متابعة العملاء بعد ما بيقوموا بعملية الشراء أمر شركات قليلة اللى بتعمله على الوجه الصحيح واللى بيعمل كده من الشركات بيكون أشبه بشكل من أشكال المجاملة وبتكون بعد أيام قليلة من عملية الشراء وبعض الشركات بتحاول من خلال المتابعة إنها تبيع منتج تانى وده طبعًا سلوك مش صحيح إلى حد كبير .

التوقيت يعتبر عامل مهم جدًا فى موضوع متابعة العملاء .. العميل بيبقى لسة شارى منتجك بسعر كبير وبيبقى معندهوش استعداد إنه يدفع تانى فلوس فى منتج بتعرضه عليه فى عملية المتابعة .. يبقى قرار تقديم منتج لعميل لسة شارى منك بقيمة كبيرة باعتبار انك بتتابع معاه هو قرار خاطئ .

مثال على أحد الشركات القليلة اللى بتتابع عملائها بشكل راقى جدًا هى شركة "فوتون" للأثاث وفترة المتابعة دى بتوصل لمدة سنة من بعد عملية الشراء أول مرة .. المتابعة بتكون عبارة عن تقديم اكسسوارات أو إضافات للمنتج الأصلى اللى اشتراه العميل .. زى مثلاً مجموعة أدراج بتتضاف لكنبة أو أغطية للأثاث لحمايته من الأتربة أو منظفات الأثاث إلخ ..

بالطريقة دى ارتبط عملاء "فوتون" بالعلامة التجارية وبقوا بينتظروا المتابعة دى بشكل مستمر عشان عارفين إنهم هيتقدملهم منتجات ليها قيمة وفايدة مكملة للمنتج الأصلى .. عامل اختيار التوقيت الأمثل للمتابعة من جانب الشركة كان ذكى جداً .. بعد سنة من عملية الشراء يكون العميل فيها بدأ يتعافى شوية من أثر المبلغ اللى دفعه فى شراء المنتج الأصلى ده غير ان العملاء نفسهم عجبهم الطرح ده ورحبوا بيه لأنهم عندهم استعداد يشتروا تانى بشكل مفيهوش تهديد بالعكس .. ده فى احساس بالإطمئنان والأمان قدرت توصله شركة "فوتون" بذكاء زى التوقيت بالظبط .

لو بدأت تفكر فى استخدام الطريقة دى مع عملائك للتسويق لشركتك لازم تخللى بالك من شوية حاجات منها احتفاظك بسجلات العملاء وتوقيتات شراؤهم منك عشان تقدر تتابع معاهم فى توقيات ذكية ومناسبة ده غير إن مطلوب منك تقدم حاجة ليها قيمة وفايدة حقيقية لعميلك عشان يقوم بعملية الشراء وهو متطمن وحاسس بالأمان وتكون القيمة دى بتناسب المنتج اللى اشتراه منك أول مرة وتكون فى صورة تقديم مساعدة حقيقية وخلق ولاء لمنتجك مش مجرد مجاملة هيفهمها العميل بسهولة وربنا يوفق الجميع