تعويم الذهب والدولار والجنية - ج1

هل إنخفاض سعر الجنيه كويس لأصحاب الأعمال ولا لأ ؟

الأول قبل ما أجاوب عايز بس أديلك معلومه إن الصين وهي أكبر إقتصاد عالمي النهارده فيه معركه كبيره بينها وبين أمريكا نتيجة إن الصين بتتدخل علشان تحافظ علي قيمة العمله الصينيه منخفضه أمام الدولار ...

طيب إيه اللي يخللي الصين صاحبة أكبر إقتصاد في العالم عايزه عملتها ضعيفه أمام الدولار ...يعني هو الإنخفاض ده كويس ؟؟

طبعا الإنخفاض كويس لأنه بيعمل شوية حاجات كده ظريفه في أي دوله...

أولا بيخللي بضاعتك قدرتها التنافسيه أعلي بكتير ...

أنا دايما هادي مثال علي الدولار =7 ج والدولار لو يساوي 10 ج.

طيب لو أنا عندي جاكت مثلا بصدره لأمريكا ب 700 ج يعني تمنه 100 دولار وبيتنافس مع جاكت صيني تمنه 100 دولار برضه بعد شويه الدولار طلع بقي بيساوي 10 ج بقي تمن الجاكت كام ؟ 70 دولار والصيني ب 100 دولار يبقي أنا هاقدر أصدره لأمريكا لأني بقيت أرخص ب 30 دولار .

نفس الكلام عن السياحه مثلا لو سعر الأسبوع في الغردقه 7000 ج يعني 1000 دولار للسايح وفي اسطنبول ب 1100 دولار يبقي أكيد المنافسه هاتبقي صعبه شويه طيب لو الدولار = 10 ج يعني الأسبوع مثلا للسائح الروسي أصبح ب 700 دولار مقابل 1100 دولار للأسبوع في تركيا كده أصبحت المنافسه أسهل شويه ...وهكذا ...

ثانيا الإستيراد بيقل ....

ليه بيقل ؟ نفس الكلام تخيل جاكت صناعه مصريه تمنه 500 ج بيتنافس مع جاكيت تركي أو صيني تمنه 100 دولار يعني 700 ج طبعا اللي بيشتري هايضحي بال200 ج الفرق ويجيب المستورد ... طيب لو المستورد تمنه 100 دولار والدولار ب 10 ج يعني 1000 ج ؟ يبقي الفرق بقي كبير يبقي فيه فئه مش قليله هاتجيب الصناعه المحليه لأنها أصبحت تمنها النص من المستورد .

طيب الموضوع هي دي منافعه بس ؟ طيب الموضوع ملوش أضرار ؟

طيب ده تأثيره عي أصحاب الأعمال تأثيره بقي علي الإقتصاد الكلي إيه ؟

والمهم نعمل إيه الفتره اللي جايه علشان إحنا كأصحاب أعمال نستفيد من إنخفاض قيمة الجنيه؟

كل ده نتناقش فيه في مقال قادم إن شاء الله