في الفترات اللي فاتت عدت علينا أسئلة من موظفين بيتعرض عليهم الشغل في شركات ناشئة في مقابل حصولهم على نسبة من حصة ملكية الشركة، والحقيقة إن فعلا بقي في شركات كتير بتعمل كده كوسيلة تقدر تجذب بيها الموظفين أصحاب الكفاءة عشان تعوضهم عن ضعف المرتبات والمخاطرة اللي هيقوموا بيها في البداية.

وأنت كموظف عشان تقبل عرض زي ده لازم تعرف إنه ممكن يكون سلاح ذو حدين، فكونك تمتلك جزء من شركة من الممكن إنها تكون بملايين بعد كده ده هيكون شيء عظيم بالنسبالك أكيد، ده غير إنه هيكون في صالح الشركة نفسها لأنك كموظف هتكون صاحب مصلحة وهتكون ملزم إنك تساعدها على إنها تكبر وتتوسع زيك زي أي شريك أو مستثمر في الشركة.

وفي المقابل ده ميمنعش إن الشغل في الشركات دي بيبقى مغامرة ومخاطرة كبيرة جدا، لأن عادة الشركات دي في بدايتها بتتغير باستمرار وبتبقى غير مستقرة بشكل كافي وكتير منها بيفشل للأسف، فالأبحاث اللي أجراها "شيخار جوش" من كلية هارفارد للأعمال، أظهرت أن 75٪ من جميع الشركات الناشئة بتفشل.

وبالتالي قبل ما تاخد قرار المجازفة بالشغل في شركة ناشئة في مقابل حصولك على جزء من الأسهم، حاول إنك تفهم كويس جدا العرض اللي متقدملك من خلال بعض الأسئلة المهمة زي:

• هل ديه الشركة المناسبة ولا لا؟

المستثمرين بيشتروا حصص الأسهم في الشركات مقابل فلوس بيدفعوها بس أنت هتاخد الأسهم دي في مقابل اللي هاتستثمره من وقت وجهد لصالح الشركة، وعشان كده لازم تفكر بشكل عقلاني كمستثمر في مدى احتمالية نمو الشركة الناشئة دي ونجاحها في المستقبل.

وإن قبولك لعرض العمل لازم يكون قايم على تحليل منك لرأس مال الشركة وقيمتها السوقية، وحط في بالك دايما الخطر الدائم اللي بيواجه الشركات دي وإن معظمها بيفشل وعشان كده متفكرش بس في حصة الملكية المعروضة عليك واتأكد من إنك هتحصل على خبرة مهنية تساعدك في مشوارك المهني ومزايا تعويضية تانية من تأمين صحي واجتماعي ..إلخ.

• إيه هو المرتب اللي لازم تتفاوض عليه؟

عادة لما بتنضم لشركة ناشئة بتقبل تشتغل بمرتب أقل من اللي ممكن تحصل عليه في أي شركة كبيرة وفي موظفين بيشتغلوا من غير راتب خالص، بس حط في اعتبارك إن في النهاية الشركات الناشئة دي شركات تجارية مش شركات غير هادفة للربح، وعشان كده من الممكن إنك تحاول تتفق مع الشركة في البداية على المرتب اللي كان لازم يكون عليه مرتبك قبل ما تبدأ الشغل، وإن بمجرد ما تبتدي الشركة تحسن أوضاعها، لازم يتم تعديل المرتب مع التفاوض في إمكانية منحك تعويض عن الشهور اللي اشتغلت فيها بمرتب أقل من سعر السوق.

• هل في استراتيجية محطوطه للتخارج من الشركة؟

ببساطة التخارج ده بيحصل لما الشركة تقرر إنها تطرح أسهمها للاكتتاب العام مثلا أو إن يتم بيعها، وكجزء من تقييمك للشركة والعرض اللي متقدملك لازم تسأل المؤسسين عن استراتيجية التخارج بتاعتهم، فهل هما حاطين خطة للبيع؟ هل ناويين يطرحوا أسهم الشركة بشكل عام في خلال خمس سنين مثلا؟

استراتيجية التخارج دي هتعود عليك بالنفع في حال إن لو الشركة اتباعت أو طرحت أسهمها بشكل عام وهي بقيمة عالية، لأن ساعتها حصتك هتتحول لأموال، والعكس صحيح برده لأنها لو فضلت على حالها انت مش هتستفاد حاجة.

• إيه هي نسبة حصة الملكية اللي هتحصل عليها؟

بدون نقاش ده أهم سؤال ممكن تسأله عن العرض اللي متقدملك، لأن النسبة دي هي اللي هتحدد انت هتحصل على فلوس أد إيه في حالة التخارج من الشركة.

وعشان كده لما يتقالك انت هتاخد رقم كذا من أسهم ملكية الشركة، لازم تسأل الرقم ده بيمثل نسبة كام في الماية من إجمالي الأسهم كلها، وعادة في الشركات الناشئة بيتم تخصيص نسبة من 20:10% من حصة ملكية الشركة للموظفين واللي نسبتك هتكون جزء منها.

• إيه نوعية أسهم الملكية اللي هتحصل عليها؟

هل هي أسهم مقيدة ولا أسهم هتحصل على حق شرائها بسعر محدد من الشركة بشكل مسبق؟، ففي حالة لو كنت هتشتريها لازم تكون الأسهم مقيمة بطريقة عادلة ووفقا للقيمة الفعلية للشركة، أما لو كانت أسهم مقيدة فأنت مش هتشتريها وإنما الشركة هتديهالك باشتراطات معينة ولازم تفهم الاشتراطات دي كويس جدا.

• إيه هو الجدول الزمني اللي هتحرر فيه حصتك من القيود (Vesting) ؟

لازم تسأل عن كل التفاصيل اللي ليها علاقة بالجدول الزمني الخاص بتحرير أسهمك من القيود، وتحرير الأسهم ده معناه إنك هتحصل على حصة الملكية الممنوحة ليك على مراحل زمنية، فلو مثلا كانت حصتك من الأسهم 10 ألاف سهم مقيد، ده معناه إنك لسه ممتلكتش الأسهم بشكل فعلي وهتمتلكها بشكل كامل بعد مدة محددة من وقت توظيفك في الشركة، وعادة ما بتكون المدة دي أربع سنوات.

• امتى تقدر تبيع حصتك في الشركة؟

لازم تعرف امتى ممكن تبدأ تبيع حصتك، لأن مجرد ما بيتم تحرير الأسهم بتاعتك هتبقى قدام خيارين، الأول إنك تحتفظ بالأسهم بتاعتك لغاية ما يكون فيه ايفينت تخارج للشركة بشكل عام، أو الخيار التاني وهو إنك تبيع حصتك في صفقة خاصة سواء للشركة نفسها أو لمستثمرين من بره، وده ممكن يتطلب موافقة الشركة الأول.

وفي النهاية إنك تعرف بقدر استطاعتك عن عرض الملكية اللي متقدملك ده هيساعدك على تحديد قيمته وتقرير إذا كان يستاهل المجازفة بانك تشتغل في شركة ناشئة ولا لا، واحنا من جانبنا برده بننصحك إنك تحاول تاخد المشورة القانونية من أصحاب الاختصاص في المسألة دي قبل ما تاخد قرار مهم زي ده.