إزاي تتغلب على رهبة إلقاء خطاب أمام جمهور كبير؟

لو بصينا حوالينا وفي تخصصات ومهن مختلفة، هنلاقي ناس ناجحة جدا في شغلها، بس أول ما تيجي لقطة إنهم يتكلموا قدام جمهور أو في لقاء تلفزيوني أو مؤتمر صحفي، النجاح ده بيبقى ولا كأنه موجود، وتلاقي الشخص ده يتوتر ويعرق، ويتهته في الكلام، لدرجة مش ممكن نتخيل معها إن ده الناجح اللي مكسر الدنيا في شغله.

وفي مجال البيزنس، أي رجل أعمال ناجح طبيعي جدا إنه يبقى مُطالب من وقت للتاني يعمل مؤتمرات صحفية أو يلقي خطاب قدام جمهور كبير، وبيبقى للخطابات ديه تأثير كبير على الـ"براندنج" إلي بيعمله لنفسه، وعلى قدرته على جذب العملاء لشخصيته وكاريزمته، وبالتالي بيكون لكل ده تأثير مباشر على مبيعاته وأرباحه.

عشان كده هنتكلم معاكوا في بوست النهاردة عن نصائح وآليات تطبقها وتتدرب عليها عشان تساعد نفسك تتغلب على رهبة التحدث قدام الجمهور، لأن ده موقف ناس كتير بتخاف وبتحس برهبة منه، لدرجة إنه فيه استطلاع عملته البي بي سي لقت فيه إنه خوف الناس من الحديث قدام جمهور أكبر من خوفهم من الموت!!

طيب خلينا نبدأ بقى في الكلام المفيد، لو عايز تتغلب على الخوف ده، ومايبقاش عائق قدام نجاحك في عالم الأعمال نفذ النصائح والآليات ديه:

- خليك على طبيعتك قدر الإمكان، الموقف لوحده بيسبب التوتر، فمتحاولش تظهر بشخصية أو تتكلم بطريقة مش بتاعتك، الجمهور بيبقى عايز حد حقيقي، مش مجرد حد لبق وخلاص، استرخي تماما وهتلاقي نفسك بتتكلم وتتناقش بشخصيتك الطبيعية.

- التدريب..التدريب..التدريب، وكمان التدريب ، لأنه هو ده المفتاح السحري للنجاح في أي حاجة حتى لو صعبة، اتدرب على إلقاء الخطاب مرة واتنين وعشرة، وخلي نبرة صوتك على قد ما تقدر واضحة لكن مش عالية قوي، وممكن كمان تسجل خطابك وانت بتدرب عليه، وتسمعه بعد كده، وتقرر إيه الأجزاء إلي محتاجة تجويد أكتر.

- إعمل تمارين تساعدك على الاسترخاء قبل ما تطلع تتكلم، زي اليوجا، أو رفع الكتفين ناحية الأذن، وبعدين إرخائهم مرة تانية عدة مرات، هتحس بفرق كبير، وهتهدى وتطلع تتكلم بثقة أكبر.

- خليك واعي بحركات جسمك، وبالطريقة اللي بتقف بيها قدام الجمهور، والطريقة إلي بتحرك بيها راسك، حافظ على إيديك مفتوحة، كل ده هيوصل للجمهور قد إيه إنت حاسس بالراحة.

- تجنب نقطة إنك تبدأ الكلام بصوت عالي، وبعدها صوتك ينخفض بالتدريج، لحد ما يبقى صعب على الجمهور إنه يسمعك، وعشان تتجنب ده ممكن وإنت بتدرب تسجل صوتك طول الحديث، وبعدين تسمعه، وتكرر ده لحد ما تنجح تظبط تون صوتك.

- أحد أهم آليات التدريب مش بس تسجيل الصوت، إنت ممكن تتصور فيديو وانت بتقول الخطاب، وتتفرج على نفسك تاني، وتظبط حركتك ومشيتك، وكل ما تتدرب أكتر كل ما هتطلع تتكلم وإنت واثق من نفسك أكتر.

- اعرف جمهورك كويس جدا، لأن خطابك موجه ليهم مش ليك، ولما تعرف جمهورك كويس هتقدر تختار الكلام الأنسب ليهم.

- احرص دائما على إنك تخلي بداية حديثك فّعالة ومؤثرة وتشد الجمهور عشان يتابعك للآخر.

- ركز دائما مع رد فعل الجمهور، لو مهتم أو عنده أسئلة، أو بدأ يحس بالملل، يعني من الآخر خليك مرن وعّدل خطابك عشان تشد انتباههم دايما.

- حاول تحافظ على روح الدعابة وخفة الدم في خطابك، واستخدم برضه قصص تجذب الناس، لما تلاقي جمهورك مرتاح وبيضحك، هتلاقي التوتر اختفى تماما.

- ذاكر خطابك كويس، وحاول تقوله بنفسك مش تقراه من الورق، لأن تفاعلك مع الجمهور بتاعك هيقلل من توترك.

- استخدم الوسائل المرئية بحكمة، عشان ما تكسرش حلقة الوصل مع الجمهور بتاعك.

- خليك متأكد إن الجمهور مش عارف إلي إنت تعرفه، وخلي النقطة ديه تطمنك، إنت طالع تدي معلومات جديدة للجمهور، مش طالع عشان يمتحنوك.

- قبل معاد إلقاء الخطاب، روح للمكان أو القاعة إلي هتقول فيها الخطاب، اتحرك فيها، واقف على المسرح، عشان يوم الخطاب ماتبقاش مخضوض، ويكون فيه إحساس بالألفة في المكان.

لما تطبق كل النصائح والآليات ديه، مش هتتغلب ع ل ى الرهبة أو التوتر مرة واحدة، بس شوية شوية، ومرة بعد مرة، هتلاقي نفسك أحسن وأدائك أفضل، وهتقدر تتغلب على رهبة الحديث أمام جمهور كبير.