FB Instagram Twitter Youtube Linkedin تعويم الذهب والدولار والجنية - ج15 | أكاديمية اعمل بيزنس
 
الرجوع الى المدونة

تعويم الذهب والدولار والجنية - ج15

تعويم الذهب والدولار والجنية - ج15

اتفقنا قبل كده إننا نراقب موضوع تعويم الجنيه بدون أخذ أي قرار لحد ما تتضح الرؤيا ونكون قرار واتفقنا نبدأ نكون رؤيا يوم السبت القادم لكن حبيت النهاردة أشرككم في رأيي في ما تم خلال أول خمسة أيام من التعويم ....

أولاً البنوك بتشتري فقط ولا تبيع وكل يوم بتزود على نفسها جنيه نقريبا من 13.1 ج يوم الخميس ل 17.8 يوم الإثنين وده مفتعل مش عرض وطلب لأن مفيش طلب أو فيه طلب والبنوك بتتجاهله وبتلبي فقط لبعض المستوردين القدامى وده معناه في رأيي إن البنوك بتقول لحائزي الدولار أياً كان الرقم اللي اشتريته بيه تعالي بيع وأنا مش هخسرك أو هتخسر خسارة بسيطة وخد فلوس مصري استثمرها استثمار آمن بدل المضاربة على الدولار وتعب الأعصاب ده

ثانياً في نفس الوقت اللي البنوك بتغري الناس ببيع الدولار بتديهم البديل اللي هو ودائع ب 20% في السنه يعني بدل ما تضارب في العمله إعمل وديعة وريح دماغك وبكده السيولة اللي الناس ممكن تفكر تشتري بيها دولار هتقل أو هتنعدم .

ثالثاً الدولة شايفه إن أكتر حاجة بتعمل طلب على الدولار هو الإستيراد فزودت الدولار الجمركي 50% وده معناه إن أي سلعه ليها بديل مصري المستورد هيفكر 100 مرة قبل ما يطلبها وده معناه تقليل الطلب على الدولار وزيادة الطلب على الصناعة المحلية بمعنى أي مصنع كان بيتعب في بيع منتجه نتيجة المنافسة مع المستورد هيبيع منتجاته بمنتهى السهولة وهيرفع سعره كمان .

رابعاً وزير المالية اعلن عن اتفاق نهائى لمبادلة عملة للاستيراد قيمته ٢.٧ مليار دولار لكنه بين العملة الجنيه واليوان وسيسمح للمستوردين الاستيراد به وده هايخف الضغط عن الدولار جدا وطبعا إحنا عارفين إن أكبر دولة بنستورد منها هي الصين .

خامساً النائب العام أرسل كتاباً دورياً لأعضاء النيابة بتغليظ عقوبة الإتجار في العملة وخلاها جناية لتصبح عقوبتها السجن من 3 ل 10 سنوات للشخص الطبيعي أو الإعتيادي .

سادساً تقريبا السوق السوداء اختفت تماماً ومعدشي فيه بيع خارج البنوك إلا نادر .

سابعاً عندنا مجموعة أحداث هتحصل خلال شهر نوفمبر الدولة بتستهدف فيهم مضاعفة الإحتياطي ... وهم على الترتيب :

1- قرض ب 6 مليار دولار وده من شروط صندوق النقد ومصر نجحت النهاردة في تجميعه بواقع 2.7 مليار دولار من الصين و 600 مليون دولار من دول مجموعة الدول السبع والباقى من البنك الدولى والسعودية والامارات وده كان آخر شرط للصندوق وعلشان كده الصندوق النهارده أضاف مصر على قائمة اجتماعه القادم .

2- قرض صندوق النقد اللي وضع مصر على جدول المجلس التنفيذى للصندوق يوم 11- 11 يعني يوم الجمعة الجاية وده بشكل استثنائي وقالت "كريستين لاجارد" مديرة صندوق النقد الدولي إنها سوف تدعم طلب مصر لقرض طويل الأجل ب 12 مليار دولار

3- مصر قبل نهاية نوفمبر هتصدر سندات دولية ب 4 مليار دولار وطبعاً هتتغطى لأسباب كتير منها إن صندوق النقد الدولي هيكون ساعتها وافق على إقراض مصر وعلشان تعويم الجنيه واحنا اتكلمنا المره اللي فاتت عن تجربة الأرجنتين اللي أصدرت سندات ب 34 مليار دولار خلال 10 شهور بعد التعويم .

طبعاً كل اللي فات يخليني أكد توقعي بهبوط الدولار من المستوي الحالي لمستوي آخر وتبعاً له هبوط الدهب وحاجات كتير لكن دعونا لا نستبق الأحداث وماناخدش قرار غير لما نكوّن رؤية في ظل أحداث متسارعة من الدولة ومش محتاجين التأكيد بإن دي دردشة أو رصد للواقع بصرف النظرعن إننا غير معنيين بتقييم أداء الحكومة وإن كل اللي بتعمله من معالجة لأخطاء هي أصلاً السبب فيها لكن اللي يعنينا إننا نتابع موضوع بيأثر تأثير مباشر على شغلنا وقراراتنا الإستثمارية وإن شاء الله نتابع ونتكلم تاني في الموضوع ده

شارك المقال :