FB Instagram Twitter Youtube Linkedin حلم فى المنام اتحول لحقيقة اسمها مرسيدس بنز | أكاديمية اعمل بيزنس
 
الرجوع الى المدونة

حلم فى المنام اتحول لحقيقة اسمها مرسيدس بنز

حلم فى المنام اتحول لحقيقة اسمها مرسيدس بنز

أى حد يقدر يحلم لكن قليلين اللى بيقدروا يحققوا أحلامهم .. النجاح يستحق التضحية عشان الحلم يتحول لحقيقة

أحد القليلين دول اللى قدروا يحققوا حلمهم هو "كارل فريدريش بنز" المعروف باسم "كارل بنز" مؤسس مجموعة مرسيدس بنز للسيارات .. العلامة التجارية الأشهر فى العالم وزى كل قصص النجاح اللى بنتكلم عنها على الصفحة .. واجه "كارل بنز" صعوبات ومشاكل كتيرة لتأسيس أول محرك احتراق داخلى .. كارل بنز كان مُصنع ومخترع فى نفس الوقت والأهم من ده كله هى الثقة الكبيرة فى نفسه اللى كان بيمتلكها واللى كانت أحد أهم العناصر الى ساعدته فى تخطى الصعاب دى .

اتولد كارل بنز سنة 1844 فى ولاية "بادن ميهلبورج" وتوفى والده وهو عنده سنتين فقط عشان تتحمل والدته معاناة تربيته وحدها فى مراحل الطفولة مرورًا بالمراهقة وحتى التخرج كمهندس ميكانيكى .. بدأ "كارل بنز" مع صديقه "ريتر" عملهم الخاص بتأسيس شركة لتوفير مواد البناء وده كان أول بيزنس خاص بيه .. لكن أداء الشركة دى كان سئ جداً فى البداية واللى دفع خطيبة "كارل بنز" انها تشترى أسهم صديقه "ريتر" وده سبب نوع من الارتياح ل"كارل بنز" مما جعل أداء الشركة يتحسن لبعض الوقت لكن المشكلات كانت صعبة جدًا والعقبات كانت كتير .

الطريف فى قصة "كارل بنز" انه كان بيحلم انه راكب على عربية من غير أحصنة وهو راكب العجلة اللى بيروح بيها المدرسة .. "كارل" صمم وعزم على تحقيق الحلم ده بأى طريقة وكان عنده الثقة الكافية لتحقيق الحلم ده ( الاصرار الألمانى الغير عادى ) .. وبدأ فعلاً العمل على صناعة محرك بشوطين وحصل على براءة اختراع سنة 1879 .. العمل كان شاق جداً من طرف "كارل بنز" ومع الابتكار المستمر منه بدأ يحصل على أكتر من براءة اختراع زى ابتكار فكرة نقل الحركة وابتكار "الدبرياج" وال "ريداتير" .

تكاليف الابتكارات الجديدة دى كانت مرتفعة جداً وده كان السبب اللى خلى البنوك تطالبه بتحويل مؤسسة "كارل بنز " لشركة مساهمة .. وعن طريق أخوه وصديق له حافظ "كارل بنز" على المؤسسة وفعلًا اتحولت لشركة مساهمة وبقى بيمتلك ما يمثل أسهم بنسبة 5% وبدأت ابتكارته مايتوافقش عليها من شركاؤه فقدم استقالته .

بعد خروجه من الشركة اتجه "كارل بنز" لاصلاح الدراجات الهوائية فى ورشة سماها "كارل و سى " مع " ماكس روز" و"فريدريك فيلهايم " .. كانت مراحل نمو الورشة دى بطيئة لكنها ناجحة وبدأوا فى انتاج محركات الغاز وبدأ "كارل" جهوده فى تطوير و صناعة سيارة ذاتية الدفع وحصل على براءة اختراع وكان فخور انه أول واحد يطور محرك ذاتى الدفع .

التحديات كانت كتير والفشل كان مرافق ل"كارل بنز" لكننا اتعودنا من كل الناجحين ان أول خطوات فى نجاحهم بتبدأ بفشل كبير وصعوبات ملهاش حصر لكن امتلاك الرؤية والشجاعة والثقة بالنفس كفيل بهزيمة الصعاب دى وتحويل الأحلام لحقيقة وربنا يوفق الجميع

شارك المقال :