FB Instagram Twitter Youtube Linkedin بعد أيه يابني منا خلاص كبرت | أكاديمية اعمل بيزنس
 
الرجوع الى المدونة

بعد أيه يابني منا خلاص كبرت

بعد أيه يابني منا خلاص كبرت

في مقولة بتقول "السن مجرد رقم وليس حالة ذهنية وليس مبرر لأي نشاط بتقوم به"

 

طبعاً أحنا لو جينا نطبق الكلام ده في مجتمعاتنا هنلاقي أن الموضوع عكس كده خالص لأن أحنا عندنا الراجل أو الست بيوصلوا لسن الـ 40 وبتجيلهم حالة من "بعد أيه يابني منا خلاص كبرت" على الرغم من أن أحسن سن بتكتمل فيه خبرة الشغل هو بعد الـ 40 لأن الشخص بيكون شاف مواقف وخبرات كتير لدرجة أنه بيبقى عنده حل لأي حاجة بتواجهه في الشغل وأكبر دليل على كده الأمثلة اللي هنعرضها عليكم دلوقتي فتعالوا نشوف.

1. "هنري فورد" مالك ومؤسس شركة فورد للسيارات على الرغم من فشله 5 مرات في تأسيس مشروعه إلا أنه نجح في السادسة وأسس شركته وهو عنده 40 سنة لكن بدأ ينجح ويعمل ثروة ضخمة وهو عنده 50 سنة.

2. "راي كروك" شارك في تأسيس "ماكدونالدز" على الرغم أنه قضى مسيرته كلها في بيع ماكينات صنع "الميلك شيك" وكسب منها اللي يكفيه طول عمره إلا أنه شارك في تأسيس سلسلة مطاعم "ماكدونالدز" وهو عنده 52 سنة.

3. "سام والتون" على الرغم من تحقيقيه نجاح قوي وهو عنده 30 سنة إلا أنه مشبعش لأ ده كمان حقق النجاح وهو عنده 44 سنة لما أسس أول محل من سلسلة محلات "وول مارت".

4. "جاري هيفن" على الرغم من فشله في بيع الأدوات الرياضية طول حياته إلا أنه نجح في تأسيس مشروع سلسلة الصالات الرياضية العالمية "كيرفز" وهو عنده 40 سنة.

5. "دونالد فيتشر" أسس سلسلة محلات "جاب" العالمية هو وزوجته سنة 1969 وهو عنده 40 سنة وأصبحت من أكبر برندات الملابس على مستوى العالم.

6. "جاك ويل" مؤسس شركة "روكماونت رانش وير" اللي تعتبر من أشهر العلامات التجارية لملابس رعاة البقر، الفكرة هنا مش السن اللي بدأ فيه المشروع الفكرة في أنه فضل المدير التنفيذي لحد سن 107 سنة.

7. "موموفوكو أندو" المبتكر الياباني للشعرية سريعة التحضير اللي هي زي "الأندومي" بدأ مشروعه وهو عنده 48 سنة.

8. الكيميائي "جون بيمبرتون" مؤسس "كوكاكولا" أسس مشروعه وهو عنده 55 سنة وعلى الرغم من أن الغرض في البداية كان اكتشاف بديل "للمورفين" إلا أنه نجح في أنه يعمل واحد من أقوى البراندات في التاريخ.

9 ."هارلاند ساندرس" أو المعروف أكثر بالكولونيل ساندرس، كان عمره 62 عاماً لما أسس سلسلة مطاعم "كنتاكي" سنة 1952، وبعد 12 سنة باعه مقابل 2 مليون دولار وكان من شروطه لإتمام صفقة البيع أن صورته تفضل موجودة على العلامة التجارية للأبد.

10 .على الرغم من أن "والي بلوم" كان له حياة مهنية طويلة في أعمال منتجات الألبان ساعدته على تأسيس ثروة صغيرة إلا أنه أصر على تأسيس أول مشروع ليه وهو عنده 57 سنة " دينالي فلافورز" لصناعة الآيس كريم، وفي سنة 2009 كانت مكاسب الشركة تقدر ب 80 مليون دولار.

ودول يا سيدي 10 شخصيات ناجحة ماستسلموش لعامل السن، وده بيأكد الفكرة الرئيسية اللي أتكلمنا عنها في الأول وهي أن السن مجرد رقم مش عائق ليك في تحقيق ذاتك، فعشان كده أحنا بننصحكم أن لو في دماغك فكرة مشروع خد بالأسباب وتوكل بغض النظر عن سنك.

شارك المقال :