بعد ما أعدنا نشر مقالات تخفيض قيمة الجنيه جالنا عليها استفسارات كتير والنهاردة هنجاوب على الاستفسارات الشائعه دى بالتفصيل عشان الفايدة تكون للجميع ..

بس مهم قبل ما تقرأ تفهم إن غرضنا هو محاولة تعريف أصحاب المشروعات ورواد الأعمال بإيجابيات كل أزمة وليس الدفاع عن القرارات أو السياسات خصوصاً إننا كأصحاب أعمال بنشتغل كرد فعل وليس كفعل

أول سؤال - بالنسبة للشركات المصرية اللى معتمدة على سواء ورق أو مواد خام جاية من دول خارجية .. هيقدر ازاى يعمل منتج مصري لما الدولار يغلى فالخامات أصلاً وجودها يبقى صعب ده غير ان المنتج سعره هيبقى مبالغ فيه ؟؟

وكانت الاجابة :

- المنتج المصري حتي اللي بيستورد نسبة من الخامات من بره هايبقي أرخص بكتير من المنتج المستورد وكل ما زادت نسبة المحلي فيه كل ما رخص سعره وده اللي خللي المصانع اللي تكبر نسبة الخامات والمواد المحليه في الفتره دي وده ناتج إيجابي لتخفيض سعر الجنيه

تانى سؤال - هل فيه منتجات مصرية بجودة المنتجات الصينية .. وهل لها أسواق بالخارج ؟

وكانت الاجابة :

- معظم المنتجات المصرية أفضل من المنتجات الصينية وأنا بقصد المنتجات الصينية اللى بتيجي مصر لأن فيه منتجات صينية بيتم تصديرها لأوروبا مثلاً جودتها أعلى بكتير .... وأكيد كلنا سمعنا عن تصدير مصر لأتوبيسات بدورين لانجلترا اللى الناس متعرفوش إن المصنع ده من 1994 وبينتج 10 آلاف أتوبيس سنوياً وبيصدر لبريطانيا ونيوزيلندا واستراليا وهونج كونج ومكان المصنع فى محافظة الشرقية ..... صناعة الأجهزة المنزلية من الصناعات اللى شهدت طفرة خلال آخر 5 سنين وأصبحت تنافس الصين في أسواق كتيرة ....

الناس لازم تفهم إنك ممكن تصدر أتوبيسات لانجلترا لأنهم عندهم استعداد يدفعوا مبلغ كبير وترجع تستورد أتوبيسات من الصين علشان أرخص .... وده ظاهر جداً في صناعة البرمجيات هنلاقي الناس لا تثق في المنتج المصري فبتستورد برمجيات من الهند مثلاً ومصر بتصدر برمجيات لأوروبا وأمريكا بأرقام كبيرة جداً كل سنة .... ممكن بقى بعد زيادة الدولار نلاقي متخذ القرار في مصر يشتري منتج مصري .

تالت سؤال - عايز توضيح أنا لما أصحى من النوم ألاقي قيمة راتبي قلت بنسبة 15% ده كمان لو التجار والمصنعين مزودوش الأسعار أعمل ايه؟

وكانت الاجابة :

- عملياً الأسعار زادت من فترة بمعني إن المستورد كان بيشتري الدولار ب 10 ج ودلوقتي الدولار نزل ل 9 ج فالمفروض إن الأسعار تنزل مش تزيد ( طبعاً تنزل من قمة لكنها لازالت مرتفعة ) .... بالنسبة لراتبك دى مسئوليتك المفروض إنك تسعي دايماً إنك تزود دخلك بما يتوافق مع زيادة الأسعار سواء إنك تبقي متميز فيزيد راتبك أو تدور على شركة جديدة تقدّر تميزك أو تتعلم حاجة جديدة في مجالك .... ولو انت تاجر أو صاحب شركة فبرضه المفروض يتطور أرباحك بما يوازى الزيادة وده اللي إحنا اتكلمنا عليه فى الحلقات اللى قبل كده .

رابع سؤال - لو حولنا نقلل استيراد الخامات فين البديل المصرى ؟

وكانت الاجابة :

- البديل المصري موجود وفعلاً بعد صعود الدولار بدأت الناس تدور عليه