عندي كام نقطه عايز أقولها في ظل مناقشة موضوع الدولار وتأثيره علينا كمشروعات صغيرة ومتوسطة .

أولا إحنا بنناقش موضوع الدولار من منطلق المفعول به وليس الفاعل ...يعني لا أنا وأكيد ولا حضرتك برضه وزير ولا رئيس وزراء علشان نقنع بعض بأهمية إن الدوله تقف ورا الجنيه وتدعمه ..إحنا بنتعامل مع أمر واقع مطلوب إننا كأصحاب مشروعات أو كعاملين في البيزنس نشوف إيجابياته ونستفيد منها ونعرف سلبياته ونبعد عنها .

ثانيا أنا مش مسئول عن معلومات مغلوطه غير علميه وصلتك قبل كده ...زي مثلا إن قوة الإقتصاد معناها قوة العمله وده اللي أنا استخدمت فيه الصين كمثال وهي تمثل أقوي إقتصاد في العالم وعملتها مش قويه وهي بتحافظ علي كده

ثالثا أنا برضه مش مسئول عن الدونيه إللي كتير من الناس بتبص بيها لنفسها ...كل مانقول حاجه يرد عليها ياعم إحنا في مصر ياعم إحنا دوله تعبانه ياعم دي الصين الجامده وإحنا في مصر اللي ماينفعش فيها حاجه ... الناس دي عايز أقلها لما انت شايف ان مفيش فايده داخل أصلا تضيع وقتك وجهدك في القرايه والرد ليه ؟ ؟ وفر وقتك ومجهودك ..

رابعا زي ما بنستورد من الصين مثلا إحنا برضه بنصدرلها ....طبعا مش بنفس القيمه يعني ممكن نلاقي بنصدرلها 20% من اللي بنستورده منها بس إحنا بالنسبه ليهم مش صفر .

خامسا أكيد إحنا مش الصين بس ده مايمنعش إننا نعمل زيها علشان نوصل للي هيا وصلتله ...الصين من 30 سنه مكنتش كده خالص يبقي أكيد إحنا لو نبقي زي الصين بعد 30 سنه يبقي نقلدها وده برضه مش عيب .

مش عيب إننا نكون سيئين العيب إننا نفضل سيئين .

سادسا فيه فرق بين إننا نخفض قيمة العملة بتاعتنا (زي الصين ) وإننا نحرر العمله بتاعتنا (التعويم) وده معناه إننا نرفع إيدينا عن دعم العمله علشان تبقي موجوده بالسعر الحقيقي بتاعها وده اللي بيحكمه قانون العرض والطلب وده مشجع جدا للاستثمار ...مفيش مستثمر أجنبي هاييجي مصر والدولار في البنك ب 7 ج وفي السوق السوداء ب 8 ج .

سابعا لو الحكومه عايزه تعوم الجنيه مش هاتلاقي وقت أنسب من الأيام دي لأن البترول انخفض بأكتر من 60% من قيمته يعني فاتورة الاستيراد من الطاقه هاتنخفض لأكتر من النص ودي فرصه كويسه جدا لتعويم الجنيه .

دي نقط سريعه وهانكمل موضوع إنخفاض قيمة الجنيه أمام الدولار إن شاء الله