حديث الأسانسير .. إزاي تقنع أي حد بفكرتك في 30 ثانية

تخيل تكون رايح مكان تقابل صديق أو واقف في الشارع مستني التاكسي فتلاقي نفسك واقف جنب مستثمر كان حلم من أحلامك تعرض عليه فكرة مشروعك المبتكرة والمربحة، أو تلاقي نفسك وجه لوجه مع مدير أحلامك اللي نفسك تشتغل معاه في نفس الأسانسير، الحقيقة إن فرصة اقناع المستثمر أو المدير بنفسك في الفترة ما بين لما بتكتشف إنه واقف جمبك والـ 30 ثانية لغاية ما يركب عربيته أو يوصل للدور اللي هو عاوزه، ممكن تحصل مش مستحيلة!!

الفكرة ممكن تخض، وتخليك تفكر وتقول هو ده ممكن يحصل فعلا؟ المواقف دي واللي ممكن نقول عليها "فرص" لو حصلت ومستغلتهاش ممكن تخليك تقعد تقول في نفسك أنا ليه متكلمتش، أو حتى لما اتكلمت ليه الراجل سابني ومشي ومقدرتش اجذب انتباهه ليا ولأفكاري.

والحقيقة إنك كصاحب مشروع ناشئ أو موظف طموح، في طريقة ممكن تساعدك على استغلال الفرصة دي بأقصى صورة ممكنة، الطريقة دي بتسمى مجازا بـ "حديث الأسانسير" أيوه زي ما قريت كده، والفكرة هي إنك بأقصى سرعة تحاول تقدم نفسك وتقنع اللي قدامك بمهاراتك أو أفكارك في مدة ما بين 30 الى 60 ثانية واللي هي يعني تقريبا نفس مدة ركوبك الأسانسير مع أي حد.

الفكرة دي تم تنفيذها سنة 2017 من خلال إنتاج مجلة "Entrepreneur" لبرنامج تلفزيوني اسمه "Entrepreneur Elevator Pitch" واللي حقق نجاح كبير وبيتعرض منه الموسم الثالث حاليا.

فكرة البرنامج بتقوم على إن في كل حلقة، بيكون في رواد أعمال طموحين جوه اسانسير وعندهم دقيقة واحدة بس عشان يقدموا فكرتهم أو منتجهم أو أي مشروع عايزين يعملوه، وبيتم الحكم عليهم عن طريق لجنة من المستثمرين الناجحين.

وفي حالة لو اللجنة أعجبت بالفكرة، فالمتسابق بيكمل للدور العلوي وبيتفتح باب الأسانسير وبيبقى قدامه 5 دقايق عشان يبهرهم بشرحه لمشروعه ويقنعهم يستثمروا فيه ولو اقتنعوا هيقرروا يعملوا صفقة معاه ويمولوا مشروعه. ولو مقتنعوش المتسابق بيرجع تاني للدور الأرضي.

وعشان تكون دايما مستعد لأي موقف مفاجئ زد وحابب تستغله أحسن استغلال، فاحنا هنساعدك على اتقان وصنع حديث الأسانسير بحرفية من خلال مجموعة خطوات بسيطة جدا:

1. ابدأ بصفحة بيضاء: هات كام ورقة ورقمهم من واحد لعشرة، بعدين ابدأ املاها بأهم المعلومات اللي انت عايز توصلها عن نفسك أو عن الخدمة والمنتج بتاعك، أو عن شركتك.

قول بالظبط انت بتعمل إيه؟ إيه اللي حققته؟ وإيه هي أهدافك؟ مين اللي الخدمة أو الشركة بتاعتك من المتوقع إنها تخدمهم؟ وركز على أكتر الحقائق الجذابة واللي ممكن تعلق بالذهن وهتميزك عن أي حد تاني.

2. علم على الأشياء المهمة: خد هايلايتر وعلم على المعلومات الأكثر أهمية في اللي انت كتبتهم، واستبعد أي معلومات زيادة، أو غير ضرورية أو أي مصطلحات عمل واسعة وفضفاضة.

وأهم شيء إنك تعزز وتدعم الأشياء الجيدة عندك، زي مثلا إنك تقول " أنا جيد جدا في المبيعات" على عكس أما تقول " أنا مبيعاتي كانت بتتخطى التارجت بتاعتها كل شهر في آخر سنتين" أولا معلومات كتير، ثانيا ممكن تكون سبب في حقد اللي قدامك عليك.

3. وزع المعلومات دي على بطاقات: هات خمس بطاقات يبقوا زي الفهرس ليك كده، حط عنوان لكل بطاقة مثلا " من أنا"، " ماذا أفعل"، " كيف أفعلها"، "لماذا أفعلها"، "ولمن أفعلها"، بعد ما قسمتهم ضيف كل المعلومات اللي عندك في البطاقة اللي تناسبها، ومن الأفضل إن تحت كل عنوان من العناوين دي يكون في جملتين بيشرحوه.

4. نظمهم ورتبهم كويس: رتب البطاقات في ترتيب منطقي وتأكد إن أهم المعلومات موجودة فالأول، وخليك فاكر إن عادة انت بيبقى قدامك ثواني معدودة عشان تقدر تتواصل مع الشخص اللي قدامك قبل ما يمشي، عشان كده لازم تحط في اعتبارك إن لو قاطعك فالكلام ومعرفتش تكمل حديثك هتكون على الأقل قولتله أهم معلومات عنك.

5. قم بإضافة ما قد يلفت الانتباه: في بداية حديثك حاول إنك تضيف معلومة أو إحصائية أو حقيقة تجذب الانتباه، انت هدفك اشراك الشخص اللي بتوجهله حديثك على الفور وده عشان تخليه مفتون باللي بتقوله وعايز يعرف معلومات أكتر عنها.

6. اتمرن على حديثك: اروي حديثك على شخص مقرب ليك ويكون موضوعي وحاول تاخد منه feed back بناء (من الأفضل إنه ميكونش فرد من أهلك أو أصدقائك المقربين، لأنهم أحيانا بيبقوا حاسين إننا مبنعملش حاجة غلط) والنقطة دي هتفيدك لإن كتير بنبقى شايفين إن الجملة واضحة وسهلة بس في الحقيقة بتكون للشخص الغريب عنك معقدة وطويلة.

7. سجل لنفسك: بعد ما بتاخد feedback وتحسن من خطابك أكتر، سجل لنفسك، واسمع كويس ولاحظ نغمة صوتك وخليها ودية مش مزعجة، وخد بالك لإن في كتير من الأوقات لما بنبقي عارفين إن قدامنا وقت قليل بنلاقينا من غير وعي بنتكلم بسرعة وبالتالي كلامنا مبيبقاش واضح، كمان تأكد إن مفيش أي كلمات معادة وإنك قادر توصل رسالتك وتنقلها بسهولة للشخص التاني.

8. اركب الأسانسير: في المرة الجاية وانت راكب الأسانسير لوحدك، اتمرن على حديثك، أول مرة ادي نفسك الوقت في إنك توصل لآخر دور، وبعد كده حاول تقلل من عدد الأدوار، كل التمارين دي هتساعدك تقلل من الكلمات المكررة اللي ملهاش لازمة ودايما حاطط في بالك أهم معلومات عن نفسك وعن شغلك.

الخطوات دي أكيد هتساعدك لو اتحطيت في موقف وقابلت مستثمر أو مدير حابب تشتغل معاه، على طول هيكون ذهنك حاضر بأهم معلومات عنك وعن شغلك، ملحوظة أخيرة يا ريت يبقى معاك دايما كارت شخصي في جيب بدلتك أو محفظتك تديه للي قدامك، انت مش ضامن الفرصة دي ممكن تتكرر تاني امتى!!