معينة وبرضه مينفعشى إن الشركة دى تكون بتشتغل فى الكاوتش الشعبى ولما تضيف منتج فرش داخلى للعربيات تجيب حاجة درجة أولى .... طبعًا هنا ما ينفعشى نضيف مثلًا كاوتش نقل كبير لأنه مش نفس الفئة المستهدفة (ممكن تحصل فى المحلات اللى بتعتمد على الموقع أكتر)

ثالثًا هل هناك مخاطر قد تنتج من زيادة المنتجات الجديدة ؟

طبعًا و إلا كان كل واحد بقى عنده 1000 منتج والمخاطر تتلخص فيما يلى :

- عدم تناغم المنتج الجديد مع الأول قد يأتى بشريحة جديدة قد لا تكون مؤهل للتعامل معها (أخف ضرر)

- فى حالة وجود مشاكل فى المنتج الجديد قد تخسر عميلًا كان يشترى المنتج الأول وراضى عنه وبكده لا فيه بلح الشام ولا عنب اليمن

فى حالة وجود سحب على المنتجين ومصادرك (رأس المال - العمالة... إلخ) غير مهيأة لمثل هذا المعدل قد تخفق فى المنتجين وتخسر عميلك الأول .

الخلاصة

من المهم جدًا خاصة فى هذا الوقت من الوضع الإقتصادى أن تضيف منتجات جديدة لكن يجب الإختيار بشكل جيد جدًا وبتأنى لأن الفشل معناه خسارة عميلك الأصلى