FB Instagram Twitter Youtube Linkedin حدث بالفعل | أكاديمية اعمل بيزنس
 
الرجوع الى المدونة

حدث بالفعل

حدث بالفعل

حدث بالفعل .... من يجى 15 سنة كده كنت مسافر مرسى مطروح وكان ليا صديقان واحد مسافر اسكندرية وواحد كان عنده مصنع إزاز (زجاج) على حدود ليبيا مع تونس فكان مسافر للمصنع بتاعه .... واتقابلنا بعد السفر بأسبوعين وحكى كل واحد فينا شويه عن رحلته

صاحبنا اللى كان مسافر اسكندرية قال أنا سافرت وجيت عند الريست كده (حوالي 100ك) ودخلت أستريح علشان أواصل الرحلة ... أنا قلتلهم إنى استريحت فى اسكندرية علشان أكمل لمرسى مطروح .... صاحبنا التالت قال إنه وقف استريح فى مرسى مطروح لأنه كان مسافر ليبيا الناحية التانية

لما تيجي للى كان مسافر ليبيا وتقوله إنت مريحتش عند الريست ليه ؟ يقولك يابني أنا كنت لسه طالع !! هو انتو إزاى تتعبوا من أول 100 ك ده أنا كنت مسافر بتاع 800 ك !!!

نفس الأشخاص واحد وقف يريح بعد 100 ك وأنا بعد 200 ك وصاحبنا التالت بعد يجى 400 ك .... نفس الإمكانيات ونفس الطريق إيه اللى إختلف ؟

اللى إختلف هو الهدف اللى كل واحد فينا حاطه لنفسه ؟ لو إنت أقنعت نفسك إنك هاتتعب بعد 100 ك صدقنى هاتتعب فعلًا بعد 100 ك ولو أهلتها إنك هاتتعب بعد 400 ك هاتتعب بعد 400 ك بالرغم إنك إنت نفس الشخص لكن تهيئتك لعقلك وثقتك فى إمكانياتك هاتأثر عليك بالسلب أو بالإيجاب .

من بعدها قررت إنى دايمًا يبقى عندى هدف طموح علشان لما أتعب فى نصه أبقى قطعت 400 ك غير اللى بيحط لنفسه هدف صغير لو تعب فى نصه هايبقى حقق 50 ك بس وده كمثال لازم نحطه قدام عينينا كتير من الناس بتبقى إمكانياتهم عالية بس أهدافهم قليلة فمبيحققوش حاجة فى حياتهم لا لنفسهم ولا مجتمعهم ولا بلدهم وكتير من الناس إمكانياتهم ضعيفة بس دايمًا أهدافهم كبيرة فبيحققوا كتير لنفسهم ولمجتمعهم ولبلدهم.

حاول تحط لنفسك هدف كبير تحققه ربنا هايوفقك وهاتشوف فى نفسك إمكانيات مكنتش متوقعها ولو الهدف اتحقق تبقى نجحت ولو مقدرتش تحققه هايبقى حاولت ونجحت فى تحقيق أجزاء منه وهايبقى أفضل بكتير من إللى لا حط هدف ولا حاول يحققه .

شارك المقال :