FB Instagram Twitter Youtube Linkedin بعد 5126 محاولة .. جيمس دايسون نجح في الوصول لهدفه | أكاديمية اعمل بيزنس
 
الرجوع الى المدونة

بعد 5126 محاولة .. جيمس دايسون نجح في الوصول لهدفه

بعد 5126 محاولة .. جيمس دايسون نجح في الوصول لهدفه

سيناريو بيتكرر وبنشوفه كتير، تجيلك فكرة لمنتج جديد أو خدمة، وشايف أنها اختراع عبقرى أو حل لمشكلة موجودة بالفعل، تبدأ تدرسها من كل الجوانب وتحط الخطط اللازمة، تقرر تحط كل فلوسك فيها أو تدور على حد يساعدك بالتمويل، وتبدأ تنفذ الفكرة وانت متحمس وعندك احلام كتير، وبمجرد ما الامور تمشي عكس توقعاتك أو الفكرة تفشل من المرة الأولى يجيلك احباط وتقرر أنك مش هتكمل!

وده عكس اللى عمله جيمس دايسون لما قرر يخترع أول "مكنسة بدون كيس" في العالم!

بدأت فكرة المكنسة لما كان جيمس بيستخدم المكنسة الكهربائية العادية، اللى اتعطلت فجأة بسبب تراكم الأتربة بداخلها، ساعتها بدأ يفكر إزاى ممكن يحل المشكله دي، وهل ممكن يكون فى مكنسة بتشتغل بدون كيس؟ وبعد تفكير كتير ومحاولات الوصول لإجابة، لاحظ جيمس دايسون أن جهاز نشر الخشب في مصنعه بيشتغل بدون كيس وبيعتمد على طريقة الإعصار أو التدوير في التخلص من نشارة الخشب، و ساعتها بدأ يفكر ليه ميعملش مكنسة بتشتغل بنفس الطريقة؟

بدأ دايسون سنة 1978 في تصميم أول نموذج للمكنسه، باستخدام مكنسة عادية وورق مقوى للتحقق من إمكانية تنفيذ الفكرة، وبعد خمس سنين من المحاولات المستمرة وتصميم 5126 نموذج فاشل، والكثير من الديون، نجح دايسون في المحاولة رقم 5127 فى تصميم أول مكنسة كهربائية تعمل بدون كيس في العالم!

بعد نجاحه في تنفيذ الفكرة سنة 1983، زى أي رائد أعمال، دايسون كان عنده توقعات كبيرة، أن كل الشركات هتكون عايزة تنفذ الفكرة، لكن الواقع كان مختلف، لأن الفكرة اترفضت من جميع المصانع والموزعين في بريطانيا، بسبب خوفهم من تأثير المكنسة الجديدة على مبيعات المكنسة التقليدية وأكياس الغبار البديلة، وبعد 3 سنين من فشل محاولات بيع الفكرة داخل وخارج بريطانيا، قرر جيمس أنه يسافر اليابان وقدر هناك أنه يصنع المكنسة بمساعدة شركة صغيرة اسمها أبيكس، وكانت متوفرة في اليابان فقط، وفازت المكنسة هناك بجائزة معرض التصميم الدولي سنة 1991.

ساعدت المبيعات الكبيرة في اليابان على توسع دايسون والرجوع بالمكنسه لبريطانيا سنة 1993، وإنشاء مصنع لإنتاج مكانس بدون أكياس لأول مرة فى بريطانيا، بدأ دايسون في التسويق للمكنسة من خلال حملة إعلانية فى التليفزيون تحت شعار "قل وداعاً لأكياس الغبار" واعتمد على إظهار الميزة تنافسية للمكنسة، أنك لما تشتري مكنسة Dyson مش هتحتاج بعدها تشتري أكياس بديلة، وأن المكنسة مش ممكن تتعطل تانى بسبب تراكم الغبار، بالإضافة أنها بتقدر توصل لأصغر جزيئات الغبار وبالتالي هتحصل على أفضل نتيجة تنظيف ممكنة.

نجحت الحملة الإعلانية وساعدت على انتشار المنتج وتحقيق مبيعات خيالية، لتصبح مكنسة دايسون واحدة من أكثر المكانس الكهربائية مبيعاً في كل أنحاء المملكة المتحدة، وبعد 3 سنين بدأ بيع المكنسة في أمريكا وتمكن المنتج من الاستحواذ على 20% من سوق المكانس هناك، وبعدها بدأ التوسع في آسيا واستحوذ على جزء كبير من الأسواق الآسيوية.

سنة 2006 بدأت تظهر منتجات جديدة زى مجفف يد دايسون، وحالياً بتحقق الشركة مبيعات تصل لأكثر من 3 مليار دولار سنوياً من بيع المكانس واجهزة تجفيف اليد ومجففات الشعر والمراوح بالإضافة لمنتجات الإضاءة وأجهزة تنقية الهواء

شركة Dyson دلوقتى تعتبر واحدة من أفضل المنتجين في عالم صناعة المكانس والاجهزة المنزلية المختلفة، بيشتغل فيها أكثر من 12 ألف موظف، وبتستثمر حوالي 10 ملايين دولار أسبوعيًا في تطوير المنتجات الجديدة، وآخر منتجاتها هو سيارة تعمل بالكهرباء سيتم اطلاقها سنة 2021

استمرار محاولات دايسون وإصراره على تصميم وبيع المنتج كان السبب فى نجاحه وتحقيقه لثروة تقدر بقيمة 13.9 بليون دولار، محاولات دايسون بتعرفك ان كل خطوة فى طريق تنفيذ مشروعك هتكون اختبار لإرادتك وصبرك، وده معناه انك لازم تكمل ومتستسلمش لانك فشلت مرة ولا اتنين ولا عشرة ، لأن الفشل هيعلمك اكتر بكتير من النجاح، ولأن كل منتج فاشل او محاولة فاشلة هتقربك خطوة واحدة على الأقل من المنتج الصحيح.

وكمحاولة منك لتقليل عدد محاولات الفشل، لازم قبل ما تبدأ فى اى مشروع، تكون درست فكرتك كويس، وعملت أبحاث أولية عن المنتج والسوق والعملاء المستهدفين، وحاولت تنفذ نموذج أولي Prototype تقدر تعرضه على الممولين او المستثمرين للحصول على التمويل المناسب، بالاضافة انك قبل إطلاق المشروع لازم تنفذ نموذج MVP من المنتج أو الخدمه اللى هتقدمها، والـ MVP هو (منتج الحد الأدنى) يعنى تنفذ نسخة نهائية من المنتج او الخدمة بأبسط شكل ممكن وأقل موارد وتكاليف ممكنة،.بهدف اختبار السوق، ومعرفة إذا كان الناس محتاجه للمنتج فعلاً ولا لا، وبالتالى تعليقات ورأى الناس هيساعدك تاخد قرار انك تكمل وتطور من المنتج ولا توقف المشروع وتبدأ فى فكرة جديدة.

شارك المقال :