بص في جهازك عشان متتفصلش ...

 

أحيانًا بنسمع عن شركات بتفصل موظفين عشان مش بيشتغلوا كويس أو مش بيحققوا التارجت المطلوب منهم، لكن عمرك سمعت عن شركة فصلت موظف عشان بيبص على أجهزة زمايله!

 

ده اللي حصل في أحد الشركات بالفعل، كان فيه موظف دايمًا بيبص على أجهزة زمايله وهم بيشتغلوا، والموضوع ده كان مسببلهم إزعاج كبير، ورغم إن الشركة نبهت عليه أكتر من مرة بإن السلوك ده مرفوض في الشغل، إلا إن الشكوى من تصرفه اتكررت من كذا شخص، وهنا أخدت الشركة خدت قرار بفصله.

 

الحقيقة إن فيه حاجات كتير ممكن نعملها في الشغل ونبقى فاكرينها حاجات عادية، لكن ممكن تكون بتدايق زمايلنا وبتخرج عن قواعد اتيكيت التعامل مع الزملاء، خصوصًا إن معظم الشركات حاليًا بتعتمد على المكاتب المشتركة واللي بيسموها بالانجلش" Cubicle "؛ عشان يقللوا من النفقات المادية.

 

المكاتب دي بتكون مفتوحة على بعضها، وبالتالي لو مكنتش عارف قواعد التعامل مع زمايلي في إطار بيئة الشغل اللي في المكاتب دي، ممكن اتسبب في مشاكل أو إزعاج ليهم، وكمان ممكن الموضوع يتطور زي ما حصل مع الموظف ده.

 

عشان كده هنقدملكوا هنا أهم قواعد الإتيكيت اللي لازم تراعيها في المكاتب المشتركة: 

 

• استأذن قبل الكلام، وحتى لو هتسأل زميلك عن حاجة في صميم الشغل لازم تسأذن الأول وده بيكون عن طريق إنك بتخبط خبطتين على حائط المقصورة بتاعته، لأنه مش معني إنك قاعد جنبه ده يديلك الحق إنك كل شوية تكلمه وتعطله عن شغله أو تقطع عليه تفكيره.

 

• متاخدش حاجة من غير ما تستأذن حتى لو كان زميلك ده قريب منك إلا لو هو سمحلك بده، البعض ممكن يستهون بالموضوع ده ويشوفه عادي بما إنها مكاتب مفتوحة، وممكن كمان يستهون بالحاجة اللي بياخدهم سواء كانت قلم أو دباسة ورق، بس في الحقيقة ده خارج إطار الذوق العام، وكمان ممكن يسببلك مشكلة مع زمايلك اللي مش بيحبوا حد يستخدم حاجتهم.

 

• متباقش مزعج، لو حابب تتكلم في الموبايل اطلع بره المكتب، ولو عايز حاجه من زميل ليك روح لحد عنده واساله.. متناديش عليه بصوت عالي أو تشاورله من بعيد، ده منظر مرفوض!

 

• ما تبصش على صحبك من جنب المقصورة، ده سلوك مرفوض شكلًا ومضمونًا، عشان زميلك مش هيكون شايفك أو واخد باله إنك بتبص عليه، وبالتالي ده انتهاك لخصوصيته.

 

• لما تروح لزميلك عشان تسأله عن حاجة مترفعش عينك في جهاز الكمبيوتر بتاعه عشان ممكن عينك تقع على حاجة هو مش عايزك تشوفها زي ماسيدج خاصة ...الخ.

 

• اعمل موبايلك silent! ... تخيل المكتب لو فيه 20 موظف مثلًا وكل شوية موظف تليفونه بيرن، شوف كمية الإزعاج اللي ممكن تحصل؛ كمان حاول تتناقش في أمورك الخاصة بره المكتب، لأنه ده مكان للشغل بس. 

 

• تجنب الروائح القوية، يعني متحطش برفان ريحته مسمعه لآخر الشارع وتقعد فوسط زمايلك، رفقًا بمرضى الجيوب الانفية يا جماعة. 

 

• يستحسن بلاش الأكل خالص في المكان ده، ولو هتاكل يكون في حدود الأكلات اللي متعملش روائح أو إزعاج وتكون ساندوتشات يعني متروحش تطلب كشري وتقلب جو المكان.

 

• المقصورة للشغل بس ولو عايزه تحطي مونيكير أو روج ممكن تروحي الحمام أو أي مكان تاني. 

 

• عندك هيدفون في الجهاز استخدمها وبلاش تسمع موسيقي أو أغاني بصوت عالي أو تتندن مع الأغنية، روح المطرب اللي جواك دي ممكن تطلع في البيت مش في المكتب.

 

• حاول تفرق بين المقصورة بتاعتك وتابلوه العربية متفضلش ترصص في حاجات ملهاش لازمة، وتعلق نوتس عن فلسفتك في الحياة والطبيعية، كده شغلك هيتوه وسط الزحمة.

 

• معلش اتعب وهات حاجتك معاك عشان المكان ميتقلبش حضانة وكله بيستلف أقلام ومساطر، ده مش جو شغل، ولو هتستلف حاجة من زميلك يكون للضروة.

 

بشكل عام التعامل في المكاتب مبني على قاعدة أساسية وهي معاملة الغير كما تحب أن يعاملوك، يعني الحاجات اللي متحبش إنها تزعجك في شغلك بلاش تزعج بيها زمايلك، ولو شكيت في أي سلوك ليك داخل المكتب حاول تختبر ده بإن المدير بتاعك واقف جنبك وشايف اللي انت بتعمله أو شايف شكل المقصورة بتاعتك وشوف هل هيعجبه المنظر أو السلوك اللي انت بتعمله ولا لأ.