920033973
16342
article

تعويم الذهب والدولار والجنية - ج5

September 24, 2017    

أهم ميزة من مميزات مصر اللي لازم أي حد بيعمل بيزنس ياخد باله منها هي العنصر البشري المتميز والرخيص مقارنة بأي دولة في العالم .... وأنا النهاردة هدى أمثلة أنا أعرف أصحابها في مجالات مختلفة علشان نستفيد منها وننجح زيها ... ملحوظة الناس اللى بتبرر فشلها إن مفيش فايدة والرشوة والفساد والكلام الكبير ده ياريت متقراش المقال ...

- واحد صديقي عنده مصنع لانجيري حريمي في المحلة شارك واحد إيطالي وعملوا مكتب في إيطاليا مهمة المكتب شراء الخامات وإرسالها لمصر وبعد الانتهاء مهمتهم تسويق المنتجات في أوروبا .... لما زرت صديقي في المصنع لقيته جايب 500 بنت وبيدربهم وبيعملهم تقييم أسبوعي وصفاهم لحد ما بقوا 200 مدربين أفضل تدريب لانتاج منتج فاخر :)

- واحد صديقي عمل مصنع بنطلونات جينز في قرية من قرى أسيوط وصدر للصين (تكلفة العاملة بعد التدريب لا تتجاوز 50 دولار)

- فيه مصريين واخدين مزارع جنب طنطا بيزرعوها وبيصدروا منتجاتها لأسبانيا وفرنسا (الفاخر منها بيدخل في صناعة النبيذ)

 - صديق عنده مصنع مفروشات وخرج من السوق المحلي إنه بينتج انتاج فاخر وبيصدر للخليج وخاصة للإمارات.

- فيه موقع عاملاه واحدة مصرية وعملت منه ملايين عن طريق تسويق منتجات مصرية فولكورية زي بدل الرقص الشيشة (بتبيعها بدون المعسل علشان حرام) وبتصدر لكل أوروبا وخاصة ألمانيا

- ليا صديق عنده خبرة في قطع غيار السيارات عمل موقع بيسوق قطع غيار السيارات من كبرى الشركات الأمريكية لولايات الجنوب الأمريكي وطبعا طلب الأوردر أو خدمة العملاء هنا في مصر عن طريق الكول سنتر .

طالما بنتكلم في الكول سنتر طبعا فيه مشاريع لا تحصي الكول سنتر بتاعها هنا في مصر ويكفي أن تعرف إن أمريكا معدشي فيها كول سنتر واحد للاعتماد علي الكول سنتر في الهند ومصر وده على فكرة جزء من نطاق شغلى الشخصى .

فيه شاب كان بيشتغل معايا فى الشركة في مجال البرمجيات وترك الشركة وفتح موقع خاص وبعدين زارني علشان يوريني هو وصل لايه لقيته عامل موقع رائع بيشترى بضاعة من الصين وبيبيعها فى الولايات المتحدة وكان عامل أرباح ممتازة وكان بياخد رأيي في بعض الأمور والموضوع عجبني لدرجة إني عرضت عليه أدخل معاه شريك بس هو رفض وأنا احترمت رغبته على فكرة مايكل ده عنده 20 سنة بس

طبعاً فى المجال الفني إحنا قدراتنا رائعة وفيه تجربة قوية جداً لشركات مصرية شابة بتنتج لصالح القنوات الخاصة الوثائقية زي الجزيرة والبي بي سي ودوتشه وكل القنوات العالمية اللي عاملين قناة عربية (طبعاً ده غير الأفلام والمسلسلات ولكن دى رأس مالها ضخم)

أعرف أكتر من مصنع في دمياط ما بيبيعوش محلياً ... وأعرف شاب معندوش مصنع عمل موقع علي الإنترنت لصالون الأوبيسون وقدر يبيع بشكل كويس واللى بيتباع بيدفع تمنه للورشة وبيشحنه

واحد صديقي كان بيزور إيطاليا فقالك بقى أروح أشترى بدلة من "ماسيمو دوتي" شخصياً وبعد ما دخل المحل وبيتفرج بقي كل البدل الموجودة مكتوب عليها (صنع في مصر) والأمثلة اللى زى دى كتير جداً .

أنا كده حكيت أمثلة سريعاً لحاجات بقابلها يومياً لناس شغلوا دماغهم وقدروا يستغلوا ثروة مصر من معادن ويد عاملة ماهرة وسوقوها خارج مصر وحققوا ثروات محترمة

مصر بتصدر بنسبة 48% من صادراتها منتجات مكتملة الصنع وبنسبة 21% من صادراتها نصف مكتملة الصنع ... يعنى موضوع إن مصر بتصدر خامات فقط ده كلام غير دقيق .

- أكبر دولة بتستورد من مصر هى إيطاليا وفي المركز التانى السعودية وفى المركز التالت الهند وفى المركز الرابع تركيا .

وعلي مستوي التكتلات الإقتصادية مصر في المركز الأول مصر بتصدر للدول العربيه بنسبة 35% وفي المركز التانى بتصدر لغرب أوروبا بنسبة 26 % (من غير حساب النني ومحمد صلاح وغيرهم ) ودول آسيا فى المركز الثالث دول آسيا بنسبة 13% .

اللي عايز ينجح لازم يشغل دماغه كويس ويعرف إحنا متفوقين في إيه من حيث الموارد سواء بشرية أو طبيعية أو جغرافية ويتحرك علشان ربنا يوفقه واللى عايز يدور على الحجج هيلاقي كتير

ملحوظة أخيرة .. فيه حركة تصدير بدأت لأفريقيا خلال السنتين اللي فاتوا وكنا كتبنا عليها قبل كده بس لسه موصلتش لمرتبة قوية وفيه فرص ضخمة خاصة لدول غرب أفريقيا وربنا يوفق كل مجتهد ويرزقه رزق واسع


مقالات مشابهة

المزيد
إلغاء الدولار الجمركي
إلغاء الدولار الجمركي

فاكر اللي حصل بعد قرار تعويم الجنيه وحالة الفوضى

تعويم الذهب والدولار والجنية - ج17
تعويم الذهب والدولار والجنية - ج17

- علشان فيه ناس كتير سألوني عن وجهة نظري عن إتجاه

تعويم الذهب والدولار والجنية - ج16
تعويم الذهب والدولار والجنية - ج16

أولاً أنا شخص متفائل جداً فياريت بلاش حد يقوللي إنت

تعويم الذهب والدولار والجنية - ج15
تعويم الذهب والدولار والجنية - ج15

اتفقنا قبل كده إننا نراقب موضوع تعويم الجنيه بدون أخذ

الأكثر قراءة

المزيد
تعويم الذهب والدولار والجنية - ج1
تعويم الذهب والدولار والجنية - ج1

هل إنخفاض سعر الجنيه كويس لأصحاب الأعمال ولا لأ ؟

تعويم الذهب والدولار والجنية - ج2
تعويم الذهب والدولار والجنية - ج2

عندي كام نقطه عايز أقولها في ظل مناقشة موضوع الدولار

تعويم الذهب والدولار والجنية - ج5
تعويم الذهب والدولار والجنية - ج5

أهم ميزة من مميزات مصر اللي لازم أي حد بيعمل بيزنس ياخد

تعويم الذهب والدولار والجنية - ج10
تعويم الذهب والدولار والجنية - ج10

ممكن يكون ده آخر موضوع نتكلم فيه عن الدولار والدهب

تعويم الذهب والدولار والجنية - ج15
تعويم الذهب والدولار والجنية - ج15

اتفقنا قبل كده إننا نراقب موضوع تعويم الجنيه بدون أخذ

تعويم الذهب والدولار والجنية - ج9
تعويم الذهب والدولار والجنية - ج9

جرام الذهب عيار 21 كان ب 360 ج في شهر إبريل 2016 لما كان

تعويم الذهب والدولار والجنية - ج17
تعويم الذهب والدولار والجنية - ج17

- علشان فيه ناس كتير سألوني عن وجهة نظري عن إتجاه

تعويم الذهب والدولار والجنية - ج4
تعويم الذهب والدولار والجنية - ج4

اتكلمنا قبل كده عن مميزات تخفيض الجنيه أمام الدولار

تعويم الذهب والدولار والجنية - ج13
تعويم الذهب والدولار والجنية - ج13

معنى تعويم الجنيه تركه لآليات العرض والطلب وظهور سعره