920033973
16342
article

حرب البراندات ما بين الفضائيين والزمالك

August 01, 2018    

الوصول والتفاعل العالي بقوا حلم أي حد شغال في مجال التسويق الإلكتروني بس للأسف في بعض الأحيان ممكن الحلم ده يتحول لكابوس بسبب عدم الدراسة الكويسه للسوق اللي أنت ناوي تلعب فيه، وهو ده اللي حصل مع كادبوري لما قرروا يعملوا إعلان الفضائيين، وحصل لتودو لما عملوا بوست بيتريقوا فيه على نادي الزمالك، على الرغم من أن البراندين من أنجح البراندات المصرية الموجودة في السوق إلا أنهم واجهوا ردود أفعال هجومية كتير جداً بسبب الإعلانات دي، المهم أحنا خلينا في الحتة بتاعتنا وتعالوا نبص على الحالتين ونتناقش في كل حالة منهم ونشوف نقدر نطلع منهم بأيه.

 

الفضائيين بيدوروا على السعادة
الفضائيين جايين لكوكب الأرض بعد ما اكتشفوا سر من أسرار السعادة الموجودة وهو شوكولاتة كادبوري، فكرة جميلة وبتوصل رسالة للجمهور بشكل سريع وبتستهدف الأطفال بشكل رائع، بس ليه الفضائيين يبقوا عريانيين، ليه يبقى شكلهم وحش، ليه نبقى مش عارفين نفرق ما بين الولاد والبنات فيهم، ليه الفضائيين شكلهم يبقى مخيف للأطفال، مش عيب لما أبقى راجل كبير وبخاف من إعلان، ليه الفضائيين شبه الأبراص والفئران، دي كانت مجموعة من ردود الأفعال اللي جت لكادبوري تعليقاً على حملة الدعاية اللي استخدمتها الشركة في إعلانات الطرق وإعلانات السوشيال ميديا وإعلانات التليفزيون.

ردود الأفعال دي منطقية لأن السوق بتاعنا لما تيجي تقدمله مادة غذائية لازم تراعي أن أحنا بناكل بعنينا الأول وبنهتم بالشكل وطريقة التقديم فما بالك لم تروح جايبلي كائنات شبه الأبراص وتقولي دول بيحبوا الشيكولاتة دي وعايزين ياكلوها معاك، أكيد طبعاً هنفر من المنتج ومش ههتم أني اشتريه وهتجه لبراند تاني.

طبعاً البراندات التانيه شافت أنها فرصة ليهم عشان يستغلوا الضجة اللي معمولة في السوق ويردوا هما كمان ببراند أتاك على كادبوري فنزلت تودو إعلان "أحنا من عابدين يا فضائيين" على الرغم من أن الpositioning بتاع تودو غير كادبوري وأن كادبوري بتستهدف فئه أعلى وأن أسعار الأثنين مش قريبه من بعض إلا أن كادبوري راحت رده عليهم بإعلان "عابدين منين يا مصريين" والموضوع موقفش لحد هنا لأ دا كمان تودو ردت عليهم ببوست بعنوان صرخة نملة بتتريق فيه على كادبوري، طبعاً الموجة عليت وشدت انتباه ناس تانيه في السوق فنزل براند كورونا ببوست بيقول فيه "قولوا للكيكة والفضائيين أن أحنا موجودين من سنة عشرين" وكمان نزل براند توينكز ببوست بيقول فيه "السعادة مش محتاجة فضائيين .. السعادة جنبك في اقرب كشك ليك" طبعاً كل ده عشان البراندات تقدر تحقق تفاعل أعلى، الفكرة هنا أن الخطأ في الحملة دي من وجهة نظرنا المتواضعة أن كادبوري استعانت بحملة كانت نفذتها من سنة في دول زي كندا والهند وجنوب أفريقيا عشان تنفذها هنا في مصر فالفكرة بكل بساطة أن مش كل اللي بينجح بره ممكن ينجح هنا.

ومن أمثلة البراندات اللي قدرت أنها تنجح في التغلب على الاختلافات الثقافية بين الشعوب هي شركة نايك للملابس الرياضية اللي وحدت مفهوم الرجل أو الست الرياضيين في العالم كله بشعار "just do it" فالفكرة أن عند التسويق لمختلف الشعوب لازم نراعي الآتي:

 

- أسلوب التواصل في الإعلان:
أسلوب التواصل مقصود بيه فهم الطريقة اللي الثقافات الأخرى بتتواصل بيها اللي بدوره بيسمح للحملة الإعلانية بالتحدث للعملاء المحتملين بطريقة بيفهموها.

 

- لغة الإعلان:
اللغة هي مفتاح الإعلان الفعال بس على الرغم من كده شركات كثير فشلت في التحقق من الآثار اللغوية لأسماء الشركات أو المنتجات زي شيفروليه لما نزلوا العربية (Nova) اللي فشلت في المكسيك لأن المكسيكيين لغتهم الرسمية هي الإسباني والترجمة الحرفية لكلمة (Nova) بالإسباني يعنى (No) = لا و (Va) = تمشي، يعنى شيفروليه مش بتمشى.

 

- الأرقام والصور والألوان في الإعلان:
حتى أبسط جوانب الإعلانات بتحتاج تتفتش تحت المجهر الثقافي زي الألوان والأرقام والرموز والصور لأنها في بعض الأحيان بتترجم غلط في الثقافات المختلفة.

 

وتقدروا تشوفوا القصة كاملة من خلال اللينكات دي:
- إعلان كادبوري في مصر: https://goo.gl/xT4a92 
- إعلان كادبوري في الهند: https://goo.gl/DfsrnV 
- إعلان كادبوري في كندا: https://goo.gl/Lx6hdd 
- رد تودو على كادبوري: https://goo.gl/MGb3Xh 
- رد كادبوري على تودو: https://goo.gl/AaJPjw 
- رد تودو على كادبوري: https://goo.gl/XatWDw 
- كورونا وركوب الموجة: https://goo.gl/J62La9 
- توينكز وركوب الموجة: https://goo.gl/6ci3Qp

 

تودو ملوك الnews jacking:
- تودو بتنزل بوست بتعلق فيه على وصول مصر كاس العالم تمام. 
- تودو تنزل بوست بتعلق فيه على راس السنة تمام زي الفل. 
- تودو تنزل بوست عن التمثال اللي اكسر في بورسعيد مفيش مشكلة. 
- تودو تنزل بوست تريقة على فريق كرة ليه جمهور كبير زي الزمالك لأ لحد هنا واستوب.

مهو مش معنى أن الأهلى جمهوره كبير أن باقي الأندية جمهورها صغير لازم أي براند يراعي ثقافة السوق اللي بيخدم فيه وأن أحنا كمصريين بنحب نتمسك بآرائنا أوي لدرجة التعصب، تودو معروف عنهم أنهم ملوك الnews jacking أو نقدر نقول كده بالبلدي ركوب الموجه، وده واضح في أن البراند ما بيسبش أي حدث كبير أو صغير بيحصل في البلد إلا ويعلق عليه فلو لاحظنا هنلاقي أن معظم بوستاتهم بتحقق ما بين 15 ل 35 ألف لايك ومعدلات وصول ممكن توصل ل75 ألف شخص مما يدل على أن إستراتيجية التسويق اللي ماشيين بيها مضبوطة بس الخطأ اللي ارتكبوه لازم يخليهم ياخدوا بالهم بعد كده أن في مواضيع حساسة عند عدد كبير من الجمهور ممكن يضايق من البراند.

بس على الرغم من كده خلينا نشوف مميزات إستراتيجية السوشيال ميديا بتاعت تودو اللي أتطرحت في مجلة Think Marketing"" عشان نتعلم منها.

 

- بيسمعوا الجمهور بيقول أيه: استمع للجمهور بتاعك وهو هيدلك على المحتوى اللي ممكن تكتبه.
- المحتوى مش مجرد كتابة والسلام لازم يكون ليه سبب يخليه يحقق تفاعل عالي. 
- أي شركة ممكن تركب الموجة بس الأهم أنك تركب الموجة بشخصيتك أنت وأنك تكون مختلف في تعليقك. 
- التزم بهوية البراند في أي عملية ركوب موجة من حيث الألوان والأشكال أو حتى طريقة الكلام. 
- مينفعش تركب الموجة في مواضيع حساسة بالنسبة لثقافة الجمهور اللي أنت بتستهدفه.

في النهاية أحنا متشوقين أننا نعرف أراءكم في الحملات اللي ذكرناها ونشوف هل الإعلانات دي فشلت ولا نجحت من وجهة نظركم.


مقالات مشابهة

المزيد
إزاي استفيد من
إزاي استفيد من "فيسبوك ماركت بليس" marketplace؟

"فيس بوك ماركت بليس" "Facebook Marketplace".. فكرة عملت ضجة كبيرة

الأكثر قراءة

المزيد
إزاي استفيد من
إزاي استفيد من "فيسبوك ماركت بليس" marketplace؟

"فيس بوك ماركت بليس" "Facebook Marketplace".. فكرة عملت ضجة كبيرة

فرنشايز ولا مشروع خاص ؟
فرنشايز ولا مشروع خاص ؟

فكر قبل ما تبدأ البيزنس بتاعك وأنت بتبدأ البيزنس

أكتر 5 مهارات مطلوبة في سوق العمل بقوة
أكتر 5 مهارات مطلوبة في سوق العمل بقوة

  في أوقات كتير بنقعد نتريق على الأسئلة اللي بتتقال

كيف تستخدم الخرائط الذهنية لتنظيم وقتك وترتيب أولوياتك؟
كيف تستخدم الخرائط الذهنية لتنظيم وقتك وترتيب أولوياتك؟

في أوقات بتيجي علينا بنحس أن أحنا ورانا كمية شغل مفيش

إزاي تحدد شغفك؟
إزاي تحدد شغفك؟

ماهو الشغف"حب ما تعمل حتى تعمل ماتحب".. بنقول لنفسنا كده

5 طرق فعالة لـ
5 طرق فعالة لـ"حل الخلافات" في الشغل

على قد ما ناس كتير بتحلم توصل لمنصب القيادة -سواء إنك

شركات الشخص الواحد .. الفرص والمخاطر
شركات الشخص الواحد .. الفرص والمخاطر

يوم 24 ديسمبر 2017 أعلن البرلمان المصري موافقته على إنشاء

الأسئلة الخادعة في الـ interview
الأسئلة الخادعة في الـ interview

    أكيد عملت قبل كده إنترفيو وجالك سؤال في مظهرة

الدحيح .. بيبسط اللي ما يتبسطش
الدحيح .. بيبسط اللي ما يتبسطش

الدحيح أو أحمد الغندور .. قصة شاب مصري حقق نجاح في مجال